معك يزين الهرج وإيا السواليف = ياغايتي يامطلبي ياغناتي
تستاهل القيفان ماهيب تصفيف = زولك يخيّل لي ولو بصلاتي
مَعْك العواطف صدق ماهيب تزييف = يااللي جمالك فاق كل البناتي
دخلت بحر الحب من دون تجديف = من زود ملحه ضاع طعم الحلاتي
اعيش جوك في شتاء كان اوصيف = يانهر عمري يامسيل الفراتي
الفكر شوش يلزمه زود تعريف = حبك مسح مافات من ذكرياتي
وردة طبيعية ولاهيب تجفيف = يازين قطفك لو حَلَمْ في المباتي
اشتاق لك شوق العرب دلة الكيف = وشوق الصغير بإسم امه يتاتي
ياكاملٍ باالحسْن فاق التواصيف = الله يحقق لي جميع امنياتي
( ابو ناصر المحرج )