يا صاحبي والهم ، لابد منّه ،،

بسم الله الرحمن الرحيم
والصلاة والسلام على اشرف المرسلين
والسلام عليكم ورحمة الله وبركاته ..

يسعدني مشاركتكم هذه القصيدة ..


يا صاحبي والهمّ لابد منّه
ما تنثني هامتنا ، من معاسير
لا ورّد المجهم من الحمل دنّه
تاخذ حموله مقدمات المغاتير
و مدام خلّي مشغل البيض فنّه
والله ، ما أعبس لو تزيد المخاسير
إبسم و حوّل ، مجمع النار ، جنّه
وأقلب أجيجهْ ، شقشقات ومزامير
ثم أستمع و أعطن دقايق لـنّه ..
هاضت حروف لبسمتك بالتصاوير
لي صاحبٍ ، كنّ العجايب نصنّه
وكنّ الأكابر .. في حضوره أصاغير
وكنّ الكواكب ، يومها تدور .. منّه
وكنّ النجوم .. بمسرحة ، الجماهير
تجذبْ مداراته .. بعيدين عنّه
وتنسف قدراته ، طموح الأساطير
ضعيف متمكن من القلب ، رنّه
قوي لكن ، ما يسوق المناعير
مخلوق ، خالقه ، جمع فيه فنّه
أضفى على الدنيا جميل التعابير
لو يفتح الشباك ، بالليل ، فـ إنه
تصحى تغرد فوق غصنه ، عصافير
الشمس أو هو القمر ، يمكنّه
ما بينهن أوجد تمازج معاييير
بين " البياتي " و " النهاوند" كنّه
يعزف من المغنا .. على شطْ إزمير
أخاف ، لا مرّ الورود إقطفنّه
لنّه أرق من الورود المزاهير
وأغار ، لا صارت حروفي يجنَّه
وأغار لا من اسمعوها جماهير
الناس عندي كل أبوهم سنَه
حيثك وجوب ، ومعطياتك تفاسير
يا أعطر من الريحان ، لليّ يحنّه
و أروى من رياضن بوسطه نوافير
مدام عيني .. ترتوي ضحك منّه
" والله م أعبس لو تزيد المخاسير "


تحياتي لكم جميعاً
أخوكم عبدالعزيز حمد