ديوان خضير الصعيليك الاسلمي الشمري ّيرحمه اللهّ

السلام عليكم

مساء الخير

هذه بعض قصايد خضير الصعيلك وارجوا منكم من عنده شي لشاعرنا لايبخل علينا ومايحتاج توصيه


تعريف عن الشاعر خضير الصعيليك

هو : خضير بن منّاع الصعيليك المعضادي الاسلمي الشمري .

يتيمز شعره بقوة المعنى و دقة الالفاظ . و يعتبر في وقته شاعر قبيلة شمر فقصائده الحربية التي سنذكرها من الدوافع الرئيسية لاثارة الفزعة لدى القبيلة . توفي رحمه الله في المدينة المنورة .

===================

يقول خضير الصعيليك بالامير محمد العبدالله بن رشيــد:



مـزن نشـا بـه ريبـة وارتـهابه
========= من ريبته كل الخلايق مريبيـن
مخايل شرب الحمر من سحابه
======== كم من الصافي على مشرع زين
البرق يبرق والرعـد لـه ضبابـه
======== هلّت على ابن حميد هو والشيابين
حقّت ولابقّت جـداه إنصبابـه
======= على مغاتيـر الشيـوخ القديميـن
ما قلتها بك يابن فيصـل سبابـه
====== حسن تدبير الولي بيـه راضيـن
يوم انها ذري ٍهبوبـه ذرى بـه
======= و انتم لكم كل القبايـل مطيعيـن
و يوم انها سكـن هبوبـه و عابـه
======= الله حريب و مهزلٍ يا مساكيـن
سبحان رافع بابـة ٍ فـوق بابـه
======== و هكع عقب للي بالأدراج عالين
نجد من المولـى قضبنـا نصابـه
======= لمحمد ٍ و حمود مـا بـه تظانيـن
محمد بضرب السيف ما ينهقى به
====== عليه ابا زيـد يلحّـن تلاحيـن
محمد بنى صيوانكم و أرتكـى بـه
======= مثل الفهد صكّت عليه الغلاميـن
صكوا بضاري الهيش حام القرابه
====== لبّاسة الجوخ الحمـر و التواميـن
و بيضٍ شكن حر اللهب سد بابه
====== يلعب بها الشطرنج بوسط الدواوين
من مال شيخ ما يدور البقـا بـه
====== حطّاط غالي الزاد فوق المواعيـن
له هدة ٍ خيل المعادي عثـى بـه
====== تلقى به الطوعات مثل الحراذيـن
تقدمـت غلبـا سـواة الذيابـه
======= شمر هل العادات ما هـم ذليليـن
لا البرذويل ولا بجيـل الصحابـه
======== و لا البرذويل ولا بجيـل المتلِّيـن
و لا اللي بنى بيت الشعر بي طنابـه
======= و لا اللي بنى بيت المعزّه هل الطين
الضاري الضرغام و إن عض نابـه
======= مدمي المخالب من فنادِ المعاديـن
و أخوه ابو ماجد على كـل بابـه
======= قوّك يا شيخ الصخى منقع الليـن
بجاه الولـي و محمـد و الصحابـه
======== و اهل الكهف و اللي بالألحاد غافين
و بجاه من لـه طلبـة ٍ مستجابـه
======== ربي هو العـلاّم عـدل الموازيـن
في ستة ايـام حصاهـا حسابـه
========= متكوّن و أمره على الكاف ما عين
و من مطلع البيضاء لغربـي مغابـه
======== تغاب و لا تطلع على مثلكم شيـن




وله ايضا بالامير محمد العبدالله


سبحان من يفعل و هو ربـي العلـى
======== عجل الفرج للعين بإغضـاة موقـه
عالم دبيب الذر فـي ليلـة الدجـى
======== عالـم خفيّـه مـا تحتهـا و فوقـه
بأمـره و تدبـاره و عـزّه و وليـتـه
======== مع ابرك الساعات ما احلى وفوقـه
اللي صخر من باب صنعاء الى الجبل
========= للشام يمشـي ختمنـا مـا يعوقـه
بسعـود زيـزوم الطنايـا محـمـد
========= ربي نوى لـه رحمـة مـن وفوقـه
مزن ٍ نشى يرعـد و قطّـنٍ مخايلـه
======== وقّـع لـه الأولـى تدانـى لحوقـه
بروقـه القصديـر و رعـوده الـدواء
========== و الهنـد و الجوهـر ملاعـج بروقـه
هلّت و هلّت و إستهلّت و هلهلت
========= و هلّت على حمر الطياقي حقوقه
و صبّت و اصابت و إستصبّت و صبصبت
========== و صبّت عليهم من دحاريـج موقـه
و سقنا و ساوقنـا و سيقـوا و ساوقـوا
======== من ضرب مدناة القناء مـن عروقـه
و رجنا و روّجنا و راجـوا و روّجـوا
========= و جاهم من الغربـي ريـاحٍ تسوقـه
و اقفـوا و قفّـوا و إقتفاهـم محمـد
======== فهد الزراج الـى عثـى بـي فروقـه
حلف بهم بالسيف قلبه من الغضـب
======== مناكـب الهنـدي قليـل عتـوقـه
حميـر هكـر و بالمعـاذر مغفّلـة
======== تدانـت و قـراد عسـوا يسـوقـه
جوكم كرام الضيف صلّوا و سبّحـوا
========== يا مضيّعة للضيف واجـب حقوقـه
سقاكم عقب السكِّري حنظل الشرى
========== ما تف فـي كفّـه وسـاع فتوقـه
و انا اذكر الله و الصلاة علـى النبـي
========== اعداد ما غابـت و يطلـع شروقـه





و له في مدح فارس بن صفوق الجربا و تعتبر اجمل ما قيل في المدح :


يا شيخ انا جيتك على الفطّر الشيب
========= قـزّان مـن دار المحبيـن دبّـاب
دبـاء علـيّ و دبّ منـي بتقريـب
========== قل المواشي يـا ذراء كـل من هـاب
من دارنا جينـا لـدارك مغاريـب
======== يمّـوم نجـمِ لا تغيّـر و لا غـاب
متخيرك يا منقـع الجـود والطيـب
========= لا خيّب الـله للاجاويـد طـلاّب
سلام من قلبٍ محـبٍ بـلا ريـب
========== له يستتبّ الشاب و يشبّ من شاب
يالجوهر الناريز يالعطـر يالطيـب
========= يالصعل يالصهّال يا حصان الاطلاب
يالزير يالزحّـار يالنمـر يالذيـب
======== يالّليث ياللاّيوث يالشبـل يالـداّب
يالضاري الضرغام عطب المضاريب
========= يالفرز يا مفراص ضده و الاجنـاب
يالنّادر الهيلـع عقـاب المراقيـب
======== يا نافلٍ جيلـه بعيديـن و أقـراب
نطّاح طابـور العساكـر إليا هيـب
========== ستر العذارى لا غشى الزمل ضبضاب
عيبك الى من قالوا الناس بك عيـب
========== بالسيف لأرقـاب المناعيـر قصّـاب
و عيبك الى من قالوا الناس بك عيب
======== للسمن فوق مفطّح الحِيـل صبّـاب
و ذبح الغنم و الكوم حرش العراقيب
======== و أعطى المهار و بذل مالٍ بلا حساب
و بك شارةٍ كب الفـراد المحاديـب
========= و بذل الطعـام و للتنافيـل كسّـاب
و نمـراء تجـرّه للعـداء و الاجانيـب
========= تفجاء بها غرّات ضـدّك بالاسبـاب
و من عقب ذا بالعون مابك عذاريب
======== احلى من السكّر على كبد شـرّاب
جيناك فوق الهجن شيب المحاقيـب
======= لمشاهدك يا شوق وضّـاح الانيـاب
الحر يضرب بالكفـوف المعاطيـب
========== و التّبع قناصه من الصيد مـا جـاب
و انت الذي تافي بكـل المواجيـب
========= كنك هديب الشام بالحمِل عتّـاب
تثني لابو صلفيـق ما بـه تكاذيـب
========= شيخ الصخى معطي طويلات الارقاب
ياما عطيت اللي يجونـك طلاليـب
========== كم واحد جاء لك من الوقت منصاب
و فرجت همّه في كبـار المواهيـب
========= من عيلمٍ يزمي كما يزمـي الـزّاب
عز الله انك طيب و تفعـل الطيـب
======== و الطيب يجنى منك يا زاك الانسـاب
و لا هو كثيرٍ يا مهـدي الاصاعيـب
======= أفعالكم يعـدّه اللـي بالاصـلاب




و له في مدح اباذراع من شيوخ السهول و اسمه ظاهر ابا ذراع :


يا راكب من عندنا فوق منجـوب
======== منجوب مندوب سـرى ما يهيبـي
تدني تدنى صحح البيـد بقـروب
========= تدنـي لمدنيهـا بعيـد الغريـبـي
تفزيز يشبوبٍ من الملـح مرعـوب
========== شاف المبندق و ارتكـى بالهذيبـي
حمراء من العيرات ياوي مركـوب
========== لا هي بلا بكرى و لا هـي منيبـي
اليا روحت دو من البعد مهيـوب
======== تهرف كما يهرف مع الدو ذيبـي
عينه خلاص النار بالكير مشبـوب
======= بيديـن بيطـار يفـح اللهيـبـي
اليا شدّها الانمر بالاصباع مقلـوب
======== سيلٍ تحدّر مـع مضـكّ الشعيبـي
كالجوذره خمّه من الشرق حاطوب
======= زين الولاء عدل المناكـب ربيبـي
يا رسل اليا بانت لك الشمس بغروب
======== يدعيك بيت و الدخن تقـل سيبـي
بيت السعد في عالي المجد منصـوب
======= عـدّه لبو لـزّام ريـف النجيبـي
تلقاه مثل سهيل ما فيـه عـذروب
========= وسلّم على الممدوح سقم الحريبـي
الشيخ مثلك يابو لزّام محسـوب
======== ليث اليا كثـرت همومـه يطيبـي
رسالة تنصاك من غيـر معتـوب
========= نصيحـة كـان النصايـح تثيبـي
اصبر عن الغالي كما صبرت ايوب
========== و لا شـيٍ الا بالبخـت و النصيبـي
و ما دبر المولى على العبد مكتـوب
========== و ما صاب صاب و ما خطا ما يصيبي



و هذه قصيدته في فخذ العبيات من قبيلة مطير حيث نزل على الشيخ مسامح بن مدعس و جماعته و اصاب ابله الجرب فقاموا بواجبه و ساعدوه على طلاء ابله حتى شفيت و بقي معززاً عندهم حتى عاد لقبيلة شمر فاشتاق لهم و ارسل هذه الابيات :
يا راكب حر بـدو الخـلا هـات
====== لمـا بنـى فوقـه سنـام مظلـي
فوقه غلامٍ ياخذ الليـل ساعـات
======== قـرمٍ لعسـرات المـوارد يدلـي
يا راكبـه نصّـه فريـق العبيـّات
====== جنابهـم للجـار فـرشٍ و زلـي
اثبت من كتب القلـم بالخفيـات
======== تلقى لهم رامـه أمـام المصلـي
ابو فـلاحٍ و الوجيـه الفليحـات
======== و مسامح اللـى للنشامـا يهلـي
أهل بيوتٍ للفـداوى ذريّـات
======= يقزر زمانـه وسطهـم ما يملـي
و أن صاح صياح الضحى بالطويلات
======= يفرح بهـم راع القطيـع المتلـي
نعمٍ هل الجدعـاء نهـار الملاقـات
======= الى عدّو ما فيهـم اللـي يذلـي
ودّى بهم مير المشاحـى معيّـات
======= و الريق من بيـن الشفايـا يزلـي







و له أيظاً في وصف القهوة :



دنيت محماسي و كفى خذا ميل
====== بريّة من سوق صنعـاء مقـرّه
ياما حلاء صبّه برقط الفناجيل
======= من دلةٍ مثل البريسـم تجـرّه
ياخذت من بكره ثلاثة فناجيل
======== راح العماس و عيمتك راح شرّه




و له ايضاً هذه الابيات التالية بمعشوقته الكردية :





يا صاحبي ما بك نصيبٍ يرجويـن
======= لا بالشباب و لا بعد عارضي شاب
عن دارنا بديار الأجناب منحين
======= تل الذهب عن دار حيي والأغراب
بديرة ما به صديـقٍ يشاكيـن
======= الا الضفادع حسهن تقل طنـّاب
بديرة ما به صديـقٍ يشاكيـن
======= الا الخشب يمشي مع الشط هراب
مع أيمن الفكّه جنـوبي حمريـن
======== غربٍ من الفتحه شمال عن الزاب
أدير به عينـي و أحـل الرماميـن
======== خلاصةٍ تركى على كير شبـّاب
و جديلته فوق الحجيّج صفيفيـن
========= ريش النعام اللي مع الدو هـراب
و نهود سطرات الفناجيل بالصيـن
======== دزن و مزن في جديدات الأسـلاب
و العنق عنق اللي تقـود المغيريـن
======== لاهلهلت به سابقٍ عقب مطراب
و العين عين مكركمات الشياهين
======= أو عين قواد المهاء خضع الأرقـاب
و ريقه طعم تفاح طلـع البساتيـن
======= أو سكرٍ يشرى من الهند و يجـاب
و ردفين كالحزفين في سوق شارين
======== علّق مطاويهن على لايح البـاب
يا شبه وضحاء مع فريقٍ مطرّيـن
======= ترعى طنف تتلي مصاليح الأجناب





واسمحولي على القصور

 

 

 

 

 

 

 

 

 

 

العزيز ابن ريشان

تحيه كبيره لشخصكم الكريم ولطرحكم الراقي ..

سلمت ولاهنت على هذا الموضوع والفكره الرائعه .. مجهود تشكر عليه .. وحنا والاخوان وبعد اذنك اللي عنده اي قصيده للشاعر خضير الصعيليك يضيفها حتى نتمكن من جمع ديوانه ونقوم بتثبيته ..

ولكن هناك ملحوظه .. ذكرت من عرض ماذكرت انه له قصيده بالشيخ ابا ذراع من السهول .. وانا اللي اعرفه ان ابا ذراع شيخ الذرعان من الظفير ومابه كلام .. اتمنى التأكد من صحة الامر واعتقد انه خطأ مطبعي منك ..

اكرر شكري لمجهودك ولي عودة

 

 

 

 

 

 

 

 

 

 

المشاركة الأصلية كتبت بواسطة Ben Reshan

يا شيخ انا جيتك على الفطّر الشيب= قـزّان مـن دار المحبيـن دبّـاب

الفطّر الشيب .. على وزن الضمّر البيض والشمّخ النيب ..
وأرجو منكم شرح المقصود هنا !

المشاركة الأصلية كتبت بواسطة Ben Reshan

متخيرك يا منقـع الجـود والطيـب= لا خيّب الـله للاجاويـد طـلاّب

يقصـد مَـن ؟؟!

بالتأكيد كان يقصد سلطـان البَر " فارس الجـربا " رحمة الله عليه ،
ابن المحزم "صفوق بن مطلق الجربا" .

المشاركة الأصلية كتبت بواسطة Ben Reshan

يالجوهر الناريز يالعطـر يالطيـب=يالصعل يالصهّال يا حصان الاطلاب
يالزير يالزحّـار يالنمـر يالذيـب= يالّليث ياللاّيوث يالشبـل يالـداّب
يالضاري الضرغام عطب المضاريب= يالفرز يا مفراص ضده و الاجنـاب
يالنّادر الهيلـع عقـاب المراقيـب= يا نافلٍ جيلـه بعيديـن و أقـراب
نطّاح طابـور العساكـر إليا هيـب= ستر العذارى لا غشى الزمل ضبضاب

يا سـلام سلّم !!
مِن أذرَب وأجمَل مُفرَدات النداء والنخوَة والمدح !

المشاركة الأصلية كتبت بواسطة Ben Reshan

عيبك الى من قالوا الناس بك عيـب= بالسيف لأرقـاب المناعيـر قصّـاب
و عيبك الى من قالوا الناس بك عيب= للسمن فوق مفطّح الحِيـل صبّـاب

يا سـلاااام .. التلاعُب بالألفاظ إيجاباً !
مِن أبـدَع التصاوير الشِعريّة التي سمعناها !!

المشاركة الأصلية كتبت بواسطة Ben Reshan

واسمحولي على القصور

كل هالمعلومات .. وتقول قصـور ؟!!

بل هو الإبـداع بعـينه !!

شكـراً جزيـلاً لك أخي :

( Ben Reshan )

على فتح المجال لتعريفنا بقصائد الشاعر : ( خضـير الصعيليك )
وترى أخوك ( علي الوهـبي ) موسوعة كامِلة مِن التراث .
وسوف يُساعِدك في تكمِلة ديوان الصعيليك ، وأيضاً سترى مُساهَمات
إخوانك الإيجابيّة بلا شك .. وهذهِ إحداها :
يُقال أنّ شاعِر شمّر بدأ بالشِعر وهو في الخامِسة عشَر مِن
عُمره ، وفي أحد الأيام ذهَب هو وأبوه إلى سوق بريده ؛ الذي
عادةً ما يذهب إليه أهلُ الباديَة للبيع والشراء والجلب أو العلاج .
وفي السوق رأى خضير فتاةً جميلةً .. فقالَ فيها :

باديت أنا بالسّـوق مِن بِد الأسواق=غِروٍ سِقاني عسى ربّي يسوقه
سِقته وساوقني معَ السوق وإنساق=سوقه يسقيه المطر مِن بروقه
وإن كان ساق الساق يومنّه إنساق=ساق شكا مِن ضِيقة الحجل ضوقه
لا صار للمخل,ق سايق وسوّاق=على الصراط الهـدي لا تعـوقه

يُقال إنها أوّل قصيدة يقولها الصعيليك !
وأرجو تصحيحها إن كان فيها أيّة أخطاء

أكرّر شكـري الجزيل لك أخي إبـن ريشـان

 

 

 

 

 

 

 

 

 

 

بارك الله فيك يابن ريشان والله من وراء القصد .

لك وافر التقدير

 

 

 

 

 

 

 

 

 

 

مشكووووور أخوووي على هذي المشاركهـ.,.,.,

والله يرحمـ الشاعر.,.,

 

 

 

 

 

 

 

 

 

 

تسلم يابن ريشان

وماقصرت وبيض الله وجهك

الله يرحم خضير الصعليك

 

 

 

 

 

 

 

 

 

 

الله يرحموه ..

وكنز ثمين هالقصايد ..


لاهنت أخوي الكريم ..


ويعطيك الف ع ــااافية ..

دمت :)

 

 

 

 

 

 

 

 

 

 

بيض الله وجهك

وماقصرت

وننتضر من الربع تكميل الديوان

 

 

 

 

 

 

 

 

 

 

بيض الله وجهك يابن ريشان على قصائد الصعيليك والله الله بمثل هالمواضيع الطيبه يالطيب..!!

عساك دوم على القوه,,

 

 

 

 

 

 

 

 

 

 

ابن ريشان يعطيك العافية يالذيب