هوجاس صدري والزّمن رابكه ربك= ورثه من الإحداث هم وحماقه
يفر فرّة خايفٍ موجسٍ دبك = ضعيف حال وضاهدينه رفاقه
عليه ضيم والقهر لابكه لبك= يأخذ مع الأوهام فاقه وفاقه
مشاكله بأ قصاء الحشاء تنعبك عبك = ويصعب يميّز جلّها من دقاقه
نواف خذ منّي بيوتٍ بهن حبك =من قبل رحلاتٍ يطوّل فراقه
أحذر عدوّك لو ضحك لك وصاحبك =لابد من يومٍ يبيع الصداقه
وتشوف من جور الزّمن شيء يرعبك =والنّاس يظهر صادقه من نفاقه
وتعرف رجال بالصرايم ذرا شبك = تظهر كما بيتٍ ركيكٍ شقاقه
ما تدفي الأجسام والبرد صايبك =تلوف صلفات الهبايب رواقه
وعن الردى والعيب نزّه شواربك = وخلّك كما حصنٍ حصينٍ غلاقه
وعن ما يهين النّفس قلل مطالبك = خلّك عزيز والعلاقه علاقه
وأحذر رفاق السو تضعف مذاهبك = ما ينوثق به وأنتبه من بواقه
عند أتفه الأسباب تعلن معايبك = وأردات شيءٍ يسرقونك أسراقه
وياغبت عند النّاس قالوا عذاربك = وصورتك عند الخلق يظهر حراقه
عليك باللي من صفاء البير يجذبك = بعطف ولطف واحترام ولباقه
قلبي معك وإحساس فكري تراقبك= نخشى عليك من الهماج ومذاقه
وإلاّ أدري المقسوم من الله صايبك= لا شك من حرصي عليك بشفاقه
من زود ودّي لك لساني يعاتبك = يخاف ميلات الزّمن وأنصفاقه
أخاف تسمج والمشارب مشاربك = وترضى ملاح الماء وتشرب أطراقه
نواف
العرض العادي
