(الغياب)
المعذره يا لايمي كنت غايب
عشرين عام وكثرهن و أبعد الشوح
غريب والدنيا محطة غرايب
متناقضات الكون تظهر على اللوح
اشوف في وجه الزمان العجايب
كنه يقول العدل ماهوب مسموح
خطوة عنا ياما لها من سبايب
باب الشقا لمشتّت الفكر مفتوح
فرعون فكري بين عاصي وتايب
يدخل مجال الخوف ويهدّد الروح
غصناً تعبّث فيه هوج الهبايب
مثلي وانا من جور الايام مجروح
اكفّن الاحلام وادفع ضرايب
وألبس ثياب الصمت عن خاسر البوح
لو ما تثير الناس عوج الطلايب
وش يجعل الهقّاز يسند على الدوح
ياطير ابن برمان ويش انت جايب
نبي السلامه مانبي منك مصلوح
وشلون تنفع وانت عوق الركايب
وصف الردا على محيّاك مشروح
بعض الكلام اللي لمعناه صايب
جمرة سبيل مضيّع التتن مشفوح