السلام عليكم ورحمة الله وبركاته
اقدم لكم هذه الابيات الشعريه واتمنى ان تحوز على اعجابكم
------------------
نسيج(ن)على ماجال في خاطري والبال=مشاعر لشاعر حالته بين حال وحال
الاولى تشجعني على البث والابداع=والاخرى تمانعني عن البث والارسال
يضيق الصدر ياشفت كيل(ن)بلى معنى=على وزنة(ن)دون الطلب يرجح المكيال
صحيح الجزر والمد في حكمة الامواج=وانا عارف المخرج وانا عارف المدخال
مشاوير وقتي مشورتني وشفت وعفت=مشيت القصير من الدروب ومشيت طوال
رضيت وزعلت وقلت واشغلت تفكيري=تماديت والعزّه لمنهاي راس المال
زماني عطاني درس واعطا هذاك وذاك=وعطا الراحل النازل مع النازل الرحّال
وقوفي على راس الجبل والنظر مرفوع=عطاني شموخ المعتلي فوق هام جبال
قبلت التحدي والمداخيل والمطلاع=ومداهيل هوجاسي على طيّب الافعال
دخلت وطلعت وشفت ماغثني بالحيل=تكدّر مزاجي من علوم(ن)تغث البال
لقيت الحقايق بين طياتها التزوير=على حساب تجّار الدعايات والاهوال
انا ازعل اذا قالوا لي الخال صاير عم=ويزيد الزعل ياقالو العم صاير خال
انا ازعل اذا شفت المباني ضعيفة ساس=وانا ازعل اذا شفت الذكي ماعليه عقال
انا ازعل اذا شفت السوالف خطا تندار=من القايل اللي ضيعه بين قيل وقال
انا ازعل اذا دار الزمن للعزيز وذلّ=ياكن الزعل ياخذ من الزلزله زلزال
انا ازعل اذا شيل الكبير ونزّل حجمه=على القاع وبحجمه عليه الصغير يشال
انا ازعل اذا بوذا تعدد تماثيله=ولقينا بدل تمثال واحد مية تمثال
انا ازعل اذا ركب الفرس واحد(ن)خواف=ورعاة الفرس تضحك على الفارس الخيال
انا ازعل اذا الفنجال قدم لعشر وخمس=وعلى العشر والعشرين ماقدم الفنجال
انا ازعل اذا شفت المهازل تغازل ناس=وتبرمج رقوم المهزله داخل الجوال
انا ازعل اذا حصّلت حبل الوفا معقود=على عقدة الخاين ولا حلّه الحلاّل
انا ازعل وانا ازعل والزعل حدني للقيل=غيور(ن)على ربعي وانا الشاعر ابن رمال
هواجيس شاعر ياطلع يرقب المرقاب=والى من نزل ياخذ نزوله من الشلاّل
------------------
وسلامت عيون من تابع
اخوكم الشاعر
مرزوق الرمالي
!! .. دخـــــلـــــت وطــــلــــــعـــــت .. !!
العرض العادي
