غريب الشلاقي أحد رجال شمر الشجعان وأحد أبرز رجالات الشلقان في عصره كان عقيد حرب وشاعر وفارس مغوار
لايهاب الموت سوف نبدى بأول قصه له وبأختصار وهي ابرزها وهو كون رم العروف بين شمر والحويطات ورم تقع الان
بالاردن وكانت نهاية الحرب هي المنع وقد اصيب بالمعركه أحد الربطان وخواله الشلقان ولما سمع غريب من أحد ربعه
الامتهان وانه قد أتعب حاله وربعه من غير فاده تذكر قال هذه القصيده التي توضح الموضوع بالكامل وبالمناسبه
هذه الحادثه التي يستنكر الرجل بها على غريب الشلاقي هي سبب شهرة ربعه بالخوه الطيبه وانهم لايتركون رفيقهم وسبحان الله
انا حمدت الله على كل ما كان =احمد ربي كل صبح وليله
ياعبكي اركب وارتحل فوق مقران =يجوز لمندوب النشامى زميله
يامسندي من ديره التنف ومعان =الظهر في حروه شروره مقيله
تلفي لبيت يجمع الصبح ديوان =والعصر هيضات النشامى تجيله
ياتيك من ينشد عن العلم شفقان =قل مزنن تهلل فوق رم نخيله
محذى مطرهم بس دم ودخان =ولاينثنايا يركب القور سيله
صكوا علينا التيه مع كل الاركان =وعفنا تحضي كل شقحا ضليله
وكواهن الكاوي قليلات الاذبان =وغدا" بنا مثل اصطفاق الجميله
وغدا بتاليهن تقل ضرب سدان =واللي دنا يومه تقلط رحيله
وصار الفشق من بيننا تقل دخان =ومن طاح منا طاح منهم بديله
ومنا ومنهم يشبع الذيب سرحان =والضبعه العرجا تصيف مكيله
وكثر النخا لفلان وفلان وفلان =وتطابقوا حمايهن بالدبيله
وربعي دعيجات على الحرب عيان =وكم طفله ربعي تعشوا حليله
ياعيال هوشوا دون شياب الامتان =ترو الفرج من دون اهلكم طويله
وخطوا الولد ينضخ وللهرج بثمان =هبيت ياهرج سراب حصيله
التدبره لله ماهو قول كذبان =سبحان من يامر بعدله وميله
ياعيال هذا اللي على الدرب مشان =ولاينفلت من دون الالاه حيله
ولاينشمت ياعيال بأمر اليا كان =ولايهتدي عبد حذا الله دليله
ما افطن لبيت عبيد كان انت غويان =وابن مهلهل يالقلوب الهبيله
وبأختصار معاني بعض ماورد بالقصيده
الدعيجات ::الشلقان اولاد دعيج وهي منخاتهم القديمه
أفطن لبيت عبيد::يقول عبيد الرشيد
أطرب على الكايد الياصرت بحلان =وعند الولي وصل الرشا وانقطاعه
وابن مهلهل::هو محمد ابن مهلهل الشعلان من شيوخ الروله ويقول
لوعندنا من غيب الايام رسه =الادمي مصلوح نفسه يدله
وتلك الابيات رد على من شمت بغريب واراد ان يبين غريب ان كل هالامور بأرادت الله وليس للادمي اي يد بها
وبعد تلك الحرب بسنين كانت صيحات الاخوان قريبه وافعالهم ليست من افعال الرجال حيث انهم لايقدرون الكبير
ولايحشمون أحد وانهم هم الموحدين والعابدين والمؤمنين والغير كافر في جهنم وبئس المستقر كانت هذه رؤيتهم
للغير وهذا من جهلهم بالدين وبسلوم العرب والرجال الاشاوس وكانت الطامه الكبرى على غريب حيث ان بعض ربعه
انضموا لهذا التيار الجارف وقد تطاولوا وقطعوا سلوم العرب بأذائهم للقريب وقتلهم الكبير وتكفيرهم للمسلمين ومن هذه
الحادثه نزح غريب واهله الى الجزيره ونزل على عقله كان يوجد عليها عنزه بقياده مرضي الرفدي وحمود ابن رميزان
من العبيد وحمود رحل مكرم وغني جدا" ومشهور لدى اهل الجزيره ويسمى بأبو شقنتين ومعناها ان عمود بيته فيه
شقنتين وكل شقنه تعلق بها ذبيحه كل ليله وقد تصافوا على نقاء ومرجله وكل ليله يسهرون عند احدهم وفي احد
المرات شاهد غريب زول رجل يقترب من بيته وسماته نجديه فشب النار وصلح المعاميل ولما لفاء الرجل عرفه وكان
اللحيد وهو من المرامشه اهل موقق فغداه وقهواه وبعد ذلك قال غريب ها ياللحيد وش جايبك من ديره المسلمين
الى ديره المشركين وهو بذلك يستهزي فقال اللحيد ياغريب والله ماهي ديره مسلمين الضيف يضرب والناس استحلت دم
بعضها البعض من قدر على رفيقه قتله بأسم الاسلام وهربت بنفسي خوفا" عليها فسأله غريب على بعض من يعرف بنجد
من سنجاره فقال الرفافه ضربوا الطريق وانا ناوي الجزيره فسلم عليه وذهب اللحيد وجلس غريب يستذكر الماضي
ويتمناه ولكن محال ان يعود الا ان يأذن الله وفي أحدى جلساته من أخوياه الرفدي وابن رميزان شاهد احد الصلب وهو
يشحذ من الحريم المعونه والاكل فعرفه غريب وكان مريف احد صلب سنجاره أهل نجد فقال غريب جاي يأخوا طليحه
تعال للرجال وش تبي بالحريم فستغرب الصلبي من يعرفني وانا في العراق فألتفت بوجهه فعرف غريب وطاح من شده
الفرح وأخذ يبكي فلما سكت قال غريب هاه يأخو طليحه وش جابك من عند المحرم انا خابرك تنصى الرجال وتأخذ
حاجتك منهم وهو بذلك يريد ان ينومسه ويرفع رأسه عند الرجال فرد الصلبي وقال يأخو وضحي جيت يم ناس مايعرفون
أخوطليحه وانحر الحريم بنت الحموله تطلع علي وتعطيني وبنت العفن تصك البيت من دوني فقال غريب وش جابك
من اللي كافينك لقمتك ولبستك انت وعيالك وسقصد شمر نجد فقال الصلبي جابتن الذله على روحي وعيالي من الاخوان
فنادى غريب على الحريم وامرهن بملى خروج الصلبي بالطعام والكسوه وبعد هذه الحادثتين من اللحيد ومن الصلبي
قال غريب
يالله طلبتك ياوسيع المحاريف =فتاح بيبان الضعوف المواحيل
يالله ياللي تعز وتذل وتخيف =ياحامي اطراف الحرم من هل الفيل
تفكنا من موقفات الصواديف =ومن شر نبذات الليال المقابيل
ويادك بي من واهس القلب تكليف =سيرت يم مبهرين الفناجيل
من بيت ابو راكان ريف المناكيف =اليا بيت ابو ساجر ملم التحاويل
مجالس يطرب لها راعي الكيف =ونزله بزينين القبل والتعاليل
بلن قلبي لاغسن غش ومخيف =ياشفت زومات السلف والنزازيل
يطري علي ربعا" بهم ندرة الحيف =ياركبت الرشاه الرجال المحاحيل
بسباب برجس هو ومياح ياحيف =ضاع الجهام ومرديت كنس الحيل
اللي بهم نرعى الخطر والمخاويف =سوا" بهم سمر الليالي بهاذيل
وشتاتهم من نجد الياسند السيف =ولاينشمت بمور منشي المخاييل
ما ياراكب اللي كنهن بالتواصيف =بسحاب ربدا" طالعا" شوف ازاوييل
يشدا" شواحيف نحاهن عواصيف =الموت حاديهن وهن ارتكن حيل
يعبن لتقطيع الديار المياهيف =رملن ولاذاقا"لهيج المخاليل
وتنحروا يمت سهيل اليا شيف =ومنا تروكم يالنشامى مراسيل
وياعلكم بجاه من يقري الضيف =تلفون ما مرا" عليكم غرابيل
ياجيتوا عقرب والرعون المشاريف =تزفرقوا قطعانهم بالدرابيل
واليا لفيتوا للرباع المشانيف =قولوا لبو علوش ريف المراميل
قل ياحيف ياغضبان ياحيف ياحيف =تنسون مروين الغلب والشناشيل
ياخو دليل مابنجد تحاسيف =يمر بها قواد غلب الفواصيل
هل الفعول الصدق والحكم بالسيف =اليا سربه شحص المهار المشاويل
اللي بنجد ذللوا شذره السيف =راحوا شتات للسيوف المساميل
وياخوا دليل ما بنجد مصاريف =باقت بنطاح الوجيه المقابيل
وشامه لبن مقرن بعيد المناطيف =لسربه هل العوجا تذج الهلاهيل
شوم عن ديار عافها الحيد ومريف =والرزق عند اللي يجيب الهماليل
دار بها الحقران يضربها الضيف =ماتنسكن دار الخزى والتخاجيل
وتر بعدك اطيب عن عفون الدناديف =دوارت الجنه بذبح الرجاجيل
واعرف فليج انه بنقره ذغيغيف =علمه مع اللي يفرق الصبح والليل
وياحيف ياحلفك لزين التخاصيف =وهو حصنيا" مستذيبا" بالتهاويل
هو حصنيا" يبي يعنف تعانيف =او طيرتن تطنب بروس الغراميل
حلفك يجوز لعايزين التواصيف =فهود الزراج اللي تخيل المخاييل
وتزاعجوا عنها بعاد المساليف =وزاحت هل النوها بعد المراحيل
لديار شمر نقري الجار والضيف =وعسى بخيرات المكاريه تسفيل
بين الضياغم والسيافا هل السيف =واولاد مسعود بعاد المصاويل
وربعي هل الجدعا ليا صدرا" عيف =لهم بروجات السبايا تنافيل
وعيال الفديغي فوق قب مزاغيف =خيالت الادراك ماهم تزاويل
ومع سربه العصلان عند التحاريف =يروون عطشان الحراب المغاليل
وغلبا بكضات الحرايب مواليف =يتلون من عقب المحزم مشاكيل
بالله ثم بسبابهم ديرة الريف =نرعاه لو دونه أراضي هل السيل
بعض المعاني
ابو راكان :::حمود الرميزان العبيد
ابو ساجر :::مرضي الرفدي
برجس ::::هو برجس ابن عردان
مياح ::::هو مياح الشلاقي
أخودليل :::غضبان ابن رمال
عقب المحزم مشاكيل ::: الجربان
وبعد القصيده رحل الى ضواحي دهاما عند العواصي وقد استقبلوه بالترحاب والتكريم الجربان والثابت وقد
جاور الحدبان فقال الحدب ياالثابت ترو ماهو انا شيخكم ترو شيخكم غريب الشلاقي وثابتي تبي تشت
ذلوله عن غريب فعليه الطلاق والجيره فلا ينزل مع الثابت وانا راسي يشم الهواء وقد وفوا الثابت
مع غريب وغزوا معه اكثر من غزوا ولكن اشهرها كون الصخنه وأخذ حلال اهل الصخنه وبعد رجوعهم
من الحرب لفى عليه ابن فهد من الجربان وقال ياغريب انت جبت حلال اهل الصخنه واهل الصخنه اخواني
فلما تحقق غريب قال يابن فهد العذر والسموحه فأنا لا أعلم بخواصكم لاني جديد على المنطقه وارجع الحلال
وساقوا المدى وبعد ايام قال غريب ياشمر جهزوا نفسكم نبي نغزي ومغزانا تروه بعيد وعليكم بالذلول العتله
والغربه الصميد والمزهبه الكبيره واغلب الغزوا من رجال الثابت والعقداء اربعه وهم عايد العجل من الفضيل
من عبده واالدريعي الحدب ابن صعب من سنجاره وابن عايش من التومان من سنجاره وابن ملوذ من الدغيرات
من عبده وكان عدد الغزوا الف وستمائه رجل وكانوا بتبوك وكان بها ابن عقيد من ركبت ابن سعود وخذوا
الدبش بيان وقضبوا الرعيان ولما راعى غريب للوسم فعرف ان الحلال لبن سعود فقال لشمر اقهروا الدبش
وقال للرعيان وين راعي الدبش فخرج احدهم وقال انا فقال غريب وش هالدبش اللي عليه وسم السعود
فقال الراعي هذا جيش الركبه لبن عقيد فقال غريب وليه ما علمتنا فقال الراعي قوم وخذيتننا ولم تعطونا فرصه
فقال ياشمر لازم نرجع الدبش فقال بعض العقداء وليه ياغريب فقال ابن سعود عمود للدين وحاكم ولايأخذ حلاله
الا ردي بخت فسمعوا الكلام وارجعوه وقال للراعي سلم على معازيبك وخلهم يدعون لي بالخير وان اعود لنجد
فأنا ماظهرت من نجد الازعل على بعض ربعي وعمايلهم مع الاخوان وتحالفهم بالخطاء وكان مغزاهم ثلاث
شهور واغلب الحلال اللي معهم لبني عطيه والحويطات ورجعوا لاهلهم منهكين ولفى علهم ابن فهد مره أخرى
وقال ياغريب انت جبت حلال الحويطات والحويطات عوج دخان وأخواني وكان اللقاء عند الشيخ دهام الهادي
الجربا فقال غريب يابن فهد الحويطات ماعمر وخذت الخاوه عليهم فقال ابن فهد عوج دخان وأخواني ياغريب
ولايصير انك تأخذ حلال اخواني عندي ياغريب فقال غريب يابن فهد يقولون العرب اليا تشابهت علهم الله عطاك
ثنتين وهذي ثالثتهن والله عطاك وحده وهذي ثانيتهن ان الحويطات وخذه الخاوه عليهم وعزالله نبي ندي قال عوج
دخان واخواني ياغريب سكت غريب وبأثناء سكوته تكلم أحد الرجال بكلام أزعل غريب وهو راشد ابن شريعيب
من الحريره وقد سمعوا الشيوخ كلمه ابن شريعيب وسكتوا عليها فقال غريب يابن فهد نبي منك مهله خمس ايام
لكي نستريح ومن ثم نرجع الحلال فقال ابن فهد ولك الخمسه ولاتأخر وذهب غريب لبيته ولما وصل وجد مناديب
عقيل الجاور يستنوه وقالوا ياغريب يقول الجاور شمر مالهم عدوا اليوم والحلال اللي أخذته تلرجعه والا ما لك
الا السجن والحبس فقال لهم غريب سلموني على الشيخ وقولوا يوم اتفاقه مع الشريف حنا بمغزانا ولكن ان شاء
الله انه ماتتكرر وضاقت به الارض لانه رجل حرب من الطراز الاول ويعشق المغامرات فقال لهله ولاخيه
ساير ولبن أخيه غانمك ابن دلي نبي نشيل الليله يم العقيدات ونبعد عن الشر وعن ابن فهد ومناديب عقيل الجاور
وفعلن شالوا ونزلوا على العقيدات بليلهم وبعد الوصول قال هذه القصيده موجهه للشيخ دهام الهادي الجربا
قم ياخطيب اكتب بحبر وقرطاس =للشيخ قواد الجموع الثقالي
يادهام ياحماي ولدات الافراس =عريب جدوعم واب وخالي
ياملبست سرد السبايا باللباس =ويامسقيت كبد الحريب العلالي
يادهام نبهتكم لنا تقصم الباس =وشنوحكم يامفنيت كل غالي
حنا غدينا بين شالي وحباس =ضاقت وعند الله فرج كل مالي
خوفوا منشي الغيم حشار الانفاس =كيف الافيحج تودعونه حلالي
يابن فهد لوتاصله كان لاباس =ورى الحصل وقاف تاخذ ليالي
متمركيا" من بين دله ومحماس =وتنقل وسادك في مسيح الضلالي
وتبي مهاوي مبعدت كل ملماس = اللي لهم بقصى بسيطه مدالي
دواليا" ببحور الادراك غطاس =عقبان عقبات تنوس المفالي
وتاتي عركات يشيب بها الراس =عركات عند معبسات الشمالي
ياما وقع بنحورهن كل مدباس =ومروه ماكنه على الربع غالي
ربعي هل الجدعا لياهب نسناس =اللي سقوا بيص غبون الليالي
وابيات من عقلي كتبته بقرطاس =نصيحتن يذكربه الاول لتالي
قول المهادي ياهل الجود والباس =كان انت عن مثله لمثلي تسالي
مار عن قولتن نجد هله جوك غلاس =امر من الله ثم غدر الليالي
شلنا عليهن من مزابير الاطعاس =وجينا لملفانا وعز الاهالي
أما الجزيره يوم نجيه من الراس =نبي لنا عن ميل بقعاء ضلالي
والا ياما ذبحنا عن نجد من الناس =وياما بها افنينا رجال وحلالي
وياما بها دسنا على كل من داس =ولحقت علينا بالحيل نجد تالي
نجد ولاها معرب الجد والساس =بالفعل والحيلاه والاحتيالي
حزم هل العوجا على الحرب علاس =وعقب الكدر شرب القراح الزلالي
متعلمن به قبلنا شلع الاضراس =كم واحد ياما حربه وزالي
وين الشريف اللي تخاضع له الناس =يذكر بباريز غروب الشمالي
ووين الشيوخ اللي على الزبر جلاس =مثل ماقال جديع ياهملالي
المعاني:
شالي :::هو ابن فهد الجربا
حباس :::عقيل الجاور
الافيحج:::وسم الحويطات
نجد هله جوك غلاس :::كلمه ابن شريعيب اللي زعل منها غريب في مجلس دهام الهادي
معرب الجد والساس :::ابن سعود
جديع ياهملالي :::جديع ابن ملحم من شيوخ عنزه بعد ذبحت أخوانه وعياله قالويسند على نمر
ابن عدوان
يانمر كل اللي عليها مولي =متروحه ياهيه ياهملالي
وبعدها ارسل ابن فهد لغريب مرسال يقول ارسل لي أي ذلول عليه وسم الافيحج من شان
ارجعه
لخواني وادي المدى عن الموتا فلم يستجب غريب وقال انا وشمر غزايين ثلاث شهور وعقب
التعب والذبح يرسل ابن فهد مرساله يبي حلالنا وقصد قصيده ثانيه ببن فهد
يابن فهد عيفتنا للجزيره =خليتنا بديار الاجناب ننزاح
يابن فهد ماطعت حكي المشيره =حطيت دونك مشرف وابن جراح
المعاني
مشرف وابن جراح:::مشرف ابن دندن وابن جراح شيوخ العقيدات اللي رحل يمهم واكرموه غايه
الاكرام
فلما وصلت القصيده ارسلوا الجربان مناديبهم لاسترضاءه وعودته فصلحت الامور وزانت
وعند ذلك وبعد سنين كبر الفارس المقدام غريب ومرض مرض قوي وجمع عياله وقال يعيالي
انا مرضت وانا خايف من مرضي انه ينهي علي ولكن وش رايكم انتم تبون تعيشون بالجزيره عند شمر
والاتبون يم اهلكم بنجد فقالوا لاوالله يايبه نبي ربعنا بالشعيبات بحايل فقال انا ابطلبكم طلب
انكم تودوني للمدينه المنوره ابي اصلي به واسلم على الرسول صلى الله عليه وسلم
غديني أجاوره بتلى حياتي فقالوا ابشر باللي ودك وشالوا يم نجد وبي اثناء ذلك حدث من عكر صفو
شمر بينهم البين اذا ان ابو دهام ذبح على يد احد الثابت وهو فخذ الوضحان وقد استثير الشيخ
دهام من بعض دوارت الشر وقالوا كيف تقرب ذباحت ابوك وانت حي وشيخ أملر بذبح الثابت رجل رجل
حتى تستوفي لدم ابوك فقال عزالله انكم صادقين فعلم غريب بالسالفه وان فيه ناس يحرشون الشيخ دهام
على الثار فأرسل هذه القصيده ينبهه بالحيله قبل ان تكبر السالفه وتصير ذبحات لشمر
وكان غريب قد رحل وعندما شاهد البروق وهو بوادي العود ابدع القصيده توجد ونصيحه لدهام الجربا
كريم يابرق شلع وقت الادماس =بالليل يوضي بارقه مثل الافنار
خلته وانا بمفرع العود بقياس =خمنن من البيضاء وطى خشم سنجار
نهض هيانه عقب مانامت الناس =اودع شعيب الدرو به مثل الانهار
على منازل زيد هو وابوحواس =على الرباع اللي بهن بن وابهار
برباعهم تلقى المشاكيل جلاس =اللي بهم ترعى الخطر حز الاوبار
ومجالس تغدي خواء الرس وعماس =وتلقى علهم من صليبين الاشوار
وعسى لهم من كل الاثمار تحتاس =يادار مسقين العدوا كاس الامرار
وخلاف ذى ياراكب فوق عرماس =حمرا تزول من عياها بالشجار
يارسل صبح الخمس من خبر الامحاس =خله تدوربك مع الشط معبار
ياجاء العصير وشورفتبك بالقواس =من روسهن يبين لك رجم عيار
وقبل يقود المال ورموس الاوناس =يدعيك بيت دهام يزمي تقل طار
بيت الشيوخ اللي قديم لهم ساس =اللي على شدات الايام صبار
بيت الياجيته تهول من الناس =ذولا مسايير وذولاك خطار
للنار شباب وللبن حماس =تحمس لربع هم هل الصيت والكار
والنجر دايم يشتغل تقل نحاس =ودلال عيب كبهن عن سناء النار
وصينيتن مادبره كل عواس =يشبع بها الجيعان بالموسم الحار
ياطير يا...على كف قناص =اشقر يدمي مخلبه عفر واطيار
يالجوهر النريز ياغايه الماس =مهدي الصعوب اللي ترثع بالوثار
وافهم مني ياشوق مدقوق الالعاس =نصيحه تلقاه يادرت الافكار
ماهي نصيحه واحد ماضي الاعراس =ياقلتله وش قلت يبدي بالنكار
اللي على غرات الاجواد بلاس =رايه يدوربه تعاقيد الاشرار
وعلى الفشايل وجه اقوى من الفاس =ويعد شي غادي الحظ ماصار
مار تر عمدته يامعرب الجد والساس =ابو صعب لاتطيعبه رذل الاشوار
ان رصكم عدوكم عقب الارماس =الولد جوكم والعمارات زوار
أذخر هل الجدعا لكظات الاضراس =يومن بها المقفي يدور بها الثار
ياكربو شهب النواصي باللباس = وتحيزموا بظهورهن مثل الازيار
وياصار بطراف الفراقين حسواس =عادة ظعاينهم تضحي على الدار
وياهلهلت شلوى وركظ كل مدباس =كان العذاراى فرعن والحياء طار
وبعد ان وصلت القصيده لدهام الجرباء جمع الثابت ومنهم ابو صعب وهو متعب الحدب وقال عزالله صدق
غريب لقد شوشرو فكري بعض الانذال يريدون مني اخذ الثار من الثابت كلهم ويقولون ابوك انذبح
بحربه الحدب والعجرش والرويسي ووالله انهم اثروا علي لكن بعد هالقصيده من غريب تبين الوضع
وان ثاري عند الوضحان وهم مع الفدعان الى هالساعه وانتهم أخوان واقراب ولن يمسكم مني مكروه
وصفت بينهم ولفى غريب الي حايل ونزل عند قصر ابن مساعد وسلم عليه وشار عليه ابن مساعد انه يتعالج
بالحساء فقال غريب يامير انا ما جيت ابي علاج جيت ابسلم وابي قرب الرسول وذهب غريب وعند وصوله
للمدينه بأيام توفي رحمه الله وصلي عليه بالحرم النبوي ودفن بالمدينه وهي منيته وبذلك انتهت قصت رجل من
رجالات شمر الاشاوس بعد ان ملئها بالكرم والفروسيه وعلوم الرجال الطيبه...........
وأسف جدا" على الاطاله وسامحوني والى قصت رجل أخرى أرجوا تقبل تحياتي
أخوكم::::::::::::::::::راكان المعجل
القصه الكامله لهذا الرجل غريب الشلاقي
العرض العادي
