يا الله بسيل يابس الأرض دشه=دشّة شعيب فايضٍ مع عواريض
يسقي ديار قاطع الغيم طشّه= جذوع الشجر من جاير الوقت به بيض
وصلف الهبايب من العواصف تمشّه= تقل الرياح المرسلة نايشه غيض
جواري الأيام كلٍ تغشّه= ولا ينتعدل جور الأيام يا معيض
يا الله عسى شر الليالي وغشّه= بعد النجوم الساريات اللواميض
هواجس الأحداث بالناس غشّه= خشة نعاس غمّض الجفن تغميض
دنيا على روس الأوادم تمشّه= تلعب طرب وجسام غيره مماريض
مكاويه في حامياتٍ تهشّه= سود جروحه والمكاوي مناجيض
جيلٍ تنمي به وجيلٍ تحشّه= تلحق على طول الزمن بالمراكيض
سمّه وحسده بالأوادم تفشّه= مهما صفن مشاربه لك مخاويض
تضحك بوجهٍ لك ضحوك تبشّه= تمنّيك بوهام وتخفي ملا حيض
تقطع وتأصل وكل ساقط تلشّه= ولا فوضت غيره بالأنجاز تفويض
كوارثه سحب على النّاس رشّه= تمطر ولوهي بكنّة الصيف والقيض
رمحه مسمم قاتل في مخشّه= عليه من لحم المعادي لعافيض
= شعر/ بهلول حمدان الشمري