الشعر منقولٍ أو النقل مشعور
------- والا المشاعر غايبة عنه مرة
كنه يعايش حزة الظهر ديجور
------- وعيونه تناظر نجوم المجرة
لو قيل له معذور ماهو بمعذور
------- وكن الذي ينقال مما يسره
شاعر ومابه ذرة أحساس وشعور
------- ياليت مره لو ضميره يمره
ويا حبذا: عاجل وبالحال بلفور
------- من قبل يغرق في بحور المغره
يستظرف الجمهور في حب غندور
------- والقلب من بين المحاني تجره
مزيونة ماهي سوى خط بسطور
------- حتى بوسط الخط يجهل مقره
اعمت عيونه عن هناديب وشرور
------- وابعد عن الواقع بخيره وشره
والمشكلة لا صار جاهل ومغرور
------- وان صفق الجمهور بالحيل غره
واهتز جأشه وانفتح كل مجرور
------- والضمة اللي خايلت لين جره
والنقد؛ له في ساحة النقد جمهور
------- وغسيلنا بين الخلائق يشره
ماجور يامعهد هل النقد ماجور
------ اصبح معاك بتالي الوقت ضرة