من الثابت الى رااعي اللقية؟؟؟؟

[راع الجدعا]

الاخ رااعي اللقيه
منذ تسجيلي بالمنتدى لاحظت كثرة مشاركاتك وفعاليتها وعمق اطلاعك وغزارة معلوماتك . ومع الاسف في احدى مشاركاتك في موضوع ((ولد علي موجودين في ضفره . والديار لم تكن لشمر )) وجدت كلام محسوب على واحد بمثل نشاطك وتميزك بالمنتدى . حيث رديت على من سمى نفسه ((خيال الحمراء)) المنتسب لعنزه وتناولت بردك عليه عدة أمور ويبدو انك كنت مشحون وغاضب اثناء كتابة مشاركتك .مما جعلك بدلا من الدفاع عن شمر تنال من أحدهم .فقد ذكرت مقتل الدريعي بن شعلان بقولك(( الدريعي بن شعلان ذبحه راعي شمري !! وعاداتنا ناخذ برعياننا شيخ من شيوخكم )) ورغم ان عنزه اصلا تنفي قتل الدريعي ( وهذا ليس مستغرب منهم ) الا ان المستغرب ان تجعل فارس من فريس شمر ( راعي شمري ) وتنسبه لنفسك بكلمة (برعياننا) واصبح من جاب راس الدريعي قبل مايقارب 180 سنه. من رعيانك ياراعي اللقيه . المعروف بان قاتل الدريعي ثأر لأخيه الذي كان من عقدا الثابت حينها . ((كلمة راعي)) ياراعي اللقيه عندما تكتبها بالمنتديات في عام 2009 تعتبر انتقاص للشخص لان الجميع يعرف بأن الرعيان الان يستقدمون بتأشيرات . وهم اقل مستوى من معازيبهم . فكيف اذن تقول (رعياننا) وكأنك وضعت نفسك معزب له . أما الراعي باصطلاح البدو قبل لا يعرفون التأشيرات فأغلبهم سرح بحلاله او سرح عياله بالحلال . وبكل المعنيين لا يحق لك ان تقول (راعي من رعياننا) ولم يكن راعيا لاحد من شمر المعاصرين له.
عند عنزه ( خلف الاذن) يسمى أبا الشيوخ. لأنه ما يذبح الا الشيوخ او روس القوم . وانت ياراعي اللقيه تسمي من يذبح الشيخ . راعي ؟؟
(الشيخه او الرئاسه او السياده ) بمعنى واحد تؤخذ اما لكرم الشخص او شجاعته كما قال الشاعر:
لولا المشقة لساد الناس كلهموا 1الجود يفقر و2الأقدام قتال
وانت جعلت اقدام وشجاعة رجل تجرأ وقتل بن شعلان استحق ان يكون (راعي)؟؟
ورغم شرف مهنة الرعي التي عمل بها سيد الخلق صلى الله عليه وسلم . الا انني وجدت عبارتك بحاجه للتصويب . ويقال غلطة الشاطر بعشره

[دايم الزين]

هـلا والله 00 بالخـــــــــال الطيب راعي الجـــــــــــــــدعا
تراك أنت عين 00 والباحث والمؤرخ والكـــــاتب وإبن عم الجميع رااعي اللقيــــــــــــه العـين الثانــــــــــــية !!
وحــــــــــنا ياالخال 00 نثق برااعي اللقية لأنه مصدر من مصادر المصداقية
وأنا ماأتكلم بأســــمه لأنه يملك كل أدوات 00 الرد والتعقيب والحجـــــــــــــه !!
وأكـــــــيد فيه لبــــــــس بالموضــــــــوع والمعني دائما بفكر الكاتب وسننتظر رده 00 وحنــــــا أبنــــــــاء عمومــــــــــــه بالنهايــــــــــــة !!
والســــــــــــاعة المباركـــــــــــــة بك 00 ياراعي الجـــــــــــــدعا !!
وشـــرفت منتــــــــداك 00 وهذي بحــــــــــق تتابعنا وما تسجل من زمـــــــان لأنــــــــك مكســــــــب يالخال !!
ودمــــــت بحمــــــــي الرحمــــــــــن

[طنيــان]

راعي اللقيه وراعي الجدعاء هدفهم واحد وهم واحد واختلاف الاسلوب طبيعي بس عاد لوراعي الجدعاء ذكر اللي ذبح الدريعي كان افاد الجميع. وجهه نظر ...
تقبلو مروري

[المهندس الرااقي]

راعي اللقيه كاتب مميز والثابت راعين بطولات وفخر واكيد هناك لبس بالموضوع ...ونتظر اخونا العزيز راعي اللقيه ...

[نايف بن حزوم]

الصراحه اني دايم اسمع ان اللي ذبح الدريعي وجاب راسه من رعيان شمر بكذا مجلس ولكن وهم بقولتهم راعي ماهي انتقاص له بل احس انهم يفخرون بفعله وهم يطلقون عليه لقب راعي .ومع ذلك اعتقد في رايي ان هذه التسميه تطلق على العامه من البدو الذين ليس لهم مثلا مشيخه او عقاده اي انه الراعي هو الرجل العادي والله اعلم وعلى فكره انا سمعت السالفه وهي قمه في الروعه والعجب وياليت المتمكنين منها يكتبونها لنا والسلام عليكم ورحمه الله..

[خلف الرويتع]

هلا اخوي راعي الجدعا ونعم بالثابت جميع وعلمهم يرفع الراس

واكيد اخي راعي اللقيه يسمع كما سمع غيره والصحيح ان بعض الناس الله يهديه ينقل الموضوع خطاء ويستمر الخطاء حتى ياتي من يصححه وكان الواجب عليك اخي راعي الجدعا توضيح القصه كامله واسم الشخص الذي قتل الدريعي ابن شعلان وجاب راسه وتعديل الخطاء الغير مقصود الذي وقع فيه اخي راعي اللقيه وهو خطاء منقول من بعض الروات اليكم القصه حسب ماسمعته وامل من يجد في ايضاحي اي خطاء اشعاري لتعديل الخطاء فنحن نريد تاريخ شمر ان ينتشر ويعدل الاخطاء اذ واجده وهذا مايجب علينا ان لانعتب على من وقع منه الخطاء بغير قصد وهذه قصه الفارس سعيد من المانع من الثابت وليس الراعي

قصة الفارس سعيد ابن هدالق

جياب راس الدريعي

الشيخ الدريعي ابن شعلان شيخ عشيرة الروله ذبح سعود ابن هدالق اخو سعيد ابن هدالق من الثابت وفي احد اليالي احضر سعيد راس ذبيحه الى امه وهي نايمه وقال يمه خوذي هذا راس الذبيحه جبته لك قالت الله ياخذك احسبك جايب راس الدريعي ذباح اخوك سعود عند ذلك عزم سعيد ابن هدالق انوه يجيب راس الشيخ الدريعي وحلف انه الا يجبه لحاله ولايرجع الا وهو معه وذهبا الى الروله ليعرف الشيخ الدريعي ولم اتى عندهم ماملاحم ولاكلا من اكلهم ولا شرب من شربهم لمدة يومان اواكثرحتى مايكون خاين وهذي عوايد العرب ولم عرف الشيخ الدريعي ابن شعلان واخذ يراقب الدريعي حتى جات الفرصه وشاف الدريعي لواحده جاه سعيد ابن هدالق وقال يابن شعلان انطح عن روحك جيتك انا سعيد بن هدالق وانا راعي الجدعا ويش تخبر بطنك ماتخبر اخوي سعود وتعارك سعيد والشيخ ابن شعلان واستطاع سعيد قتل الدريعي ابن شعلان وقطع راسه وخذاه معه واطردوه فريس الروله والشعلان ودخل على بيت الهقشا
ولم اتى على بيت الهقشا ملقى الرجال طالعين للقنيص والروله والشعلان وراه وفي حرمتين في البيت وحده منهن وهي زوجه الكبير من الهقشا قالة عندكم هذا الرجال داخل البيت الذبحوه اما الثانيه فهي اخت الهقشا فقالت البيت البيت ياويلكم اذا قربتوله يجون اخواني ياويلكم اذا درى وقامت تنتخي البيت لحد يقربله والهقشا ناس معروفين بالشاجعه والمرجله ورجعواالشعلان والروله ولما جو الهقشا ودرو بالسالفه قال احد جاء الدخيل والبيت قالوا لا وكان الرولة ذابحين لهم ناقه و يقطعون الناقه قالوا الهقشاء ياسعيّد حنا مشغولين مار اركب هالجمل وهات لنا حقنا من الناقه قال وشلون انهج والرجال يطردوني قبل شوي انا ذابحاً شيخهم الدريعي وتبيني اروحلهم وجيب حقكم من الناقه قال رحلهم وانت بوجهي يارعي الجدعا محد يجيك وذهب سعيد ابن هدالق واخذ حق الهقشا من الناقه والم ايعترضه احد من الشعلان خوفاً من الهقشا
وبعده قال اخوهم الكبير رح ياسعيد لهلك تراك بوجهي الين توصل ربعك الثابت قال سعيد ابن هدالق ياشيخ ابي اقولك عن حاجتين وابيك تاخذا تطيعاً قال تفضل قال هذي امره ويش تصير لكم قال الهقشا هذه زوجتي قال انصحك تطلقه والله غير تطفي ناركم وثم قال وهذه المره ويش تصير لكم قال هذه اختنا قال ونعم بنت رجال وذهب سعيد ابن هدالق الى ربعه الثابت ومعه راس الدريعي وجابه الين اعطاه امه واوفا بالعهد الذي قطعه على نفسه وجاب راس الدريعي ابن شعلان

امل من يجد خطاء فيما اوضحته في هذه القصه تعديل ذلك الخطاء وتنبيهي الى ذالك تقبلو تحياتي

[طنايا لو رضينا]

راعي الجدعا


والف نعم من هل الجدعا كلهم صيارم


راعي اللقيه اكيد ما يقصد لان اللي يجيب راس الدريعي من نص قومه


مهو انسان بسيط وسعيد ابن هدالج فعله معروف اذا هو راعي ولا شيخ


وتقبل مروري

[راع الجدعا]

هلا بكم جميعا واشكر مروركم وماعليكم زود . فاتن لا أوضح إني لا أسيء الظن إطلاقا بأخوي راع اللقيه ولكن( العتب على قدر المحبه ). بس تلاحظون إن عبارته بهالشكل ماحدن يرضاه لأي شمري (عبدي او اسلمي اوزوبعي) له أدنى فعل حتى لوهو قايلن بيتين شعر(بس بيتين طول حياته) يمدح به شمر او يرد على خصومهم قبل 200 سنه. من المستحيل أن أتي أنا أو راع اللقيه اوغيرنا . ونقول بالمنتديات ( قال راعي من رعياننا كذا وكذا ونقول ابياته ) ان ما قلنا الشاعرفلان . أدنى ماهو نبي نقول قصيدة فلان الفلاني . ولو قلنا راعي ( وهذه صفة فعلا لجميع البدو ) على الاقل ما نقول من رعياننا .
ياجماعه شيء مضى على أهلكم قبل به حلاوة بعض الشي. بس اغلب اوضاعهم توجع الكبد لو نقارنه مع وقتنا الحالي. ومن حقهم علينا تنزيههم عن مستوى رعيان (ننا) عموما موقفي هذا هو نفسه لو النقاش يخص أي شخصيه من شمر ثابتي أو غيره.
وبيت الشعر اللي ذكرته ما اقصد به ان سعيد بن هدالق الزرعي الثابتي شيخ لجماعته وقتها ومثل ماقال اخوي/نايف بن حزوم. انه من عرض عربه بدو يرعون حلالهم. وياما من راعي فعل وأدركه الحظ وصار له رعيه .
اخوي/خلف الرويتع. القصة قريبه جدا من اللي ذكرت والاختلاف بحاجات بسيطة راح أوضحه مع بعض الإضافات المؤكدة إن شاء الله . واخيرا رااعي اللقيه اخ عزيز ولا استبعد انه شاركنا باسم مختلف !
مع أطيب تحياتي

[رااعي اللقيه]

هلا بك اخوي راع الجدعا .. اولا مليون نعم بالثابت (( الجمع الثقيل )) والثابت انا معجب

ببطولاتهم وبفرسانهم ويكفيهم فخر بطولات الحدب والتمياط والعجرش وانا يوم اقول من

رعايننا اقصد رعيان شمر وانا افتخر بكل شمري من سنجاره ولا الاسلم ولا عبده ويحق

لي اني افتخر ببطولات الثابت وشمر مابينهم فرق وانا يالبناخي حاشى لله اني انتقص من

احد وانا سمعت القصه من ناس من التومان وكانوا يفاخرون بالشي هذا وقد اكون مخطئا

يالغالي بعدم تحققي من القصه وانت شفت الاخ نايف بن حزوم يذكر هالشي والروايه الي

ذكرته والله منتشره يابن العم وانا مااقول هالكلام لاثبت الروايه الي قلته بردي على العنزي

اذا كنت اخطيت بالنقل فهو عن غير قصد والعذر منك يالغالي ومن الجميع ..

وبلا شك ان الي سواه الثابتي بطوله وشرف

ولا يصدر الا من انسان شجاع والرعايه ماتعيبه ... ولاتظن يالبناخي اني اقصد اسيء لاي

احد وربك هو العالم اني اتمنى لو كل الطيب بشمر واتمنى كل شمر شيووخ ! وشهادتك بي

وكلامك الطيب عني شي كبير وافتخر به اخوي راع الجدعاء



دايم الزين ... المهندس الراقي .. لااجد شي اكتبه عنكم غير انكم تملكون (( انظف قلبيين ))

طنيان .. نايف بن حزوم .. مشكورين ويعطيكم الف عافيه بيض الله وجيهكم

خلف الرويتع .. يابركة هالموضوع الي جابك وخلاني استفيد من مشاركتك وانت والله عزيز

وغالي وعارف اخلاقك العاليه وطبعك الراقي من خلال مشاركاتك بالمضايف وانت مدرسه

بتاريخ شمر اتشرف اني استفيد منه ... يعطيك العافيه يابو عتيق ولعلك دوم سالم

[رااعي اللقيه]

هلا بك اخوي راع الجدعا .. اولا مليون نعم بالثابت (( الجمع الثقيل )) والثابت انا معجب

ببطولاتهم وبفرسانهم ويكفيهم فخر بطولات الحدب والتمياط والعجرش وانا يوم اقول من

رعايننا اقصد رعيان شمر من كل فخوذ شمر من الجميع ولا الحين يالبناخي تساوت الجميع

وانا افتخر بكل شمري من سنجاره ولا الاسلم ولا عبده ويحق

لي اني افتخر ببطولات الثابت وشمر مابينهم فرق وانا يالبناخي حاشى لله اني انتقص من

احد وانا سمعت القصه من ناس من التومان وكانوا يفاخرون بالشي هذا وقد اكون مخطئا

يالغالي بعدم تحققي من القصه وانت شفت الاخ نايف بن حزوم يذكر هالشي والروايه الي

ذكرته والله منتشره يابن العم وانا مااقول هالكلام لاثبت الروايه الي قلته بردي على العنزي

اذا كنت اخطيت بالنقل فهو عن غير قصد والعذر منك يالغالي ومن الجميع ..

وبلا شك ان الي سواه الثابتي بطوله وشرف

ولا يصدر الا من انسان شجاع والرعايه ماتعيبه ... والثابت بهخم من الفريس والشيوخ

والابطال والكرماء مايحتاج لكتب ومجلدات لذكرهم


ولاتظن يالبناخي اني اقصد اسيء لاي

احد وربك هو العالم اني اتمنى لو كل الطيب بشمر واتمنى كل شمر شيووخ ! وشهادتك بي

وكلامك الطيب عني شي كبير وافتخر به اخوي راع الجدعاء



دايم الزين ... المهندس الراقي .. لااجد شي اكتبه عنكم غير انكم تملكون (( انظف قلبيين ))

طنيان .. نايف بن حزوم .. مشكورين ويعطيكم الف عافيه بيض الله وجيهكم

خلف الرويتع .. يابركة هالموضوع الي جابك وخلاني استفيد من مشاركتك وانت والله عزيز

وغالي وعارف اخلاقك العاليه وطبعك الراقي من خلال مشاركاتك بالمضايف وانت مدرسه

بتاريخ شمر اتشرف اني استفيد منه ... يعطيك العافيه يابو عتيق ولعلك دوم سالم

[نايف بن حزوم]

اخواني السلام عليكم ورحمه الله ولكم كل الشكر على حواركم الراقي وحسن بالظن بالاخر وهواللي مفروض يكون بكل الاحوال وبكل المحاورات .من خلال مجالسات للشيبان وسوالفهم وعلى طاري الراعي وهل هي انتقاص للشخص حين تطلق عليه ولا لأ.
استشفيت ان شمر ما يحقرون احد من الناس وخصوصا الراعي فلا يبخس حقه وان بخسه احد ومال على هدا الراعي فيجب عليه ان ينتبه لان الراعي ما يخلي حقه .عكس بعض القبائل والمثل المشهور لاحد الشيوخ اللي قال حين ساله الشيخ من قبيله اخرى عن الفرق بين القبيلتين قال له(انت تقتل الرجل وتنام مع اهلك ولا انا حصان بين حصن)او قريب من هالمعنى وهويقصد ان جميع قبيلته متساوين ومحد يحقر احد واللي يفعل يتحمل فعل ولو كان شيخ يوخد الحق غصب منه والراعي ما يخلي حقه والله اعلم..

[راع الجدعا]

هلا بك ياخ/نايف والسالفه مثل ما وضحت سابقا ماهي على كلمة راعي (مجرده من أي حروف كراعينا وراعي الفلان ) ابدا انا ما اعيب الرعي . اصلا ما تلقى بدوي ((مردد)) من أي قبيله الا( ورد او صدر أو سرح او عقل او ارضع له حوير. لا ويمكن يعاون الفحل على بعض الامور!! الخ..........) نحمد الله هالحين كلن عنده زول او اثنين .
منهم الحفاه العراه رعاة الابل والشاه الذين ذكرهم الرسول صلى الله عليه وسلم بالحديث المعروف. هم الباديه بشكل عام.
بعدين هالحين الناس كلهم رعيه !! مايقولون رعايا الدوله الفلانيه والعلانيه !!!!!!!!!!!!!!!!!!

[سنجار]

الاخ راع الجدعا اشكرك على هذا العتب المؤدب وهو خطأ غير مقصود من الاخ راع اللقيه

واذا كان يحاور رجل من عنزه فهويرد عن شمر بصفه عامه واشكر الجميع على هذا الاحترام

وعلى النقاش الراقي الذي يدل عن صفاء النيه وبارك الله فيكم واشكركم لكم اتمنى ان

النقاشات بين شمر عامه ترقى الى هذا المستوى الراقي تقبلوا فائق الاحترام والتقدير

[راع الجدعا]

من القلب اكرر الترحيب بكم واشكر مداخلاتكم الايجابيه التي تؤكد مدى رغبتكم في تقريب وجهات النظر عند الاختلاف وهذه السجيه تؤكد اصالة معادنكم وعلو مواكركم
اخي راع اللقيه ان كنت احترمك قبل هذا النقاش فقد زاد احترامي لك بعده والله يقويك على المنافحه في سبيل الحقيقه
الحوار الراقي ان لم يتحلى به ابناء الكرام امثالكم فثـقوا انه سلعه زائده لن يشتريها اللئام .
اخيرا
(والف نعم بعدد ماكتب من حروف بكل المنتديات المحترمه ) لابناء العم .

تقبلوا اطيب تحياتي....

[رااعي اللقيه]

راع الجدعا احترامك لي شي له تقدير كبير عندي وانا ابادلك نفس الشعور من الاحترام والتقدير

وصدقن الي قلته عن الثابت مايوفي حقهم ..

دمت بود

[ابن هذيل]

بيض الله وجيهكم على الحوار الهادف والمطلوب ما بين ابناء قبيلة شمر

[البدوي الأخير]

وجهة نظري أن التعقيب لم يكتمل يا راع الجدعا ،لأنك أستنكرت على الكاتب قوله (راعي) وتقول أن بن هدالج فارس معروف بالثابت ،وحنا نسمع أيضأ ويكفيه فخر أنه ذبح الدريعي لكن التسائل اللي يطرح نفسه وين عاش هذا الفارس في نجد أو الجزيرة ومتى وقته بالضبط ، ويا ليت تعطينا نبذة عنه ومنين من الثابت وعن الدريعي اللي ذبحه ليكتمل جمال ردك.

وشكرا للجميع ،،،،،،،،،،،

[أبو حواس]

لا هنتوا جميع علىآ هالحوآر الرآقي

دمتوا بود جميعا

..{ تح ـــيآتي

[مشعل الشريهي]

اصلا ما تلقى بدوي ((مردد)) من أي قبيله الا( ورد او صدر أو سرح او عقل او ارضع له حوير. لا ويمكن يعاون الفحل على بعض الامور
بعدين هالحين الناس كلهم رعيه !! مايقولون رعايا الدوله الفلانيه والعلانيه

:102:

[السررردي]

مشكورررررررررر

[راع الجدعا]

مرحبا من جديد . لي فتره طويله عن الجهاز والمنتديات . واحب اشكر جميع من اثنى على طريق الحوار والمتحاورين وما عليكم زود جميعا

مشعل الشريهي هلابك اخوي .تلقطه وهي طايره . الربع قاموا يراددون على سالفة الراعي . هو انا قايلن الثابتي مخترع القنبله الذريه :102:

البدوي الاخير
عطنا وش سمعت . يمكن يكون كافي للاجابه على تساؤلك وتصير ( جياب راس الدريعي)
عموما بامكاني اجاوبك على اللي تبي . وازيدك فوق اللي تبي . بس ليش ماهو جايز لك استنكاري على الكاتب كلمة (راعي) رغم توضيحي السابق .:101:

قصة سعيد الوضيحي الزرعي الثابتي حصلت بالجزيره (بالعراق ) ووقته على دور صفوق الجربا وممكن انه ادرك تالي زمن بنيه . وذبحة الدريعي ماحد يقدر يحدد تاريخه بالضبط . تواريخ الاحداث القديمه اغلبه تخرصات . وربط حادثه باخرى ( دائما تحدث خلافات بالتواريخ ) وتلقى احيانا نقاش يبدأ بقصه ويدخل بموال طويل من القصص .
هذي قصيدة الامير /عبيد الرشيد ( تاريخها بعد عام 1263 هـ ) والمناسبة (حرب الجوف الثانيه ) بعد ذبحة الدريعي بن شعلان بسنين . شيخ الروله وقتها فيصل النايف

ماهو مهمّن فيصلٍ وابن هذال...........اللي مهمّن بلشةٍ به مهنا
مع واحدٍ غضٍ مع الزين مكتال...........راعي قرونٍ فوق متنه تثنا
سلم عليه وقل له مثل ماقال ............وعقب الغلا دلّ عليع يتجنا
يابو خلف جزعٍ مراعات الاسمال...........وشف لك جديدٍ يازبون المجنا
والعلم الاخر عندنا ياحمى الذال...............بأدنى بيوتٍ منزله هاك عنا
تتلي ضعونٍ لمرذية كل خيال...............من ضيغمٍ بالأصل يعزون منا
والله هو اللي عالمٍ كل الاحوال............سواالفٍ ماينتعلم بهنا
والا انا ودي مع سمحات الاقبال...........ناخذ لنا وقتٍ بعجباتهنا
يامن يخبر فيصلٍ فرز الابطال...........ان الجبل دونه على الضد حنا
يوم الوغى نلحق على كل مشوال.........ومطارقٍ والموت بأطرافهنا
وين القصير وماردٍ وين شلال.........وغرايسٍ بأشناقهن قطعنا
ستين يومٍ بأوسط الجوف نزال..........واركابنا يم الجبل يسفرنا
ماجيت كان انت شفيٍ بالافعال..........تظهر حسينٍ ياحمى كل دنا
والا تبي لك عند الاطعاس غربال..........انشد عن اللي جاء بأطرافهنا
لسيوفنا وسمٍ بهامات من صال.............وعقب النقايص يطلب النصح منا
مشهور خليّ بالرحاء بأيسر الجال.......وجدّك ترى ذباحة الشيخ حنا
وليل ونهار وقربنا يشده البال...............ادعيك كان انت لقربي تمنا
فالله بحق العرش وبحق الانفال............وبحق من له يافتى الجذع حنا
يرميك يوم انك تسريت الارشال...........اللي تبي لك خشرةٍ في وطنا
نلحق بك اللي فات من ماض الاجال.......بمخضراتٍ هّمنا سنهنا
اغداك تفريقك على ضدك المال..........اعطيت من لايفرجه لك ثمنا
والوجه منا يابن شعلان بإقبال...........ان ساعفت توتا بقيعان خنا
ذا قول من يازن كلامه الى قال.........ولا هو بلشانٍ بإطلاعهنا
وصلو على اللي جاء من الرب مرسال..........بالفاتحه وازكى صلاةٍ مثنا
((اللهم صلي على محمد ))

[ظفيري بناخي شمر]

مليووووووووووووووووووون نعم بالثابت

[نواف صاعد المشراف]

عيني عليكم بارده على حواركم المحترم واذا تسمح لي ياراع الجدعا بتعقيب
1- معك حق تعتب على الكلمه رغم انها وصف لعامة البدو . بس اذا الامير عبيد الرشيد يقول (وجدك ترى ذباحة الشيخ حنا ) فعلا حنا اي (نحن) وليس.......
2- هو على كيف عنزه تنفي أجل وش معنى المثل المتداول عندهم (( بخت نايف يرمي الحايف)) نايف ولد عم الدريعي قضب اخو سعيد بعدين ذبحوه ثم بقية القصه_ وهذا يفضح نفيهم

تقبل مروري ومشاركتي دمتم بخير...

[راع الجدعا]

شكرا اخ / نواف
هذا المطلوب منا تجاه فرسان او مشاهير شمر وان نوفيهم حقهم , وعنما اوردت قصيدة الامير عبيد الرشيد لاوضح للاخوان كيف الرجال قديما يقدرون بعض ويتفاخرون بافعال ابناء القبيله ويعتبرون فعل اي شمري فعلهم جميعا وهذا معنى " ذباحة الشيخ حنا " والمثل اللي ذكرت من الادله التي يحاول الناس طمسها (ولكن حايف بنظر الطرف الاخر) وفي الوقت نفسه تلقى من يزور لغايه في نفسه ( بعصر الانترنت اللي سرق عنز خلوه فارس زمانه) . ولكن التاريخ محفوظ بصدور الرجال . بالنسبه لي اكتفي بهذا التوضيح لانه كان لنقطه معينه ارجو ان تكون واضحه للجميع . اما (القصه الحقيقيه وما بعدها) ممكن نوضحه بموضوع مستقل وبعنوان مناسب
لاحظت من اسند كلامه على التومان وهم من الثابت . فاقول الثوابت بينهم امور خاصه . واهل مكه ادرى بشعابها(ارجوا عدم التعليق والاثاره) تقديري للجميع

[اخوكم]

اخي راع الجدعا وفيت وكفيت
ورحم الله الفارس سعيد بن هدالق
جياب راس الدريعي
ولايلحقنا شك بالثابت أبدا فلهم من الصولات والجولات
في ميادين القتال مايجعلنا نقف لهم احتراما وتقديراً

تقبل تحياتي