ياشين علمٍ بالصحافه قريناه=ياليت ماجابوا عليه الدلايل
وياليت ماوسط المجالس سمعناه=ولالفوا به ناقلين الرسايل
لكن قـدر ..والوقت ياكبر بلواه=والوقت فيه من البلا والهوايل
غاب القمر عنا ونوره فقدناه=وماباليدين حلول والوقت مايل
راح الامير اللي ينومس بطرياه=طلال راع المرجله والجمايل
نسل الحرار اللي لهم يالعرب جاه=ال الرشيد منزحت كل عايل
اهل الفعايل والسيوف المحناه=تشهد لهم بالفعل كل القبايل
تاريخهم ما أظن الايام تمحاه=والوقت يحفظ ذكرهم والفعايل
وطلال ماننلام لامن بكيناه=نبكي افراقه وازرق الدمع سايل
وتبكيه شمر والمناعير تنعاه=وسلمى ..وجا ..تبكي وضلعان حايل
واقول يستاهل اليامن رثيناه=طلال شوق اللي تكد الجدايل
مرحوم ياحرٍ بعيدٍ معشاه=تـدمي مخاليبه نهار الصمايل
وادعي عساها جنة الخلد ملفاه=في جاه رب البيت منشي المخايل
وصلوا عدد برقٍ سرى وانتثر ماه=على الرسول اللي دعا للفضايل