النبيجاني2006
2006-07-22, 01:32 AM
--------------------------------------------------------------------------------
سالفة دغيشم بن عيادة امير الجحيش مع فنيخ ابا الميخ
--------------------------------------------------------------------------------
كان دغيشم ابن عيادة امير الجحيش من الاسلم صاحب شجاعة وكرم ومشهور بافعاله الطيبه وكان دايم يعزب عند الابل من شجاعته وخوفه عليها وكان عنده فرس اصيله اسمها الكحيلة واذا ركبها يبتعدون عنه الفرسان خوفا منه.
في يوم نزل بالقرب منه الشيخ فنيخ ابا الميخ شيخ عبدة من شمر فذهب دغيشم كعادته يعزم فنيخ وكان الشيخ فنيخ يسمع عن دغيشم علوم طيبه وكان يحب يشوفه ويقابله لما يسمع عنه من علوم ترفع الراس وكان يسأل عنه وهو ما يعرفه شخصيا. لكن الشجاع له قيمه عندهم وكان عند الشيخ فنيخ بنت اخوة متوفي وهي عند عمها .
المهم يوم قرب دغيشم من العرب قال الحاضرين اللي عند فنيخ هذا دغيشم اللي تسأل عنه فقام من مجلسه واستقبله خارج البيت وهو بالعادة ما يفعلها الا لرجل يستحق وله مكانه وقدر اما فارس او امير.
البنت كان اسمها حدوى يوم شافت عمها قام واستقبل الرجال عرفت ان الرجل هذا له مكانه وهو كان وسيم وجميل وعرفت انه دغيشم وظنت انه يريد يخطبها من عمها لكن دغيشم يوم خلص من ظيفتهم وعزمهم طلب احضار فرسه وعرفت انه ماخطب فاخذت حبل كأنه تريد تحطب وسبقته بالطريق يوم مرها قالت عساك ادركت مطلبك قال وشهو قالت سمعت انك تخطب حدوى وهي كل هالمدة تنتظرك ومنعت الخطاب قال وصفيها لي قالت مثلي واجمل فطمع دغيشم بالجمال ورجع عليهم وقال ياشيخ انا جيت لحاجة وكنيتها في نفسي قصدي ارسل غيري لكن الحين اكلمك من الراس للراس وخطب منه فقال فنيخ ابرك ساعه وانت عندنا غالي لكني مقلدها امرها ما اجبرها على احد ولازم اشاورها . سال البنت ووافقت وزوجهم بليلتهم .اهل دغيشم كانو يعتقدون انه معزوم. المهم في صباح العرس حصل على اهل البنت كون اغار عليهم قوم وفزع الشيخ فنيخ وربعه لفك ابلهم ودغيشم جلس عند زوجته قالت ليه ما تفزع مع اهلي قال ما عندي فرس قالت وفرسك الكحيلة قال هذي مقدمها مهر لك واخاف انها تذبح وهي تحتي وانا ما امون الا عليك قالت الفرس من حقي وانا وهي لك مير افزع مع ربعك وركب في اثرهم وهي شدة على جملها واخذت معها ماء وكانت خايفه عليه لا يذبح لان زوجها الاول في صباح العرس فزع مثل هالمفزاع وذبح . المهم انها تبعتهم . دغيشم فعل فعل تنومس فيه وقيل ان عدد الخيل اللي قلعها من الاعداء عشر من الخيل وكان هو سبب فك الابل وكسر القوم المغيرين والبنت كانت على اثرة وكل ما لقت خيل مع الرعيان اخذتها ويوم انتهت المعركة قابلته واسقته من الماء ورجعت هي وياه ومعهم الخيل القلايع ؟؟
وبات عندهم ثاني ليله وفي الصبح ذهب متسللا على اقدامه نيته الخيل القلايع وفرسه الكحيله لهم . وكانوا اهله قريب منهم ومادروا عن زواجه وسألوه عن تأخرة فقال كسبت لكم حرمه وسقت الفرس لهم . وارسل لهم ثلاثين ناقة وهذي تدفع امام الناس لكنها ترد فيما بعد
فقام الشيخ فنيخ ورد عليه فرسة والقلايع وقال حنا يكفينا حلالنا اللي فكه لنا من القوم وردوها عليه مع الحرمه . دغيشم اخذ فرسه ورد عليهم القلايع وقال هذي تقسم على الربع الذين حضروا المعركه
هذي من عوايدهم وكرمهم وطيبهم
يدل على السالفة قول الشاعر
ما كل من سير كسب فود وامداح ..شروى دغيشم يوم سير على فنيخ
شاف الجمال ورد من عقب ما راح..خطب وملك له على بنت ابالميخ
والصبح جا كون على المال وصياح ..ضرب الهنادي له ضريس وتصرخ
ركب الكحيله واحتسى القوم بسلاح ..وفعل فعولن تنكتب بالتواريخ
-------------------------------------
مــــــــــــــــــــــــنـــــــــــقــــــــــــ ــــــــــــووووووووووول
سالفة دغيشم بن عيادة امير الجحيش مع فنيخ ابا الميخ
--------------------------------------------------------------------------------
كان دغيشم ابن عيادة امير الجحيش من الاسلم صاحب شجاعة وكرم ومشهور بافعاله الطيبه وكان دايم يعزب عند الابل من شجاعته وخوفه عليها وكان عنده فرس اصيله اسمها الكحيلة واذا ركبها يبتعدون عنه الفرسان خوفا منه.
في يوم نزل بالقرب منه الشيخ فنيخ ابا الميخ شيخ عبدة من شمر فذهب دغيشم كعادته يعزم فنيخ وكان الشيخ فنيخ يسمع عن دغيشم علوم طيبه وكان يحب يشوفه ويقابله لما يسمع عنه من علوم ترفع الراس وكان يسأل عنه وهو ما يعرفه شخصيا. لكن الشجاع له قيمه عندهم وكان عند الشيخ فنيخ بنت اخوة متوفي وهي عند عمها .
المهم يوم قرب دغيشم من العرب قال الحاضرين اللي عند فنيخ هذا دغيشم اللي تسأل عنه فقام من مجلسه واستقبله خارج البيت وهو بالعادة ما يفعلها الا لرجل يستحق وله مكانه وقدر اما فارس او امير.
البنت كان اسمها حدوى يوم شافت عمها قام واستقبل الرجال عرفت ان الرجل هذا له مكانه وهو كان وسيم وجميل وعرفت انه دغيشم وظنت انه يريد يخطبها من عمها لكن دغيشم يوم خلص من ظيفتهم وعزمهم طلب احضار فرسه وعرفت انه ماخطب فاخذت حبل كأنه تريد تحطب وسبقته بالطريق يوم مرها قالت عساك ادركت مطلبك قال وشهو قالت سمعت انك تخطب حدوى وهي كل هالمدة تنتظرك ومنعت الخطاب قال وصفيها لي قالت مثلي واجمل فطمع دغيشم بالجمال ورجع عليهم وقال ياشيخ انا جيت لحاجة وكنيتها في نفسي قصدي ارسل غيري لكن الحين اكلمك من الراس للراس وخطب منه فقال فنيخ ابرك ساعه وانت عندنا غالي لكني مقلدها امرها ما اجبرها على احد ولازم اشاورها . سال البنت ووافقت وزوجهم بليلتهم .اهل دغيشم كانو يعتقدون انه معزوم. المهم في صباح العرس حصل على اهل البنت كون اغار عليهم قوم وفزع الشيخ فنيخ وربعه لفك ابلهم ودغيشم جلس عند زوجته قالت ليه ما تفزع مع اهلي قال ما عندي فرس قالت وفرسك الكحيلة قال هذي مقدمها مهر لك واخاف انها تذبح وهي تحتي وانا ما امون الا عليك قالت الفرس من حقي وانا وهي لك مير افزع مع ربعك وركب في اثرهم وهي شدة على جملها واخذت معها ماء وكانت خايفه عليه لا يذبح لان زوجها الاول في صباح العرس فزع مثل هالمفزاع وذبح . المهم انها تبعتهم . دغيشم فعل فعل تنومس فيه وقيل ان عدد الخيل اللي قلعها من الاعداء عشر من الخيل وكان هو سبب فك الابل وكسر القوم المغيرين والبنت كانت على اثرة وكل ما لقت خيل مع الرعيان اخذتها ويوم انتهت المعركة قابلته واسقته من الماء ورجعت هي وياه ومعهم الخيل القلايع ؟؟
وبات عندهم ثاني ليله وفي الصبح ذهب متسللا على اقدامه نيته الخيل القلايع وفرسه الكحيله لهم . وكانوا اهله قريب منهم ومادروا عن زواجه وسألوه عن تأخرة فقال كسبت لكم حرمه وسقت الفرس لهم . وارسل لهم ثلاثين ناقة وهذي تدفع امام الناس لكنها ترد فيما بعد
فقام الشيخ فنيخ ورد عليه فرسة والقلايع وقال حنا يكفينا حلالنا اللي فكه لنا من القوم وردوها عليه مع الحرمه . دغيشم اخذ فرسه ورد عليهم القلايع وقال هذي تقسم على الربع الذين حضروا المعركه
هذي من عوايدهم وكرمهم وطيبهم
يدل على السالفة قول الشاعر
ما كل من سير كسب فود وامداح ..شروى دغيشم يوم سير على فنيخ
شاف الجمال ورد من عقب ما راح..خطب وملك له على بنت ابالميخ
والصبح جا كون على المال وصياح ..ضرب الهنادي له ضريس وتصرخ
ركب الكحيله واحتسى القوم بسلاح ..وفعل فعولن تنكتب بالتواريخ
-------------------------------------
مــــــــــــــــــــــــنـــــــــــقــــــــــــ ــــــــــــووووووووووول