لاطال ليلك واسهرتك الهواجيس = والنوم جافا العين والبال حيران
وفي داخلك كثرت هموم ووساويس = وابليس يوسوس لك عن فلان وفلان
انهض من فراشك تعوذ من ابليس = واسبغ وضوءك واطلب الله غفران
وكبٌر ولا تترك دموعك محابيس = ناج الولي خلاق الإنسان والجان
واطلبه عفوه خل عنك الدنافيس = لاحل عفوه فأبشر بخير وإحسان
كريم وخيره دون حد ومقاييس = واحد احد قيوم قدوس رحمان
واحذر من دروب الخنا واللواليس = درب الردى دايم نهايته خسران
وابعد عن اللي في المراجل مفاليس = وقت اللوازم يختفي دون عنوان
وانص النشاما لابغيت المجاليس = والشهم دور خوته وين ماكان
واترك من هروجه شكوكٍ وتلبيس = اللي يوسوس صايرٍ تقل شيطان
وإن كان صدرك ضاق واحتجت تنفيس = دور على اللي راجح العقل فهمان
يعرف دروب الخير ودرب المتاعيس = رايه سديد وفي المواجيب بطران
دنيا بها الصالح وفيها المناحيس = كلٍ نصيبه ياخذه دون نقصان
( احمد بن ناصر المحرج )