للمنتدى واهل الادب والقواصيد

[ابو معالي]

سلام له رايه وغايه وتشيـيد *** راية وفا يومن الأشعار ناده
يالشعر طاوع دون شرطاً ولا قيد *** يالفكر رتب بالقوافي جداده
نقّح حروف الألف قافاً وتجويد *** عليك ترضيخ الحروف الوكاده
صوغ المثايل لايجيبه مناقيد *** بالحق والمعنى تضيع النقاده
شيّد سلام وصاعد الطيب تصعيد *** سلام والبيضاء ترفرف قصاده
تقصر عن القاصر وتنصا الاواليد *** اللي لهم بالطيب مبدأ وعاده
للمنتدى وأهل الأدب والقواصيد *** لايقصر المعنى ولابه زياده
هذا وانا مانكر حقوق الاجاويد *** كلاً على معناه يجمّع عتاده
خص الاديب اللي يعايد على العيد *** الله يعيده له بعز وسعاده
قريت نص الشعر مفهوم ومفيد *** الفايده للي قراء واستفاده
ضميت صوتي له على الحق تأييد *** وانا مقدر موقفه واجتهاده
فهمت مقصوده على طول ماعيد *** مال السياده غير راعي السياده
يالابتي يافاهمين المقاصيد *** من ضن فيكم مايخيب اعتقاده
شمر على قمة فخر شياً اكيد *** ربعي على الطولات تتعب جياده
شمر هل الامجاد للمجد تمجيد *** شمر قيم فعل ومبادي وعاده
المجد فيكم مانقص فيكم يزيد *** ونطمح لفعل اجدودنا بالزياده
الطيب فيكم ينتظر شياً اجديد *** والمرجله منكم تكوّن شداده
بالجمع والرايه تحقق مقاعيد *** تجني ثمر جهودها من جهاده
اليوم ماهو يوم سيف وبواريد *** اليوم نصر المنتصر بالشهاده
حثو على التعليم من ياصل الميد *** محداً وصل راس الهرم في عناده
العلم فيه العز رايه واناشيد *** شوف العيون العلم يثمر حصاده
هذا زمن حكمه بجلطه وتزهيد *** فيه المعوشه شوفة العين كاده
وقتاً علينا زاد قسوه وتعقيد *** حكم علينا شبه حكم الأباده
امشو وقدام العلم والمواعيد *** مافيه علم بدون عالم رياده
حثو على التعليم من غير تنشيد *** اللي زرع يلقى الثمر في جداده
وبسأل اهل الفكر بعض التناشيد *** اللغز للقناص سهل اصتياده
وشي عجوزاً سيده راسه اعنيد *** اليوم شفناها بثوب الحداده
من عقب عزه صار عمره بتهديد *** كثرت عليها الدكتره بالعياده
عقب الفخر جاها النكد والتناكيد *** النار لو شبت تخلف رماده
واسألك عن بنتاً ضحية مقاريد *** من طيبها ضفت عليها القراده
راحت مع العدوان غصباً وتهديد *** ولحداً قدر ياصلها واستعاده
واسألك عن بنتاً بداله تغاريد *** سادت بجيل اليوم عقب اضطهاده
جتنا زياره واصبحت كيدها كيد *** اليوم شفناها تقود القياده
وضحتها بس الهدف عندي بعيد *** ادري وتحقيق الأمل بالأراده
من غاب ياخذ دورة الوقت ويعيد *** والرجل ماينسى معادي بلاده
الزرع يبغاله حماة وحواصيد *** والدين ملزوم المدان بسداده
وحنا بحكم موحد الدين توحيد *** وحّد جزيرتنا وزاد اتحاده
صقر الجزيره قاد بالحق ماقيد *** ولافيه متر برضنا مستعاده
بالدين ربي سدد خطاه تسديد *** واليوم كلاً ناعماً في براده
المملكه بالقلب والفكر وتزيد *** ارض المكارم والقيم والعباده
لاقلت حي الفهد جتك الشواهيد *** الشعب كله حاضراً للشهاده

[ذيب شمر]

مشاء الله عليك يابو معالي وصح لسانك

[ابو معالي]

ياهلا وغلا اخوي ذيب شمر
مشكور على مرورك الكريم وصح بدنك
ونور القسم بتواجدك
الله يعطيك العافيه
لك اجمل تحيه أخوك:: ابو معالي

[الساري]

الشاعر ابو المعالي


صح لسانك يالغالي

وجعلك الله عالي في الدنيا والآخــرهـ



لا هنت على هذه القصيده الرائـعــه



خص الاديب اللي يعايد على العيد *** الله يعيده له بعز وسعاده


آمــيــن

لاهنت يا ابو المعالي

لاخلاء ولا عــدم

[الشراع]

صح لسانك يابومعالي

والله قصيدة تكتب بماء الذهب

جزله من راس جزل

وتوصياتك على العين والراس

[الأديب]

الأخ العزيز

والشاعر الكبير / ابومعالي

صح لسانك يالغالي

ولي الشرف إنك تذكر اسمي بين أبيات القصيدة

وقصيدتك نبراس ومنهج نحتذي به للوصول للهدف المنشود

وتقبل أجمل تحيه

[ليث الطنايا]

صقر الجزيره قاد بالحق ماقيد *** ولافيه متر برضنا مستعاده



ياسلالالالالالالالام عليك يا ابو المعالي



صح لسانك والله لا يهينك


لا عدمناك ولا عدمنا دررك الرائعه


ودام الله آمن الوطن وعزهـ

[القاصف]

الزرع يبغاله حماة وحواصيد=والدين ملزوم المدان بسداده
وحنا بحكم موحد الدين توحيد=وحّد جزيرتنا وزاد اتحاده
صقر الجزيره قاد بالحق ماقيد=ولافيه متر برضنا مستعاده
بالدين ربي سدد خطاه تسديد=واليوم كلاً ناعماً في براده
المملكه بالقلب والفكر وتزيد=أرض المكارم والقيم والعباده
لاقلت حي الفهد جتك الشواهيد=الشعب كله حاضراً للشهاده


عاش المليـك خادِماً أميناً على الحرَمين .. وأمدَّ في عُمـرِه

قصـيده رائعه مِن شـاعِر متمكِّـن .. ينظُر للبعيد .. يظنّ أن مُستقبَل أُمّتِه على كفِّ عفريت

هُوَ اللهُ الذي يحمي البِلادَ والعِبادَ أخي .. فلا تخَف


صـح الله لسـانك يا [ أبو معــالـي ]


اللهُـمَّ احمِ دينَنا و قِ أُمّتَـنا