من اشعار الشيخ شلاش بن سعيّد احد فرسان واعلام قبيلة شمر ..
يقول الشيخ شلاش بن سعيّد:
يامغير هيّا لاتطيع المشيريــن = انحش عن الحضران ياجاء بشيره
من فوق حمرى تبعدك عن هل الدين = وندور الاطماع في كل ديره
هل الدين : الي يضهر يقصد رجال من الاخوان بوقتهم .
رد الشيخ :مغير الغازي :
انا براسي هومة مادري وين = يم الصفاة او مادري يم الجزيره
انا اليا شفت الشويعر يزكين = لواني بخير قلت ماني بخيره
يقول الشيخ شلاش بن سعيّد...
ياركب حرن بعاداً معاشيه = مع البراحه ينهذب تــقل خــــيال
لولا الشكيمه يقضب النضو راعيه =ماتلحقه صم الحوافر اليا حال
سقفن عسى غر المراهيش تسقيه=من نو مزن تالي الليل هطال
يامن يصون العلم لمغير يديه =عشيري الـــلي للثقيلات شيّال
الله يلومه كل ماحل طاريه =اصلح وخلا ني وراى نايف الجال
من الذي يهرّج خويه ويغويه = قطاف زملوق الثريا اليا طال
وراه ماصافاني وانا مصافيه =نودع له مع جرة الزود مجدال
فرد الشيخ مغير بن غازي :يوضح له و معتذراً...
حي الكتاب وحي ياراسل راعيه =سلام احلى من لبن در الاجهال
ياشلاش واعلم لفاني مع مهاديه =وش قربن للوم يافرز الابطال
الدين كم واحدن نوخة بيه =حسين الدويش ونوخة ببن هذال .
لك منزلن يم الصهاميم تطريه =ماتقبله كبدي مع البدو نزال
واخانة الابيض كوى كبد راعيه =بايسرغنومه يقضب البطن سلال
واليا اجذبت هل الهداريس تقزيه=ماعندنا مسعر على الزمل نكتال
وطيرن بلا ريشن على الكف راعيه =لو طب صيد القفر ماينقضي حال
والراس يرمي من زعانيف راعيه =ياصار مالك لابه ضلهم مـــــال
:
يقول راعي قفار من الخشيمات بقصيده موجهها الى الشيخ شلاش بن سعيّد
راكب ملحـا سـوات الغرابـي= ذرعانهـا كنـه ثيـاب مداليـك
لشلاش مدينه بسـوادٍ وعتابـي= ونذكرك ياشلاش بعنف ماضيك
(وجو) يسود لك بروس الهضابـي= ويطلع بقنيان سوات المشاكيـك
وطلعه لنا وعنده نقص الرقابـي= واصبح لنا والملك ياشلاش يفديك
واللي مضى منك مقيد بالكتابـي= ونبركك من حيث ماجيت تبريك
ياجيت عند الحكم مثل المصابي= تكلح بنيبانك سوات المساويـك
:
فرد عليه الشيخ: شلاش بن سعيّد من العليان من الدغيرات :
يادارنـا يـامـل نوّ السحـابـي= غرّ المزون اللي تسقي مغـــــانيـك
ونجيك من( سنجار )فوق الركابـي= ولاينشكي همك على غير اهاليك
يـادار لوحنـا بعيـدن غيابـي = لازم علــــى كور المــــواجيب نــاتيـك
ناتي على هجنٍ سـوات الذيابـي= عتلات يقطعن الفيافـي بتفنيـك
القرم يشرف للنضـا كـل نابـي= والعفن يامنبوزة الـورك يتليـك
وحمد يوردهن بعـد كـل هابـي= لاازم ذلولـه ياذلولـي تبـاريـك
ونهار عمره ماحسب له حسابـي= شال الزعل يادارنا عند طاريـك
ضرب نطيحـه وسـده للترابـي= بمفتـل خلـت عظامـــه دهـاليـك
ومعيزركان الزول دونه سرابي= بالشوف عن كل الاخطار قاديك
وانا سعدنا بـه علـى ماهقابـي= ان عشت من دم المعادين نــرويك
هو أن نطحني قلت ماكل شبابـي= وانا ان نطحته قلت هذي بأثر ذيك
عينيك يالبطحا عذيـت شرابـي= (ياجـــــو )خلينـاه باسفـل مطاويـك
يجضر كما يجضر بعيرٍ امصابي= ويسحب برجليه سوات المساكيك
وانا وربعـي لحكمكـم مانهابـي= ويامن طمع بالدار يرى فعلنا بيـك
(وجـــوٍ ) لنـا مانتركـه لذيـابـي= ولاعاش من يزحم وطنا شراويــك
وحنا لمثلـك يالموهّـق ذهابـي= نموت ولا يمشي علـــينا تحديـــــك