ديوان الامير والفارس والشاعر /عبيد العلي الرشيد

طلبت من يعطي العطايا اليا سيــل = اللي عن الطلاّب مـــاصك بــابـــــه
يحطنــا لشيوخكـــم طيــر أبــابيـــل = ودياركــــــم على يدينـــا خـــرابـــه
واعطاني مولانـا وزادن بتسهيـــل = وارجى إن دعوتنا عليكم مجابـــــه
حطيت لك أفكــارن تحبّل حبابيـــل = ورزقه من الضبّان تملا عيــابــــه
تبي تحـارب متعبيــن الفنـــــاجيـــل = قبلك مضوا ناسن سعوا في خرابه
حنّا لكــم مامــن ورانــا محاصيـــل = الذيب مــاعنــه حــدن طـــرّ نابـــه
بظهور طوعـات يشحلــن تشحيـــل = يردون حوض المـوت عند اقترابه
وبايماننا حدب السيوف المصاقبــل = ومطارقــــن مــاينتــداوى صوابـــه
ودهمن بهن ريش النعام المضاليـل = نروي من الضدّ المناحر احرابــــه
لزمن اليا وردن يصملــن تصميـــل = بقومن يسدك حاضره عن غيابــــه
وان شفتهن يقفـن تراهـــن مقـابيــــل = لهـــن عند الملزمـــات انقـــلابــــه
جينا وجونا فوق زمل الجماميــــــل = وردوا عليهـــم موحشين الحرابـــه
بيومن خفا عجّ السبايــا تقـــل ليــــل = صحنا وعنكم رحمة الرب غابـــه
واحلـو زعجتنـا عليهــــــا الهلاليـــل = بيومن كسا وادي عنيزه ضبابـــــه
صارت فقايدهـــم ارقاب المثاقيـــل = بايمان من لاثمنــوا فــي عقابـــــــه
واللي وطنّه غابت الشمس ماشيــل = وحريبهم ردت بتالـــن حســابـــــــه
عـقـب القــريـريـــات ردن للنـيـــــل = والعيد هبّى يوم جاهن اخضــــابـــه
ياذيب صح وازعج لذيب الهذاليـــل = واذكر له الوادي يـــدور العشابــــه
عن فرسة الطليان يفرس رجاجيــل = بدارن بصرفا البين ينعى غرابــــه
وقبلــــه مضى منّا عليهــم تهاويـــل = والشر هذي عاقبة من سعابـــــــــه
بالطقطقانــــه والزقاريــط واعقيــــل = وبقعا تفطن ياعلي وش جرابــــــه
حنـــا كمــا مزنن صدوق المخـــاييل = دومن تسيل ولاحدن قد درابـــــــه
وان كان تنكر يــاعلي غارة الخيــــل = تر خيلنا تاطا الوعر ماتهـــابــــــه
حنـــا اليــا صلنــا بعــاد المصاويـــــل = وصولاتنا كم راس شيخن غدابـه
عز العميل إن كان هو صال أو صيل = عليه أو جـــــاه البلا من قـــرابـــه
فليــــا طغيت وقمت تمشي بتبديــــــل = فرعونكم حنا ترانا شهــــابـــــــــه
واليـــا بدا خشمك يشّـــــــول بتشويـــل = الضدّ حنا اللي نهــــدي صعــابـــــه
أطلب من اللي فضل الرسل تفضيــــل = رب السمـــا وانا شديد الرجــــابــــه
بآيـــــات يـــــاسين وطــــه وتنزيــــــل = والمدعى والبيت واللي دعــــــابــــه
يجعل شرايدكــــم لحـــول العباهيـــــــل = ودياركم هن اللي ساكناتن جنابـــه
هذا قضى كسب امهــــات المخاليــــــل = والميت ماينعى خلاف القضابــــه
وعـــــاداتنا الديـــــــان نوفي له الكيــــل = ثلاث مراتن خذه للي سعـــابــــــه
وصلاة ربي عــــد وبــل المخـــاييـــــل = على النبي اعداد وبل السحابــــــه

 

 

 

 

 

 

 

 

 

 

صح لسانك ولسان الامير عبيد الرشيد

 

 

 

 

 

 

 

 

 

 

قصيدة للأمير / عبيد العلي الرشيد يخاطب بن سليم أمير عنيزة :
يابن سليم إن كان غرتوا بالاطراف = ماتنتفع بالطهبله والتداهير
لو أخذتوا من زرع ابن جلعود منساف = ومن البقر رحتوا بعجلن على خير
لو تذبحون من البقر تسعة آلاف = ماهن لموتاكم بيدن حواوير
حنا اليا غرنا طعنا بالآلاف = تلقا القلايع مثل آفام الخنازير
مع كسبنا تلقا مظاهير وعطاف = وتنعزل خلفاتها والمغاتير
ننصا المشايخ مانجنّب للاطراف = كم نزلتن باطرافها نضرب الزير
عسى بحق أمره على النون والكاف = بالوالي اللي يعطي الشر والخير
يرميك واركابك من المشي وقّاف = مايهزمنك مهزلاتن مقاصير
وآتيك فوق اشمّرتن توهف ايهاف = مع وجه جمعن مايهاب الطوابير
يوم اشتهيتوا حربنا عقب الاحلاف = ودّي حلالك من ابعاد المناوير
وان طعت شوري فاسع باطراف الانصاف = ببضاعتك واضبط حساب الدنانير
أعمى بريده لايدزك بميهاف = تبتع ذلولك في عمى سالف البير
واتعب لمجلّي الشفاتين بلحفاف = وارقد معه وادغث عجاج المباخير
شوري عليك عن المغازي والانكاف = ترى ذهاب النمل سعّيه بتطيير
مولمن شقراه شاف ماعاف = مع الغتاره عابيّن للمصادير
نصيحتن كان انت للنصح عراف = وان كان تبغينا ترانا محاضير
دون الجبل نروي رهيفات الاسياف = على ظهور امعسكرات المسامير
ومتى يحسّب نايفن وابن حلاف = ومن حالفه قومه برزّ المعاذير
إن ساعف الله جمعنا تاتي ارداف = وتالي سنتكم تلعبون المشاوير
أخوك عن غوجه ارمي له بمعطاف = ذكّور مروين السيوف المعاطير
يتلون من هو للمصاعيب عساف = اللي على الشدات يلقى اليا دير
لولا مدارانا قريب ابن عياف = يسقف عليك العج مثل المعاصير
من فعل قومن مايحملون الاعجاف = ماساقو الخاوه لعوج المناقير
وان صاح صياحن على راس مشراف = فزعاتنا مع كل ريعن دعاثير
عملت لك درعن وهو جلد خصّاف = تبغى تصوغ القيق سوغن على الكير
من صوغهم عجزوا يدانون الاضياف = اللي مراجلهم بثرها مخاسير
السور مايبنى بعيدان صفصاف = وبالسوق لايغريك رقص الجزازير
تمت وصلى الله على طايفن طاف = على البيت يرجي من كريم التياسير

 

 

 

 

 

 

 

 

 

 

تقبل تحياتي واعجابي بما تكتب لنا من اشعار الفارس والامير عبيد الرشيد

اخوك عواد الخريصي

 

 

 

 

 

 

 

 

 

 

الأخ/ عواد الخريصي
شكراً لك ، وما أقوم به فهو الواجب .

وإليك هذه الرائعة من روائع الأمير / عبيد العلي الرشيد (يرحمه الله ) :

يالله ياللي تبدي الخلق وتعيد = واليا بغيت أمرن قضيت المرادي
يالواحد اللي من ترجاك ماصيد = ومن هو بحرزك لايذن مايصادي
جونا وجيناهم وصارت مطاريد = بيومن حصل به مثل يوم التنادي
ياكن جدع الروس حذف الجلاميد = كرامتن للي نصا الجيش بادي
يوم إن بعض الناس كسبه بواريد = ترا كسبنا روس العدا بالعوادي
وردنا برعن عقب الاقفا مواريد = كن يحداهم من ورا الطعس حادي
وردنا بسمحين الوجيه الاجاويد = ونادى لهم من عند ربي منادي
خلوا جنايزهم سوات المجاليد = بصوارمن بايمان غوش الجهادي
يتلون حرّن دايمن يفرس الصيد = خلّى بديد الريش مثل الجرادي
قديم مصرعهم بشر باسق القيد = وأمر لهم والي السما بالحصادي
أطيابهم رمّيو على صحصح البيد = كلن على مضرب نطيحه إيفادي
شكرن لمن حطه بروس النماريد = دوارة الفتنه على غير جادي
وش يطلع المملوك من ولّية السيد = ومن خلقة الدنيا وحيّه يسادي
وعن طلعة اللي فات بشّر بتجديد = وردّه شرايد بيضهم بالحدادي
لعيون حسنا ما تعرف التسانيد = نروي السيوف ون عرّضت بالمعادي
يوم اعترضناهم بزينن وتهديد = عذره يبي منّا يقول السدادي
تاهت بصيايرهم دروب المواريد = ولا لهم من قايد الرشد هادي
وصلوا على اللي مهد الدين تمهيد = ماشيف فجرن مع شفا الشرق بادي

أخوك / أبو مازن

 

 

 

 

 

 

 

 

 

 

وهذي من عندي

يقول عبيد العلي الرشيد :-

بالقلب من كثر الهواليس هوجاس=والنفس ماتصرى بليا دواكيك
والخلق حكمه عند قوّات الانفاس=وحنا تحت حكمه عبيدٍ مماليك
واحلو لطف الرب من عقب الإيّاس=ياحلو تدبيره بهذي وهاذيك
يادار ياللي من ورى غر الاطعاس=لاتحسبين اني على الطول ناسيك
انا بشير اللي يديرك بالافلاس=وقبله نصحتك عن توالي محاكيك
يادار خليتك علشان عباس=ولغير عباس فلا ني مخليك
ولاني بحال اللي زعل ساس او راس=إن كان من حضرك والا من بواديك
يادار ماعندي حذا السيف والفاس=وقبس ٍ يهدّم مانبا من علاليك
الا ان تبعتي ملة الخلق والناس=وتبتي عن الفايت وعفتي طواريك
يادار مايجلى صدى القلب وعماس=الا بمنصور ٍ وربعه نفاجيك
ارجي برب العرش مع باني الساس=على شريعة من نهى عن مخازيك
ان ساعفت نقول لك يأم الاجراس =وبدم من يبغي خرابك نحنيك
يابوحمد لاتكربك قوم درباس=ولا تزملك شاشاتهم والدبابيك
ولا بالمثل فزعو لهم قوم فراس=ناتيك بجموعٍ يروكن ترويك
إفهم جوابي واوصله يابو حواس=وان وسّرو وسرٍ سعينا بتفكيك
الحر يستالف على قرب الاوناس=ولا ظنتي يستالف الباز والديك
والخيل ماجتنا شرنٍ بالاكياس=بوقايعٍ ناطى بهن المداريك
كم نزلةٍ بأشناقها نضرب الطاس=هثلات بالبلدان نقعد شواويك
والحضر بالبلدان ياكلهم الحاس=ناسٍ خيايطٍ وناسٍ حواويك
حنا هل الصولات والحرب والباس=ونبّرك الفسقان بالقاع تبريك
حنا مشاتينا على كل عرماس=نحايفٍ ياتن مثل المساويك
وجنايبٍ تبرى لنا قب الافراس=واحلو قول الغوش حيّك على ِحيك
وصلاة ربي عد مانفّس الناس=او نبت نبتٍ او سعى له بتفكيك

 

 

 

 

 

 

 

 

 

 

قال عبيد هذه القصيدة بعد الغارة التي شنها على عنيزة سنة 1261هـ

وبعد معركة بقاء الشهيره التي كانت سنة 1257 هـ باربع سنوات

ويتوعد فيها الامير أعدائه ويصف الغارت :-

الحرب شبّ وطاري الصلح مافـور=من شب نار الحرب من صَلْوَها ماع
ارجي عسى ما قايد الضّد منصـور=آميـن ياللـي للمخالـيـق سـمّـاع
ولا يرتفع حظّه الى نفخـة الصّـور=ولا يقبل الله دعوتـه هـو والاتبـاع
والميت منهم ما يخلّـد مـع الحـور=ولا لهم في ماقـف الحشـر شفّـاع
يا دارنا مـن جـاك يبشـر بعاثـور=غير الضيوف ومـن تنصّـاك بيّـاع
من لانحـاه الحـق ننحـاه بالـزور=بخفر الهنادي مع شبا كـل شعشـاع
كم واحـدٍ بحرابنـا طـاح منحـور=توطّته صمّ الحوافـر علـى القـاع
خِلّـي تعشّـاه الحواويـم و نسـور=وسَبْع الخلا يفرس بها كل ما جـاع
من لابةٍ فعله مـع النـاس مشهـور=بديار سلطان العجـم صيتهـم شـاع
الحرب تبنى له بيـوتٍ كمـا القـور=ومن سابقٍ عاداتنـا ذبـح الأفـزاع
يابن سليم إن كان أخذتوا لنـا ثـور=وحطّيت لك ناسٍ يدورون الأطمـاع
ياما نصحتك مار مـا تقبـل الشـور=تمشي لنا شبرٍ ونمشـي لكـم بـاع
و بالشّر نجزي من بلانا على النـور=ناتي حثاحيـثٍ علـى كـل مطـواع
وإن كان لك ضرسٍ مقزّيك منخـور=فحنّا لكـم قـازٍ وللضّـرس مقـلاع
نكوي نحانيحك ونرضف على الزور=لما توقّـع مـن ثناديـك الأضـلاع
فإن ما نفـع هـذا نحمّسـك بتنّـور=لمّا تطيب امن الصّخونه والأوجـاع
يا ثور ياللي منـت بفـداك منقـور=هـذا جـزا هلّـت دبيبـه للادمـاع
وإن طعت شوري لا تباعد عن السور=واعط الغريم امن السناعيس الأطماع
بالله مكسـورٍ وبالخـلـق محـثـور=والرّيح نامت عن هبوبـه وذعـذاع

 

 

 

 

 

 

 

 

 

 

من منتدانا السابق !!

اقتباس : كاتب النص الأصلـي : الاصمعي
25 / 9 / 2003 م

بسم الله الرحمن الرحيم

أعزائي الكرام ،،،،،،،،

السلام عليكم و رحمة الله و بركاته ،،،،،،،،

أشارككم هذا المساء بفهرس قصائد الأمير الفارس / عبيد العلي الرشيد و من لديه إضافة أرجو أن يشارك بها و يكتب معها المصدر حتى يكتمل معنا ديوان هذا الأمير الذي من واجبنا حفظ إرثه الأدبي .
طبعا ً يكون ذكر المصدر الذي تكون فيه القصيدة أطول رواية ويترك ما سواه :

1 ) يا لله يا للي تبدي الخلق وتعيد ** و ليا بغيت أمر ٍ قضيت المرادي
2 ) القلب من كثر الهواجيس هولاس ** والنفس ما تطرب بليا دواكيك
المرجع : خيار ما يلتقط من شعر النبط .
3 ) يا بيه أنا لكروش لا أعطي ولا أبيع ** قبلك طلبها فيصل ٍ و بن هادي
4 ) القلب من كثر الهواجيس قزان ** ما يستريح من الدهر ربع ساعه
5 ) العيد عيدناه بقصى صعافيق ** والعيد الآخر بالحفر والدجاني
6 ) نفسي تمنيني لرقي السنودي ** مع لابة ٍ توزي نفوسه على الكود
7 ) كان رب السموات أمرنـــــا ** و نستعينه مدير الهبايب
8 ) حنا لأبو تركي من أمس ٍ و باكر** سيف ٍ على العازه للأصحاب والقوم
9 ) حنا على اللازم بوقت اللزايم ** ليا صار لك من لازم الدهر ملازيم
10 ) دار ٍ بحد السيف أخذناه يا سيف ** خبرك وعج الخيل مثل الكتامي
12 ) بالله يا ركاب هجن ٍ هماما ** رواد من كثر الأوما نحايف
13 ) الفود الأغشر صار فودك يا بن روق ** وأشوف تالي زودكم صار نقصان
14 ) ما حسب طاري المرجله عنكم عيب ** لا قلت فكوا زملكم يزعل الشيخ
15 ) جاني جوابك يا الشجاع بن هادي ** تقول لي بكروش عنك مثاني
المرجع : مخطوطة بن يحيى .
16 ) يا مل قلب ٍ فيه تسعه وتسعين ** هجس ٍ و هاجوس ٍ وعدل ٍ ومايل
17 ) طلبت ربي عالم السر والغيب ** يقبل صلاتي له و يقبل صيامي

18 ) يالله يا للي عالم ٍ كل مكتوم ** الطف بنا يا عالم السر والغيب
19 ) طلبت من يعطي العطايا ليا سيل ** اللي عن الطلاب ما صك بابه
20 ) يا نعيس ماني كاره للقوامه ** إلا ولا هو مكرب ٍ حرب ثلاب
21 ) يا شيخ أنا جيتك مسير وبلاس ** باغ ٍ أشوفك يا مضنة فوادي
22 ) السيف يا ربن الونيات ما جان ** هو خفى أو باقوا عليه المراسيل
23 ) يا بو شكر يوم أنت قبل ٍ عميلي ** وعرضك نقي ووجهك أبيض من الشاش
24 ) الحرب شب و طاري الصلح مافور ** من شب نار الحرب من صلوها ماع
25 ) يالله ياللي للجزيلات وهاب ** تعطي ولا جزل العطا منك ممنون
26 ) حي الجواب اللي بخط ٍ لفاني ** من واحد ٍ ما واهس القلب ناسيه
المرجع : الأزهار النادية في أشعار البادية .
27 ) أغليت من شانك جميع الهزازين ** و أبغضت لجلك جميع الطوايف
28 ) قل للعدو اللي تبهج بالأسرار ** وفرح على أمر ٍ نازل ٍ من سماها
29 ) يا رب أسالك يا عزيز الجلالي ** يا من جعلة العقل نور ٍ بالأشباح
30 ) طلبت علام السراير و الأسرار ** علام ما بالصدر لو كنت مخفيه
31 ) ما هو مهم ٍ فيصل ٍ وبن هذال ** اللي مهم ٍ بلشة ٍ به مهنا
32 ) يا رب أسالك يا قديم القدايم ** بالكهف والكرسي و طه و الأنفال
34 ) حمدا ً لعلام السراير ومشكور ** يا غافر الزلات يا خير هادي
35 ) ما ذقت شي ٍ عنك يا طوعة الراس ** لوهو من المطعوم شي ٍ قلايل
36 ) ليلي طويل وليل زامل قصيري ** هذي تصاريف القدير يا بن سبهان
37 ) ناح الحمام بعاليات المقاصير ** وأهل الهوى طربين ما يسمعونه
38 ) ضياغم يردون حوض الزحام ** يردون لامنه غشا الناس الأبداد
المرجع : قصص الآباء و الأجداد .
39 ) يا حمود أنا عارضي شابي ** طرد الهوى جزت أنا منه
المرجع : ديوان السامري والهجيني .
40 ) توني عرفتك يا عوين المصاليخ ** أنت العوين اللي بتالي الزماني
41 ) ذيب المقنع يا خذ العصر سجه ** مخاشر ٍ هو يا النسور البقاعي
42) قبلك بهيج حدروه السناعيس ** من عقدة اللي ما يتزحزح قناها
43) يا غافر الــــزلات يا والي الاحسان تجعل من التقـــــوى لنفسي بضاعة

و دمتم ،،،،،،،،،،،

انتهى الإقتباس

تحيتي لكم

 

 

 

 

 

 

 

 

 

 

حنا بهالمنتدى هذا نحاول نجمع تاريخنا من الضياع ،، وأن نحفظه للأجيال القادمه ،، فأحببت أن نجمع ديوان الشاعر والامير عبيد العلي الرشيد ،، وحتى نسهل على المتصفح البحث ،، بدلاً أن يبحث في أكثر من صفحه ومواضيع مخلتفه ،، بل نجمع له هذه القصائد في موضوع واحد ،، باسم ديوان الامير عبيد الرشيد ،،

--------------------------------------------------------

اشكر كل من ساهم في تجميع ديوان عبيد ابن رشيد

وانني مستعد لمن يريد او ينوي طباعة ديوان عبيد ان اقدم له كل مساعدة مالية و فنية ويمكن الاتصال بي عن طريق المنتدى

 

 

 

 

 

 

 

 

 

 

جزاك الله الف خير وهالامور ماهي غريبه عليك يافيصل والطيب ورث