نواف وأن جونا هل الطيب به طيب= أيقف لهم ورحب بنفسٍ بشوشه
وقدّم من الماجود بلطفٍ وترحيب= وأحذر كلامك لا يجي به حروشه
أجعل لهم بين الضلوع المحاديب= مكانةٍ وبالعين تفرش رموشه
وخلك كما حيد تحفه شناخيب= حرش اليدين النايشة ماتنوشه
المرجلة عدٍ وروده جواذيب= يوم الردي يظمي وتظمي طروشه
والنّاس طبعه تذكر الطيب والعيب= يحكون بنقوص عليك أمخشوشه
والحكي شوك الكبد يخطيك ويصيب= ويعيّب السلعة خفايـف كدوشه
وتر الكلام الزين زاد المعازيب= يجبر عظم جسمٍ بدابه هشوشه
أبيك من اللي ينطحون المواجيب= يوم الغني يفخر بماله وبوشه
ودنياك ما دامت لنوحٍ ولا شعيب= والروح طير وكل طايش يطوشه
ولا كل غزّاي يجيب المكاسيب= والعمر لابد المنايا تحوشه
نمرض ونطيب وثم نمرض ولا نطيب= مهما تهوش الموت محدٍ يهوشه
تقفي بنا سفن المنايا جناديب= ورصاص رمي الموت يلفظ قفوشه
يا الله يا اللي تعلم السر والغيب= لا تحيجنا للعفن وزايد قروشه
وتجعل لنا في جود جودك مقاضيب= يا مدبّر السقّاء بوردة عطوشه
والخاتمة ختمت قافي بترتيب= بأزكى صلاةٍ مانزل من رشوشه
=شعر/ بهلول حمدان الشمروخي الشمري