المرجف
2006-01-25, 10:00 PM
احداث هذه القصة وقعت بعد معركة بقعاء المشهورة بأربع سنين وتعرف هذه الوقعة بـ[ وقعة الجوي ] سنة 1261هـ
" هذا قيل : ان اسلمية ركّادة بعنيزه ورحلت بالربيع اثاريه نزلت بحمى ابن سليم , طلع عليه ابن سليم وقال: هه وش اللي جايبكم للحمى ؟
قالت : يابعدحيي مادرينا انه حمى ولامعنى شين هالجملين وخمس معزى! ومعه وليد له جذيع. ودلى بهالشوحط يضرب الوليد ! وهي تقعد تطلبه ياخيي ادخل على الله لاتضرب هالوغد يابعدحيي...... مارد عليه , واثاريه غبنة المسكينه وقالت : ياعبيد اودز !!
قال : بعد تنخى عبيد !! من به عرق ... نبح !؟ وهو يرد للسيف وهويضربه لا قاطعن راس الوليد !؟
وقيل انه ذبحه بالخمس الأواخر من رمضان ؟
راح العلم وجاء عبيد وهو يوم دري !! قال : انا اخو نورة !! وهالحين مازعل عليه وذبحه الا يوم قالت ياعبيد اودز ؟!
يالله يا شمر والله الا يوم النحر !؟
وهو يوم جا ليلة العيد ( الضحية ) وهو يكمن لهم ؛ و يوم تعيدوا وكلوا عيدهم وهم يسرحون ادباشهم ؛ ويرسل عبيد الجيش(عددهن 30 ذلول ) قال : خوذوا الدبش من شان لياشافوهم اهل جيش كل الديرة تفزع مايبقى احد واللي بي يفزع ماهو على مطية خلوه يفزع ..
راح الفزاع , هاه وشي اللي جتكم؟ قالوا : جيش . كم هم؟ قالوا : قيمة ثلاثين ذلول..وهي تفزع الديرة كله ..
واكمن ياعبيد ليا ما شاف الحريم طلعن من برا الديره يراعن لمهف رجالهن!؟ يعني ماباقي رجال ؟
قال عبيد: يالله اقطعوا ثنوهم وتروا اليوم مافيه منع. . وهم يعثون بهم شمر عوايدهم لابتي ؟
وهو يخز عبيد هكالخيال المجوع وهو يلحقه التفت راع الفرس ليا هذا عبيد !!! قال : لا ياشيخ ياعبيد لاتذبحن !!
قال: ماهو انت ابن سليم ؟ قال لاوالله انا ابا بطين ! قال: وين ابن سليم ؟ قال: راع هكالشقرا وغتره عليه(هذااااك هو) وهو يهرمسه عليه ، وابن سليم يسدحه للقصر يبي الديره هجيج ؟ ولا يلحقه الا عند دروازة القصر(دروازة : كلمة فارسيه) وهو يسجفه بالشلفا ليا طاوي رسنه واذبحه وهات فرسه!!؟؟
عاد يقول عبيد العلي الرشيد :-
يابابطين اسأل لي الخالدية =قل وشلون نومه يوم خلي المكاني
زتيت جوزه فوق بنت العبية =عامين ما شمه عريب الحصاني
كله لعيني صيحت الاسلمية=دللت سيفي بي طوال الاذاني
وشوااللي يحرم دمكم بالضحية=وحنا يحلل دمنا برمضاني
والخالدية هي مرة ابن سليم عبدالله بن سليمان بن زامل [ ابن سليم ] أمير عنيزة
وهذا اللي خلى عبدالله يقصد قصيدته يسند على فيصل ابن تركي ابن سعود .. اللي منه ..
ركبوا على عوص النجايب رجاله =ويبرا لهم(يابو سمي) كم خيال
جوه الضحى ياشيخ ماهي نطاله=وساروا لما رادوا على كل مشوال
هذاك حق اللي لخطوطك عصا له=فرحان وابن سبيت ماالقاهم البال
يوم الخطوط أقفت وجت ما قرا له=جاه المقرّي والحق الأول التال
وعيا يودي ركبنا مع جماله=من عقب ماكزيت لك كل مرسال
وعيا يطيع الي ينصح حكي له=وأزريت من كثر الشكاوي والارسال
وعادات فعل الزور باللي مشى له=يرميه بالميدان من غير خيال
شف حالف بالزور شف وش جرى له=ياعونة الله مامن الحي عفال
يوم انهم عجزوا عني بالغياله=شبوا لنار الحرب بالقيظ صوال
ومن شب نار(ن)حرقه باشتعاله= وصارت عقوبة فاعله ذلّ واذلال
وان كان ما شافوا وعافوا نواله=وصاروا بقاياهم هذولاك جهال
فالسيف للتايه استاده حنا له= وندل به من هو عن الجاده مال
واليا كبا لونه محشناصقاله=ولاهو من القلطات والضرب ملال
وعبيد اللي لا عدمنا خياله=حطه لهم مولاي نجم(ن) وزلزال
هذي علوم ديارنا من صفا له=مشروب ماها الابقصاف الاجال
اليا ما صفت بالسيف ماهي جماله=وثنيت للرثاع بالقيد وعقال
ولانفوز الا ونروي سلاله =من دم هامات العدى عل وانهال
والمعذرة طولته عليكم بهالسوالف ..؟
لكن عذري ان الليلة خميس واراكم على خير ..
تحيتي
" هذا قيل : ان اسلمية ركّادة بعنيزه ورحلت بالربيع اثاريه نزلت بحمى ابن سليم , طلع عليه ابن سليم وقال: هه وش اللي جايبكم للحمى ؟
قالت : يابعدحيي مادرينا انه حمى ولامعنى شين هالجملين وخمس معزى! ومعه وليد له جذيع. ودلى بهالشوحط يضرب الوليد ! وهي تقعد تطلبه ياخيي ادخل على الله لاتضرب هالوغد يابعدحيي...... مارد عليه , واثاريه غبنة المسكينه وقالت : ياعبيد اودز !!
قال : بعد تنخى عبيد !! من به عرق ... نبح !؟ وهو يرد للسيف وهويضربه لا قاطعن راس الوليد !؟
وقيل انه ذبحه بالخمس الأواخر من رمضان ؟
راح العلم وجاء عبيد وهو يوم دري !! قال : انا اخو نورة !! وهالحين مازعل عليه وذبحه الا يوم قالت ياعبيد اودز ؟!
يالله يا شمر والله الا يوم النحر !؟
وهو يوم جا ليلة العيد ( الضحية ) وهو يكمن لهم ؛ و يوم تعيدوا وكلوا عيدهم وهم يسرحون ادباشهم ؛ ويرسل عبيد الجيش(عددهن 30 ذلول ) قال : خوذوا الدبش من شان لياشافوهم اهل جيش كل الديرة تفزع مايبقى احد واللي بي يفزع ماهو على مطية خلوه يفزع ..
راح الفزاع , هاه وشي اللي جتكم؟ قالوا : جيش . كم هم؟ قالوا : قيمة ثلاثين ذلول..وهي تفزع الديرة كله ..
واكمن ياعبيد ليا ما شاف الحريم طلعن من برا الديره يراعن لمهف رجالهن!؟ يعني ماباقي رجال ؟
قال عبيد: يالله اقطعوا ثنوهم وتروا اليوم مافيه منع. . وهم يعثون بهم شمر عوايدهم لابتي ؟
وهو يخز عبيد هكالخيال المجوع وهو يلحقه التفت راع الفرس ليا هذا عبيد !!! قال : لا ياشيخ ياعبيد لاتذبحن !!
قال: ماهو انت ابن سليم ؟ قال لاوالله انا ابا بطين ! قال: وين ابن سليم ؟ قال: راع هكالشقرا وغتره عليه(هذااااك هو) وهو يهرمسه عليه ، وابن سليم يسدحه للقصر يبي الديره هجيج ؟ ولا يلحقه الا عند دروازة القصر(دروازة : كلمة فارسيه) وهو يسجفه بالشلفا ليا طاوي رسنه واذبحه وهات فرسه!!؟؟
عاد يقول عبيد العلي الرشيد :-
يابابطين اسأل لي الخالدية =قل وشلون نومه يوم خلي المكاني
زتيت جوزه فوق بنت العبية =عامين ما شمه عريب الحصاني
كله لعيني صيحت الاسلمية=دللت سيفي بي طوال الاذاني
وشوااللي يحرم دمكم بالضحية=وحنا يحلل دمنا برمضاني
والخالدية هي مرة ابن سليم عبدالله بن سليمان بن زامل [ ابن سليم ] أمير عنيزة
وهذا اللي خلى عبدالله يقصد قصيدته يسند على فيصل ابن تركي ابن سعود .. اللي منه ..
ركبوا على عوص النجايب رجاله =ويبرا لهم(يابو سمي) كم خيال
جوه الضحى ياشيخ ماهي نطاله=وساروا لما رادوا على كل مشوال
هذاك حق اللي لخطوطك عصا له=فرحان وابن سبيت ماالقاهم البال
يوم الخطوط أقفت وجت ما قرا له=جاه المقرّي والحق الأول التال
وعيا يودي ركبنا مع جماله=من عقب ماكزيت لك كل مرسال
وعيا يطيع الي ينصح حكي له=وأزريت من كثر الشكاوي والارسال
وعادات فعل الزور باللي مشى له=يرميه بالميدان من غير خيال
شف حالف بالزور شف وش جرى له=ياعونة الله مامن الحي عفال
يوم انهم عجزوا عني بالغياله=شبوا لنار الحرب بالقيظ صوال
ومن شب نار(ن)حرقه باشتعاله= وصارت عقوبة فاعله ذلّ واذلال
وان كان ما شافوا وعافوا نواله=وصاروا بقاياهم هذولاك جهال
فالسيف للتايه استاده حنا له= وندل به من هو عن الجاده مال
واليا كبا لونه محشناصقاله=ولاهو من القلطات والضرب ملال
وعبيد اللي لا عدمنا خياله=حطه لهم مولاي نجم(ن) وزلزال
هذي علوم ديارنا من صفا له=مشروب ماها الابقصاف الاجال
اليا ما صفت بالسيف ماهي جماله=وثنيت للرثاع بالقيد وعقال
ولانفوز الا ونروي سلاله =من دم هامات العدى عل وانهال
والمعذرة طولته عليكم بهالسوالف ..؟
لكن عذري ان الليلة خميس واراكم على خير ..
تحيتي