يااللي جعلت الحلف باالله عادة ** وش بك حلوفك كاثره باالزيادة
احفظ يمينك كان تبغى السعادة
الحلف صعب بربنا خالق الكون
ادناة شيٍ يحلف بدون رادع **والنصح ما ينفع لمثله وضايع
للي يبي صالحه ماهو بسامع
مثله كثير بكلِ ساعة يحلفون
مرة بمطعم كنت عند المحاسب ** قد شفت كبار مفتلين الشوارب
والكل منهم يحلف إنه يحاسب
وزباين المطعم جهتم يراعون
والبعض طلق زوجته الف مرة ** رجال ماعنده من العقل ذرة
انشهد أنه جاب لنفسه مضرة
ماهو بصاحي ضنتي صابه جنون
والبعض لو يعزم له خمسه رجاجيل ** يمكن يحط الهم ثلاثٍ من الحيل
ماهو كرم ذا شغل ناسٍ مهابيل
إسراف وتبذيرٍ يبي الناسِ يدرون
واحدٍ تشوفه مع حريمه بذا السوق ** متبرجات يشوفهن كل مخلوق
مافيه لاغيره ولاحشمه وذوق
يمشي ولا كن البشر له يشوفون
واحدٍ يدخن في الشوارع زقاره ** تلقاه واقف مرتكز وسط حاره
قدامِ طفل وشايبٍ له وقاره
ما ينٌصح راعي مشاكل وملسون
والبعض عياله كانه اذن يروحون ** من نفسهم يم المساجد يصلون
يشوفهم راحو ولا يحرك سكون
من كان مثله جعلهم مايعَدون
وعكسه رَجَال محافظٍ في صلاته ** يروح يصلي والولد في سباته
ما يامره ويقومه من مباته
بيسأله ربي وذا الشي مضمون
واحدٍ ببيت الله لبسه غريبي ** قميص وبرمودا وشكله عجيبي
يروح للمسجد وحاله صعيبي
مابه خشوعٍ وأزعج اللي يصلون
والبعض يستقدم عماله اجانب ** يفكم ياخذ عليهم ضرايب
وإلا ببيته ما يعطيهم رواتب
ماخاف من ربه تركهم يجوعون
واحدٍ يطوٌل للمسجل بأغاني ** عند الإشارة يسمعه كلِ داني
من كان حوله قام سد الأذاني
واللي انزعج عليه قامو يدعٌون
والبعض يرمي باالشوارع زباله ** ماهمته ديرة ابوه وخواله
وفي خارج بلاده نضيفٍ وداله
تصرفه ذا عندنا شين ممجون
وختام قولي صلو بكل ساعة ** على الذي يشفع بزين الشفاعة
ياجعلنا في سنته والجماعة
واللي على سنته دايم يسيرون
( احمد بن ناصر المحرج )