البارحة يوم أدبر الليل ياحمود=طواريٍ هاضت على البال وأحتاس
هواجسٍ بالفكر والصدر ملهود= يدك به سوجٍ وموجٍ وهوجاس
تارد كما عد من النّاس مارود=في تالي الكنّة والأوراق يباس
بطلوع نجمٍ ييـبس العشب والعود=كنّة مزونه وأخضر النبت بحماس
وسبل الشجر يومي بهاء لاهب النود=وعلى خضار الأرض رمل الوطا داس
نأخذ مع الأهجاس سجات وركود= أقوم وأجلس ساهرٍ تقل حرّاس
ياطير ياللي بالهوى تأخذه هود= عطني جناحينك وبدلك بلباس
أبي أرتفع ورقاء صخر كل جلمود= وشم هوى الغربي لياهب نسناس
نفضي بهاء صدرٍ غثا البال به زود=وروابعٍ تأخذ بنا أخماس وأسداس
سير الزّمن يقودنا للقبر قود=وقلوبنا عن مقبل الوقت غطّــاس
وفواجع الأيام وكوارثه كود= يغوص به من غاص وبه قاس من قاس
لكن أتعظ ولا باب الأرزاق مسدود= ما دمت حي وسبت الأقدام لك ساس
خوافي الأيام تطوي بنا الجود= وغيب الزّمن وفواجع الوقت دساس
ياطاف ثلثين تــــر النافلة فود= أسجد لرب يدفع الشر والباس
من قبل يومٍ فيه شاهد ومشهود= وحضور منهم كلفوا بقبض الأنفاس
وعمر الفتى معدود والوقت محدود= ساعات وأيام والأعمار بقياس
ونشيل من دارٍ كما كنت موجود= وننــزل بدارٍ مظلمٍ نحت بالفاس
دارٍ ظلام وإقامتك ماله أحدود= في جوف قــــبرٍ مظلمٍ تدمس أدماس
يهجم عليك الدود وأنت زاد لدود=وتطوى صحايفنا كما طي قرطاس
نطلبك يامعبود ياخــــير معبود= في ظل عرشك ظلل الجسم والرأس
ونجتاز نارٍ فوقه الســــير ممدود=أسرع من اللي شع في سحب وأنفاس
ومن زل به سبت القدم ماهو مردود= في خبر كانا وأنت به تنذر النّاس
وختمت مابرمجت وأنهيت ياحمود =بأزكى صلاتٍ ما ذرت ريح الأطعاس
= شعر بهلول حمدان الشمروخي
البارحة يوم أدبر الليل يا حمود
العرض العادي
