سألتهم وابغى جواب لسؤالي = من اللي كامل في نظركم باالأوصاف
عقب العصر واحنا جلوس بظلالي = انا وبعض الربع في راس مشراف
قالوا حَسِين الوصف فيه الدلالي = غروٍ جميلٍ مابها شي ينعاف
الى مشى يسلب عقول الرجالي = في زينها ما واحدٍ مثلها شاف
واثق بنفسه وإن هرج مايبالي = مايقنعه يفعله ماهمه اعراف
حسين طرفه دايم الدوم سالي = للي هوى عادل ولاعنده اجحاف
قلت اسمحوا لي وصفكم ماطرى لي = بيصير بيني وبينكم هرج وخلاف
الزين مشي البنت درب العدالي = في ذا الزمن كلٍ على بنته يخاف
الزين حشمه عن دروب الخمالي = ولبسٍ عليها ساترٍ لين الأطراف
وتحفظ فروض الله في كل حالي = وتعيش عيشه مابها بذخ وإسراف
ولوالديها ترخص ايات غالي = تبرٌهم لاصارو كبار وضعاف
كم واحدٍ مظهر وباطنه خالي = في عشرته ضيقة وفي هرجه اسفاف
الزين يَكْمَلْ باالفعول الجزالي = الى اجتمع زينه وفعله باالأنصاف
( احمد بن ناصر المحرج )