دخلت مجلس فيه ناسٍ كثيرة ** متنوعينٍ والعزيمة كبيرة
ياكثرهم لافين من كل ديره
احدٍ يسولف واحد داله وسالي
جلست قدامي شبابٍ مرسم ** شكله غني وواضح انه مدسم
وعلى يمينه شخص تافه منسم
سطحي ولا يعرف علوم الرجالي
اصد بعيوني واعود اراعيه ** القاه يناظرني وانا احترت وش فيه
مانزل عيونه غريبه مواريه
من نظرته حسيت كبر وتعالي
هملته ما عطيته اي إهتمامي ** ولاعاد عاينته اخاف الملامي
متكــــبر ومافيه اي إحترامي
ومن كان مثله لاتلقٌيه بالي
يومٍ بدو القهوه علينا يصبون ** مدو له الفنجال ماحرك سكون
ولاتقهوى بينِ ناس يتقهوون
شكله غني عنده فلوس وحلالي
ساعة على ذا الحال مدري علامه ** غريب طبعه او قليل الفهامه
ياربنا نسألك ستر وسلامه
وتعيذنا من فاجعات الليالي
قالوا هلا تفضلوا في عشاكم ** يامرحبا ربي يحيي نباكم
الله يسعدكم ويجزل عطاكم
تشريفكم لنا مقٌدر وغالي
بعدين جى واحد بخطوات موزون ** مسك يده يمشي قدامه على هون
وانا لهم اناظـــــر مفتح عـــيون
وعرفت انه كفيف واعزتالي
فاضت دموعي غصب من وسط الأعيان ** عاتبت نفسي ليش انا اسمع لشيطان
ياليت مـــاضنيت اشكال والوان
عفت العشاء مدري وش اللي جرى لي
هذي لكم ياناس مني نصيحة ** لاتضن في مسلم ضنونٍ قبيحة
يمكن ضروفه صعب وحاله جريحه
نحمدك يارحمـــــــــــــن اول وتالي
( احمد بن ناصر المحرج )