يالله ياللي تطلع حلو الرطبي= أفضل غذا اطلعته من جوف الخشبي
يا واحدٍ مالك وكيل ونايب =تعلم مالا نعلم بكل مغيّبي
أنت الإله ولا الهٍ غيرك =عفوك ولطفك يوم نشر الكتبي
يالله ستر الدنيا وستر الآخرة =اجعل لنا في كل دارٍ مكسبي
لا تقصي بعزاز النفوس أهل الحياء= اللي كل يومٍ بالضيوف ترحّبي
جادوا على عسر الزمان ويسره =امشرّعات بيوتهم ما تحجبي
اللي لو ماتوا ما تموت السمعه= لو الجسد بين اللحود محضّبي
فازوا بحسن الخلق هو والجيره =والبذل بالواجب ولين الجانبي
هذا ويا سامع كلامٍ مني= مثايلٍ من رأس رجل مجرّبي
جرّبت بالدنيا وشافت عيني= من ذاق صافي ذاق مرّ المشربي
دنياك هذي من عليها فاني =من حلّ رحل وامسى في قبرٍ قبي
المستريح اللي مصدٍ عنها =من غير رضاء الله ماله مطلبي
يالله ظلّك في نهار الكربه =يومٍ به الشمس القوية تقربي
أوصيك يا مفرّط بنفسك تنتبه =من غير عِرَى الله ما لك مقضبي
يا ما فقدنا من صدوقٍ صادق =وافي وفي كل الامور مهذّبي
اليوم يسكن وحده بجوف الوطا =تحت الثرى ما يسمع اللي يندبي
وحنا وراهم لاحقينٍ فيهم= ولا شمسٍ الاّ عقب صبحٍ تغربي
صادقت رجالٍ منهم من تحت الثرى= ومنهم رجالٍ لا تزال تهبهبي
بالهون يالعين الشقيّه هيّدي =ويالقلب من سر الليالي وش تبي
هو البلا بالوقت والاّ فينا =وين الرجال اللي تعز الصاحبي
اليوم يا قلّ الصديق الوافي =كلٍ الى قضى لزومه جنّبي
كم صاحبٍ تبيه بالشدّة ذخر= وعند اللزوم يروغ مثل الثعلبي
وكم صاحبٍ وقت الرخا يبرالك =وان حلّت البلوى دلاّ يحبي حبي
وكم صاحبٍ تأمن عليه بسدّك= والصبح كلٍ عن حوالك يكتبي
وكم صاحب يدوّر عليك الزلّه= يبي عنك مع أي بابٍ يهربي
خلّه يا علّه هفّة اللي ما رجع =يا علّ فمٍ حبّ راسه يتربي
من رافقك بالطيب أحذر تتركه= ومن صدّ واقفى عنك لا له تطلبي
أصحابنا هالوقت لا تقصي بهم =يا كنّة الجوزاء رسوسٍ تنضبي
وعزي لحالك كان ربعك ما لهم= رأيٍ شجاعٍ واجتماع يهيّبي
ان حلّ قيل وقال فيهم أصبحوا =كلٍ يمس الحبل ولحاله يبي
وان اصبحوا كلٍ لحاله أمسوا= كلٍ تحت رجوى عدوٍ معتبي
العز بالجمعا وطيب السمعه =لا بالضعافه ولا بأشوار الغبي
الطيب برجال الحميّه ينمو= ولا طيبٍ الاّ يبي صبرٍ وتعبي
وتواضعك للناس حظّ ورفعه =يرقيك في اعلا طويل المرقبي
والكبر على الناس نقص وذلّه =راعيه مهانٍ مذمومٍ مذنبي
الفعل ما هو بالمراكي والذهب= الفعل حقٍ للمراجل ينسبي
والاّ زمان اليوم قول بلا فعل =الذيب بالمفلا يهاوزه الظبي
فيه الشجاعة كلمةٍ يدلي بها= حقٍ سطع فيها فهيمٍ موهبي
ياصل بها حقٍ ويفصل باطل =ما هي بأخذ حق الضعيّف والصبي
مثل ما قالوا لو وصفناها فهي= للي ملك نفسه بوقت الغضبي
كم صابرٍ أخذ حقوقه كامله =وكم من حقوقٍ ضيّعت للعصبي
والحق لا تخفيه لو هو ضدّك =والصدق لا تعتاض فيه الكذبي
ولا تبغض الطيّب بسبّة جاهل= ابحث عن الاسباب والمتسبّبي
وأحذر عدوّك لو فرش لك زلّي= تراه مثل اللي يدير الاصعبي
ولا تهتزي بالناس ترى الهزوى= لازم تجيلك لو من الصلايبي
وايّاك راع الطيب تنسى فضله= ولا تهمل المعروف لو هو بصلبي
وإن أوهبك مولاك حفظٍ راهي= واصبحت راوي أو أديب تلقّبي
اوصيك لا تعبث بتاريخ العرب= تاخذ من ذاك لذا وهذا يلعبي
وإن جبت من شعر الرجال لغيرك =لا تقوم عن راع الحلال تجنحبي
هل كيف تحفظ لك قصيدة كاملة =وتنسى اسم شاعرها الاصلي يا شلبي
ترى الرجال عيونهم مثل السهوم= ولا كل كفٍ بالسلام مخضبّي
وان كنت شاعر لا تذمّ وتمدح =وتقوم لخواض السوالف تقلبي
أبعد قبيّحك وأبد من مليّحك =واهد مديحك للي فعله يعجبي
ومدحٍ بغير أهله مذمّة ذمّه =وعن مدح قنّاص المصالح احزبي
ان كان مدحك تبي تطلع علمه= تراك وهّقته وهو عنه اجنبي
وان كان مدحك فزعةٍ من عندك= ما بالقصايد فزعةٍ للأقربي
المدح حلاته الى جاء من بعيد =غصبٍ على الشاعر يقول ويعربي
ما هو لأجل هذا رفيق وذا صديق =والاّ على شان انه صاحب منصبي
الشعر أمانه والامانه صعبه= تبي لها عقلٍ وعلم وأدبي
ان كان خطّيته على حمر الرمال =مع أول هبوبٍ يمرّه يذهبي
وان كان نقشته على سمر الجبال =نذهب ويبقى مثلٍ به يضربي
ومن كثر هذره قلّ قدره واضمحل =والصمت حكمه من آداب العربي
كان الكلام وصايبه من فضه =فالصمت قالوا من ثمين الذهبي
وتمت تماثيلٍ كتبها مجرّب =نصايح تهدى لمن يستوعبي
يالله عفوك يا وسيع الرحمه =يا جاعل الممحل مريفٍ مخصبي
بديتها باسم الله الفرد الصمد= ختمتها بأزكى الصلاة على النبي
التجربه للشاعر جهز بن فلاح بن هزاع الشريهي الشمري ..
العرض العادي
