االابل عند شمر عند القبايل الاخراى قليله ماهو السبب؟؟

[الضويلي الغفيلي]

بسم الله الرحمن الرحيم



الابل جزء كبير الموروث الشعبي عند القبايل العربيه يقول الشاعر
يالله يا رب العباد المصلين ==انك تعز البل وناس ن قنتها
وانك تقبل دعوة المستغيثين == وترجع لها في ديرة ن داهلتها
ما سيل العارض الى حد يبرين ==لاقصا محيط الشرق هذي جهتها
مدهال ملحا طايرة شبح وذهين ==من طول غاربها وطول رقبتها
ملحا غشاها الملح والنور والزين ==من خفها لا راسها واشعفتها
تفرق على صيغة كبار العثانين ==بالخشم والخده وطول اسبلتها
عسماء يدين ن مثل وصف الموازين ==يعجبك ما طا خفها وعسمتها
الى وطت في الارض كن البراكين ==من ثقل ما طاها تفجر تحتها
فجحاء عريضة ساق في خفها قين ==تعجبك لا من دبرت بفجحتها
قطاعة الفرجه واهلها محيلين ==كم ديرة ن من ديرة ن قربتها
البل عطايا الله غناة المقلين ==لا ربعت في ديرة ن قبلتها
يا زينها لا جات من خايع ن زين ==وامست شباع وجات حل اثورتها
وقاموا لها رعيانها بالمواعين == وتحنطمت حيرانها لابهلتها
البل لها عند الرجال العزيزين == قيمه وعصمان الشوارب رعتها

للشاعر محمد بن مسفر بن قحيفان الدوسري



لماذا شعراء قبيلة شمر لايتغزلون في اابلهم وتراثهم القديم
كل مافتح التلفزيون اشوف جميع القبايل يتغنون في ابلهم الا شمر اثنين ثلاث
ليه ترا ما السبب

اليكم هذا المقطع اعجبني
http://www.youtube.com/watch?v=5QpvK1Bs93g

[المهندس الرااقي]

اشكرك اخي العزيز الضويلي ..







قد تكون هي وجهة نظر او طبيعة فكما ان شمر لاتجيد المناقز وسط المجالس (المحاوره ) و (الدحه ) وهي مع العلم موروث وجزء من تراث قبائل عديده اخرى ..





شمر مايميزها كثير عن القبائل الاخرى فمثلاً نحن نجيد السامري وغيرنا (لا ) وقس على هذا كثير ..وهناك تقارب بين كثير من لهجات القبائل وشمر لا لها لهجتها الخاصه ..






اما الابل فهي على صحوننا وعزايمنا غيرنا يستعرض فيها ويشارك فيها بمناسبات عديده ..مع العلم ان هناك الكثير من ابناء شمر يملكون الكثير من البل .







عموماً اشكرك ولاهنت

[اديب]

شكرا لهذا الطرح وانا معك:

والله اتوقع ان الجواب المناسب هو جواب راشد الاسعدي
راعي بقعاء اللي يرد على ساجر:
وتذكرلنا خذيت ذود من الخــــور..... جن من عمامك يالشجاع السنافى
ماهن حلال الشيخ ياتايه الشـــور..... حلالهم حدب السيوف الرهافى
حلالهم غوش السناعيس وحيـور..... مقيمات ماترحل وساع الخوافى
اللى نماها للمساييرمنثـــــــــــور..... زود على اللى قلطو بالصحافى
تحياتي

[الضويلي الغفيلي]

اخواني اشكركم على المرور
انا مااقول شمر ماعنده ابل لا بالعكس شمر عنده ابل نوادر مايملكه غيرهم
بس اقصد بالحضور بالقنوات الفضائيه

بالعربي كل مااشوف بالتلفزيون كلهم منقيه عتيبي دوسري سبيعي مطيري عجمي مري
(شمري مافيه الاواحد واسلمي بعد)

[ابو حارث المدعول]

اتمنى من الله انه لا يوجد شمرى يشارك فى المزاينات

لانها بصراحه فيها من الفساد والاسراف والتبذير وتبييض الاموال

الشى الكثير

اما بالنسبه لحلال شمر . اول الجيش ولذلك لكثرة مغازيهم

واما الشعر فكثير من شعراء شمر تغنو بالابل وعلى سبيل المثال فرحان الذرفى

فى قصيدته المشهوره والتى مطلعها

الله على اللى كنهن بالوصايف ..... جول من الكدرى تقفاه عقبان
والا الحمام اللى من الصقر خايف .... والا النعام اللى تنهض مسيان

[طلال الخريصي]

شكراً اخوي على الموضوع الهادف

وبصرحه أنا ماني مجاوب على سؤالك وسبب أنه جاوب
عليه واحد سهلي كان يعمل في حائل وسئل من غير شمر عن سبب
عدم عمل مزاين للبل عند شمر
وقل (شمر مزاينهم بدلال وعلوم الرجال والبل يقلطونها بصحونهم الكبار ) ويقصد بالكبار ان شمر موسعة الطعون كبار الصحون

وهذي يكفي وسالفه سولفها ودايم يرددها بالمجالس وهو شايب كبير وعلومه ترفع اراس
والبل من اول للحين غاليه على شمر وذبح الرجال دايم يجي حولها سوى ينذبحون عندها او طلابه لها
والحين بصرحه المهايط وغسيل الأموال هي السايده على الساحه وشمر عندهم نزهه عن الأشياء هذي وهذا الي ميزهم عن باقي القبايل مع حترامي الشديد لهم
والفخر بالكرم وذبح البل للرجال

[شغموم النماصي]

اشكرك اخي العزيز الضويلي ..







قد تكون هي وجهة نظر او طبيعة فكما ان شمر لاتجيد المناقز وسط المجالس (المحاوره ) و (الدحه ) وهي مع العلم موروث وجزء من تراث قبائل عديده اخرى ..





شمر مايميزها كثير عن القبائل الاخرى فمثلاً نحن نجيد السامري وغيرنا (لا ) وقس على هذا كثير ..وهناك تقارب بين كثير من لهجات القبائل وشمر لا لها لهجتها الخاصه ..






اما الابل فهي على صحوننا وعزايمنا غيرنا يستعرض فيها ويشارك فيها بمناسبات عديده ..مع العلم ان هناك الكثير من ابناء شمر يملكون الكثير من البل .







عموماً اشكرك ولاهنت



اضم ردي على الموضوع مع رد استاذي المهندس الراقي رد وافي وحكيم...يعطيك العافيه على المقطع وما شاء الله فحل الجنيدي مهو لعب الله لا يضره ما شاء الله تبارك الله

[ابو الهقايص]

اخي العزيز الغفيلي موضوع جميل ويستحق الرد والمتابعة وهو سؤال مطروح في كثير من المناسبات
من العديد من الاشخاص من غير شمر ومن شمر


واقول بما اني اعمل معلما فقد تعينت في مناطق عتيبه جنوب وفي احد الايام تكلم شخص من احدى القبائل وكان الموضوع عن الابل والمزاينات وكان يقول ان اهل الابل المزايين هم عتيبه والدواسر وقحطان وسبيع والعجمان ومطير وغيرهم
وقال ان اهل الشمال ماهم اهل ابل انما اهل نعيم وغنم وعرفت انه يقصد شمر لان علاقتي به مشوشه

فكان لزاما علي الرد لان احد الاخوان بادرني بذكر شمر وقال شمر عنهم ابل مجامله لي
فقلت؟؟؟؟؟؟؟
ردا على الاخ وهو من مطير وقلت
البدو يقولون(( البل ما تجي الا بالاحمرين)) الدم والمال
يوم كانت بالدم فحنا اهله والبل الزينه مكان يقناها الا شمر وكانوا يسمونهم هل البوش العفر
واجمل الابل الموجوده الان هي من ابل شمر وخاصة الوضح والشعل وهي اجمل الالوان المطلوبه الان وهذي هي ابل شمر في الماضي حتى انهم يسالون عن الوضح يقولون هي شمالية رمالية
وهذا شي معروف
لان رمان وهو من اجمل ابل الانتاج مصدره من شمر وكذلك زربول وهو عند عتيبه الان ومصدره من شمر وكذلك عليان وايضا ونقان هذي هي ابل شمر

واما الان فالكل يشتري حتى العجز
وخاصة القبائل القريبه من الاسرة الحاكمة يشرون بحلال ابن سعود ويهايطون بالقنوات
والا يوم الدنيا اخذ وماخوذ ما احد طلع الا بيمينه وشمر جار الزمن عليهم والابل الموجده مع الاسرة الحاكمة اغلبها ابل شمر واليوم عطوها خوياهم من مطير وعتيبه وسبيع والعجمان وغيرهم

وانتم تلاحظون ان اغلب ملاك البل من خوياء الامراء مثل فنجال الشيباني وهيف القحطاني وابن شري
وندا بن عشوان وابن هويدي وابن عتيق والفصام وغيرهم جميعهم من خوياء ال سعود
وهؤالاء هم من يستطيع شراء الابل الغالية اما بقية الناس فعلى قد حالهم
وشمر اغلبهم اهل ابل يقنونها ويقدمونها بصحونهم ما يهايطون به عند الناس

اول الوضح ما يملكها الا الشيوخ وهي ابل شمر واذا رجعت الى سلالات الابل لوجدت ان الوضح اصلها شمرية وكذلك الشعل
اتمنى اني افدتك بشي

[صقر الحويجة]

اخي العزيز
يقولونه اهل نجد مبطي
البل بالجنوب والرجال بالشمال

[الربع الرابع]

لو تلاحظ اخي الكريم مو بس قبيلة شمر بل حتي عنزة وقبايل الشمال بشكل عام ماعندها اي اهتمام حاليا بامتلاك الابل ومزاينها لانها يوم هي بالسيف والرمح وهم اهل الابل بس يوم تطورت الدنيا والناس هجرت البادية باعوا كل حلالهم للجنوبات اذكر ان جدي رحمه الله باع كل نياقه علي سبيعي فالمعروف ان الوضح والشعل هي ابل اهل الشمال شمر وعنزه ولكن الحين اصبح الدوسري والسبيعي والعتيبي والقحطاني والهاجري والمري يمتلكها مشترا فلوس وليس وراثه ابا عن جد.

معلومة: معظم كبار ملاك الابل حاليا والي مزعجين العالم بقنوات الصحراء والساحه هم من كان لايملك قوت يومه في يوم من الايام

[نـــــاايـــف]

البل عطايا الله غناة المقلين ==لا ربعت في ديرة ن قبلتها
وقاموا لها رعيانها بالمواعين == وتحنطمت حيرانها لابهلتها
البل لها عند الرجال العزيزين == قيمه وعصمان الشوارب رعتها


البل ماتردي ولاتعرف الردى.... لكن بها هلوس الرجال تبور

يعطيك العافيه ياالضويلي
لكن من مبطي وحنا نسمع البل جنوب والرجال شمال

لاهنــت

[عكاش العطاوي]

كل القبايل فيها حقها أما باالنسبه للشمر فهم غنيين عن التعريف في الماضي والحاضر يشهدلهم التاريخ وأناروقي عتيبي ماني بشمري لاكن كلمة الحق تنقال وشمر ماهي بحاجه للمزاينات ولا همتهم وأنا متأكد لو بغوها تبى تطلع البل الي عندهم ويمكن يغطي مزاينهم على مزاين عتيبه

[ابوباسل]

كل القبايل فيها حقها أما باالنسبه للشمر فهم غنيين عن التعريف في الماضي والحاضر يشهدلهم التاريخ وأناروقي عتيبي ماني بشمري لاكن كلمة الحق تنقال وشمر ماهي بحاجه للمزاينات ولا همتهم وأنا متأكد لو بغوها تبى تطلع البل الي عندهم ويمكن يغطي مزاينهم على مزاين عتيبه
عزيز اوغالي يالعتيبي 00ومشكور على هذا الثناء

[لعاب المنايا]

انا اشكرك لوجهة النضر المهمى لجميع شمر وشمر تركت الابل لدخولهم المدن ولئان كما ترون اسفل اسفلين يملك ابل ويتفاخر ويقول مورثة وهوا كا

[الضويلي الغفيلي]

مشكورين على المرور

[طنان]

والله والنعم بالقبايل العربيه كلها

واكيد كل القبائل كانت في السابق تمتلك ابل ولكن كميتها تختلف من قبيلة لاخرى

ودائما نسمع ان اهل الوضح هم اهل الشمال

واهل المجاهيم هم اهل الجنوب

ونسمع ايضا ان اهل الجنوب هم اهل الابل واهل الشمال هم اهل غنم

حتى ان اهل الجنوب ينظرون نظره دونيه لمن يملك قطيع كبير من الاغنام

سوا منايح قليله ليكرم بها ظيوفه

لانهم في نظرهم ان راع الابل يشد لمسافات بعيده بحثا عن المراعي فبالتالي هو شجاع لايهاب الاعداء

اما راع الغنم فهو دائما في مكانه ون شد لايبتعد كثيرا فهو في نظرهم غير شجاع

ولعل طبيعة الارض التي تستوطنها القبيلة تلعب دور في نوعية حلالهم

يعني مثلا قبائل العراق وسوريا تعيش على الانهر ومزارع وبساتين فتكون حياتها مستقره نوع ما لتوفر الخضره والماء الدائمين على النهر
فهي ليست بحاجه لابل كثيره عشان تشد عليها من مكان الى مكان

بينما قبائل نجد ليست لديها انهر وهي دائمة الترحال بحثا عن الربيع فلذالك يهتمون بتربية الابل لسرعتها في الشديد والانتقال من مكان الى آخر
والغنم تعيقهم في الشديد لبطئها في المشي فلذالك لايحبون اقتنائها

والله اعلم