مشيتْ عقب العصر في حيٍ قديمْ = اكثر بيوته شفتها متهدمات
من بينها راعيت لي بيتٍ سليمْ = ماغير منهدٍ ببعض الزاويات
دارت بي الدنيا وانا رجلٍ فهيمْ = رجَعْ شريط العمر بي للذكريات
تخيلتهم جلوسِ في ليلٍ عتيمْ = معهم سراج صغير انواره خافتات
متحلقين ووسطهم واحد زعيمْ = في هرجه الحكمة والخبرة واضحات
كلامه نافذ بينهم رايه حكيمْ = يحثهم على فعولٍ طيبات
وإن قال رايه دايماً وسط الصميمْ = تسمعه عياله دون اي معارضات
وين الرجال والصغار والحريمْ = ياما ملوها في سنينٍ ماضيات
كم واحد فيما مضى فيها مقيمْ = ارواحهم باللي مقدر قانعات
كبيرهم لصغيرهم قلبه رحيمْ = قلوبهم مع بعضهم متوالفات
حتى الصغيٌر للكهل دايم حشيمْ = يفز لادعاه لو هو في سبات
لو شفتهم تقول عيشتهم نعيمْ = الضيف وإن جاهم يعيش بمكرمات
الموت ما خلا صحيحٍ اوسقيمْ = مايمنعه حتى القصور الشامخات
اجيال قفت عند خلاقٍ عليمْ = رضيو بعيشتهم هممهم عاليات
راح الخيال وقلت ياالله ياكريمْ = تغفر لهم ذنوبهم والسيئات
ذي حالها زواله وافهم ياغشيمْ = حافظ على دينك وقم بالواجبات
احرص على الطيب وخله لك نديمْ = اللي يعينك للفعول الصالحات
ياالله انا طالبك ياالرب الحليمْ = ترحم عبيدك مسلمين ومسلمات

مريت بابٍ للمحبين مقفول=جابتني القدرة على حد بآبه

له مدةٍ بالسوق ماشيف له زول=وبابه عليه من السوااافي اترابه!

حياك الله اخي الغالي ابوطارق

صح بدنك والله يعافيك لك خالص شكري لمرورك العطر وردك الرائع وتقييم وثبيت الموضوع

جعلنا الله وإياك من المقبولين عتقاء النار في هذه العشر المباركة

خالص الود