ســؤال الي ابناء قبيلتي العزيزه قبيله شمر العريقه !!!!!

[عبـدالله الصفــوقي]

الاخوان الكرام في مقوله دائم نسمعها من شمر وغير شمر وهي تقول (( شمر خيار القوم لولا افعالها )) طبعا انا اعرف سبب التسميه الحقيقيه لكن ابي اشوف اراء الاعضاء لان في ناس كثير يقولها كصفه شينه للقبيله ولكن هي بالحقيقه صفه طيبه جدا


اللي يعرف يتكرم يشارك برايه واللي مايعرف يتفرج على الاراء

دمتم بود

[فديت فريس شمر]

الاخ عبدالله الصفوقي ..
لم نسمع في هذا البيت شمر خيار القوم لولاافعالها

قد يكون التبس عليك القول وهذا ماقيل في شمر



زوبع هلي غلبا هـلا العـف والنقـى==وشمـر خيـار القـوم شمـر ثقالهـا
شمـر هـلا الـردات شمـر بوقتهـم==شمـر علـى كـل القبايـل افعالـهـا

ابن محيا قال الابيات اعلاه يمدح شمر ولكن حرف بالابيات وشال شمر ثقالها ووضع لالا افعلها

يقول الشاعر العنزي ..
من عصر حاتم الطي لهم المجد عنوان=شمر خيار القوم واهل العطايا

ويقول الشاعر علي المحيا..


واعـزي الـروح الغريمـه بـودكـم==واقـول روح مضيعـه وش غدالـهـا
ماهـو ردى فيكـم ولا اسـب فعلكـم=يـا لعنبـو نفـس(ن) غواهـا بحالهـا
قلته وانـا راسـي تزايـد بـه الطنـا==ومن سيد كـل النـاس ماهـم رذالهـا
أنا لابتي هـم خيـرة الخلـق والبشـر==عقب الصحابـه لابتـي هـم اجزالهـا
زوبع هلي غلبا هـلا العـف والنقـى==وشمـر خيـار القـوم شمـر ثقالهـا
شمـر هـلا الـردات شمـر بوقتهـم==شمـر علـى كـل القبايـل افعالـهـا
ولو هي تعود امجـاد شمـر وعزهـا==شمـر علـى كـل الخلايـق ظلالهـا
شمر هلا النوهات شمرهـلا الخطـى==شمـر طنايـا طـي شمـر اجبالـهـا
شمر اعفاف العرض شمر هلا الخـوي==الفكر صخرهـا ولا احـد(ن) قوالهـا
من غير قاصـر بالقبايـل وحضرهـا==منهم مثل شمـر علـى مـا مضالهـا
إذا الناس ارض(ن) وهم شمر رجومها==ومهما زمـوا بالـزود شمـر اجبالهـا
وإذا الناس غيم(ن) زام واستنزل البـرد==شمـر بحـر مـا ضايقـه باحتمالهـا
وإذا الناس غيم زام بالجـو وانتهـض==شمـر نجـوم ولا وصـل مستوالهـا
والله لـولا لابتـي ضـايـع الـوفـا==ومحمـد العونـي سبقـنـي وقالـهـا
ويقـول فجحـان الفـراوي بجودهـم==منهم مثل شمـر رخيـص(ن) حلالهـا
أحبـهـم واحــب منـهـو يحبـهـم==وابغض من ابغضهـم ولانـي بحالهـا
ويامـن يهجعنـي ويجبـر مصيبـتـي==ويامـن يـرد للنفـس معنـى سؤالهـا


ويقول غالي بن جلفيف بن عايد الذايدي العنزي..


ساعة دعوني للحفل جيت عجلان=أباء اتشرف في وجيه الطنايا
قبيلةٍ عند القبايل لها شان=أهل الصخا والجود وأهل الحمايا
شمّر هل العادات ذربين الأيمان=أهل السلوم الطيبه والسجايا
شمّر صناديدٍ وبالحرب شجعان=وأفعالهم تاريخ ماهي حكايا
شمّر ليا ركبو على الخيل فرسان=وجموعهم المعركه ماتنايا
الله اكبر يازمانٍ لهم كان=مقل القمر من فوق كل البرايا
طليفيح حكمه عم حضرٍ وبدوان=ومع جمعهم تمشى سهوم المنايا
من عصر حاتم الطي لهم المجد عنوان=شمر خيار القوم واهل العطايا
وحنا لنا معهم معرفه وصدقان=صدقان انصادقهم بحسن النوايا

[محمد السنجاري]

تم نقل الموضوع الى مكانه الصحيح

[خالد الصقري]

اشكر صاحب الموضوع على الطرح
ومشكوووور اخوي فديت فريس شمر على الرد الوافي
دمتم بود

[ابو حارث المدعول]

اخى عبدالله الصفوقى

لو ذكرت ماتعرفه لكان افضل

اما بيت الشعر فهو معروف

شمر خيار القوم لولا فعاله.. ماطلع من طيبٍ يذبحونه

[نـــــاايـــف]

الاخ فديت

هاالبيت هذا موجود واكثر مايسالنا عنه الاجناب
وكمل الباقي الاخ ابو الحارث
ماطلع من خير(ن) يذبحونه
ورايي مع راي الاخ الصفوقي

تم تعدل مشاركتي
لانني لم انتبه لرد ابو الحاث

[شمر اولا و اخيرا]

بإختصار شمر يتسابقون على الطيب

وهو تشبيه من الشاعر لطيب شمر لأن كلن يبي يصير اطيب من الثاني ولذلك يتذابحون بينهم لأجل الطيب

[نـــــاايـــف]

الله الله

[ابو حارث المدعول]

شمر خيار القوم لولا فعاله ... ما طلع من طيبٍ يذبحونه

معنى البيت

ان شمر خيار القوم وهاذى فعاله ماطلع من طيب من القبائل الاخرى يذبحونه

والمعنى الاخر .. اذا طلع منهم فارس او شجاع فهم يكثرون من مدحه والاستعانه به
فى جميع معاركهم حتى يسوق نفسه للمهالك ويقتل


اما ماذكره شمرى حقانى فهو غير صحيح
فشمرفيها من الحميه على بعض رغم خلافاتها مايضرب به المثل
فكيف يغارون من بعضهم

[صقر الحويجة]

اخي العزيز الصفوقي
البيت يدل على ان شمر تغار حتى من بعضه
يعني الحين عندنا ابو الحارث المدعول من خيره الناس ونغار منه لذلك نتمنى ندعله ونخلص منه
ولك كل الود

[عزالرفيق]

شمر خيار القوم لولا فعاله ... كل ما طلع من طيبٍ يذبحونه

[ابو حارث المدعول]

اخي العزيز الصفوقي
البيت يدل على ان شمر تغار حتى من بعضه
يعني الحين عندنا ابو الحارث المدعول من خيره الناس ونغار منه لذلك نتمنى ندعله ونخلص منه
ولك كل الود


؟؟؟؟؟؟؟؟؟

[عبـدالله الصفــوقي]

1 \ بالنسبه للاخ (( فديت فريس شمر )) اقول اذا ماسمعت هذا البيت هذي مشكلتك بس
مو معناها ان البيت غير صحيح واشكرك على نقل القصايد والف نعم بالشاعر علي
المحيا (( ابوخالد )) والف نعم بالشاعر غالي الذايدي (( ابو حبيب ))

2 \ بالنسبه للاخ نايف اقوله نعم كلامك صحيح دائما الاجناب يسالون عن هذا البيت
وللاسف الشديد الكثير من ابناء قبيله شمر لا يعرفون معنى هذا البيت ولهذا السبب
طرحت الموضوع للتوضيح لابناء القبيله لكي يعرفون المعنى الحقيقي لهذا البيت
ولا يظنون انها مسبه للقبيله

3 \ وبالنسبه للاخ ابو حارث المدعول اقوله بيض الله وجهك وكلامك هو التفسير الحقيقي
لهذا البيت المذكور

وللتوضيح اكثر هذه المقوله (( شمر خيار القوم لولا افعالها -- ماطلع من طيبن يذبحونه ))يقولها القبائل الاخرى على قبيله شمر بسبب ان قبيله شمر في عصرها الذهبي كانت عندما تشن الحروب والغزوات على القبائل الاخرى كانت االنتيجه ان قبيله شمر تقتل شجعان وفرسان القبائل الاخرى بالمعركه وتنتصر باغلب معاركها فكان خصومهم يشهدون لهم بالافعال الطيبه (( عادة طيبه عند العرب سابقا )) لكن يتاسفون على قتلاهم الذي قتلوا بالمعركه مع شمر. هذا هو المعنى الحقيقي ولهذا اردت التوضيح


اشكر كل من شارك بالموضوع

[طلال العلي]

(والمعنى الاخر .. اذا طلع منهم فارس او شجاع فهم يكثرون من مدحه والاستعانه به)....هذا هو الجواب الذي لاغبار عليه وهو المقصود بقول الشاعر

[بنت الزوبع]

الله يعطيكم العافيه
وصحت يمناكم ولاهنتوا


قبيلـةٍ عنـد القبايـل لـهـا شــان..أهل الصخا والجود وأهـل الحمايـا
شمّر هل العـادات ذربيـن الأيمـان..أهـل السلـوم الطيبـه والسجـايـا
شمّـر صناديـدٍ وبالحـرب شجعـان..وأفعالهـم تاريـخ مـاهـي حكـايـا
شمّر ليا ركبو على الخيـل فرسـان..وجموعـهـم المعـركـه ماتـنـايـا

[شغموم النماصي]

يعطيكم العافيه