السـلام عليـكم
شكـراً أخي
على إتحافِنا بديوان قصائِد الأمير الشاعِر : عبيد العلي الرشـيد رحمه الله .
والشكـر موصول لكُل مَن أبدعَ في المُساهَمه لإتمام الديوان ،،
وأستأذنك لنشـر سيرة حياته .. وعلى المُشرف العام دمجَها بالموضوع ، بالإضافةِ إلى إني سوفَ
أُشارِكَكُم في نشرِ باقي قصائِده ،،
من كتاب قالت الصحراء
للكاتب : بدر الحمد
هُوَ الأمير الفارس الشاعر {{عبيد بن علي الرشيد }} و الرشيد كما هو معروف فخذ من آل جعفر من عبده .
أحد بطون قبيلة شمّر . ولد عبيد تقريبا عام 1220 هـ ، و يعتبر من أشجع فرسان الجزيرة العربية في ذاك الوقت .
يقول عنه طلال السعيد في الموسوعة النبطية الكاملة - الجزء الأول - : " كان بسيفه يشكل الدعامة الأساسيه
لحكم آل رشيد بحائل ، و كان قائدا للجيوش و محارباً صَلباً . علّق روحه على طرف سيفه و خاض المعارك
بجرأةٍ وإقدامٍ قلّما يوجد لها مثيل و هو من الرجال القلائل الذين امتازوا بالقوة الذاتية و الجسارة و المهارة الحربية منقطعة النظير".
ولد عبيد في زمن كله حروب و اضطرابات ، و كانت الحروب على وقتهم مثل شربة الماء .. أسهل شي عندهم
انك تحارب ! فما يمدي حرب تطفى إلاّ و ثارت حربُ أخرى . و عبيد نشأ على هالحياة و على هالحالة ، على صوت
الخيل و قرقعة السيوف ، اللي جعلَت مِنهُ فارساً شُجاعاً .. يقول في وصف احد الحروب :
أصبحت منهن خالي كود ثنتين=سعدي و مصقول يداوي الغلايل
و يقصد بـ " سعدي " فرسه ، و المصقول هو سيفه اللي يداوي الروس ، كقول عنترةَ بن شداد :
و سيفي كان في الهيجا طبيبـا=يداوي رأس من يشكو الصداعا
*** *** ***
و لعبيد بعض القصائد الغزلية النادرة ، و هو مقلّ من ناحية الغزل ، و قال هالقصيدة بعد رجوعه من إحدى الحروب البعيدة, يقول ياصف الضلع اللي مر عليه :
لي بأيسره من لابسات العشاريـق=خشف يخلط المسك و الزعفرانـي
وش عيشتي لولا رجا ذابل الريـق=لولا رجا لامـا زريـف المثانـي
ابـو قـرون كنهـن دفـن الهيـق=وامجدل فوق المتـن لـه وقانـي
من حط فوق الصدر زين العشاريق=حص و مرجـان زهـا بالبيانـي
روض البختري زاهي بالزماليـق=و امفلجـات بـه كمـا القحويانـي
هي نقوتي من لابسـات العشاريـق=من مصر الى غربه لشرقي عماني
( و هو يوصف زوجته بهالقصيده ).
و في آخر أيامه له هالقصيده اللي تَحوي الكثير من الحِكَم . و مثل ماهي عادته يعتزّ بنفسه و يفخر بأفعاله الحميده
و يحق له الفخر و الاعتزاز, لأنه كان قول على فعل :
طلبت ربي عالـم السـر والغيـب=يقبل صلاتي لـه و يقبـل صيامـي
و يحعل لنا عرض نزيه عن العيـب=و يفكّنـا مـن شـرّ سُـو الأثامـي
بـن آدم ملفـا الخطـا والعَذاريـب=لو ما فعل رميـت عليـه التهامـي
حميت أنا نفسي عن الشك و الريـب=ولا أحسب إن يلقا بعرضي كلامـي
ربعي لقوا بي عقب ما شبت انا عيب=تسطير كتـب مفسريـن الحلامـي
قلت اخبروني يا مـلا وش ذالعيـب=قالوا علـى ساقـة رفيقـك اتحامـي
قلت ان هذا مـن قديـم لنـا عيـب=مستارثينه مـن خـوال و عمامـي
العيب ترك المعرضـه بالمواجيـب=والا الرفيـق بطاعتـه مـا نلامـي
رفيقنـا كنـه بـروس الشخانـيـب=في راس حـد نايـف مـا يظامـي
يتبـع ...