هذه الالفيه الرائعه لشعراء موقعنا الأعزاء
تم نشرها قبل أكثر من 5 سنوات !!
ويذكر الشعراء بهذه الالفية العادات الطيبه والافعال البطوليه الحقيقية لقبيلة شمر
ولا يسعني الا ان اقول لهم :
بارك الله فيكم وكثر من أمثالكم ....
والألفية تستحق النشر من جديد لما بها من إبداع شعري فائق :
الألف ، ألـف أهـلا وسهـلا وترحيـب=وارجو السموحه من جميـع اللواعيـب
عنـد الطنايـا منقـع الجـود والطيـب=بدا السبـاق وصفّـت الهجـن والخيـل
أهـدي سلامـي للـرجـال الكـرامـا=واللـي يجـي بعـدي معـاه الزمـامـا
خـلـو قمـرنـا يكتـمـل بالتمـامـا=مدحـن وتوجيهـن ونصـح وتماثـيـل
أمـرن مـن السكبـه نجيـب القوافـي=ابشر بنظم(ن) من هـل الشعـر وافـي
مافيـه منقـودن عـن الغـث صافـي=يعجبك نظمـه مـا يجـي فيـه تمييـل
أرجو من اللـي يشتـرك يتبـع الـدرب=حرف(ن) ورا حرف(ن) كما مشية السرب
يتلون بعض بوجهـة الشـرق والغـرب=شدو على البـل وكربـو حزمكـم حيـل
أكثـر عـدد سبعـة بيوت(ن)بتحـديـد=ممكن نزيد ليـا بغـا الشخـص تمديـد
مـن خاطـر الشعـار هلّـت عناقـيـد=منظومت(ن) مـا جابـت القـال والقيـل
أديبـكـم ينـخـا جـمـوع النشـامـا=نقّـو مـن الملفـوظ عـذب الكـلامـا
حـذراك هرجـك لايجـي بـه مـلامـا=نبـي نشـوف افعالـكـم يالحلاحـيـل
أخـذت انـا الهمـزه وصـارت نصيبـي=عسـى ليـا منـا رميـنـا نصيـبـي
والـراي يخطـي صاحبـه أو يصيـبـي=واطلب مـن المولـى يجيـب التساهيـل
الباء ، بسمك سرينا ياعزيـز الجلالـي=انكمـل المنظـوم بحـسـن وجمـالـي
صغتـه مـن الياقـوت وحلـو المثالـي=وتحيـة(ن) منـي لجمـع الفطاحـيـل
بيـت العـلا مايوصلـه كـل رجــال=ودرب الـردى مايسلكـه طيـب الفـال
ومن يصنع المعروف يجـزى بالامثـال=ومن بذرتـه زينـه تزيـن المحاصيـل
بحـر الكـرم والجـود لشمـر مـزايـا=وحنـا شـروق المجـد جـزال العطايـا
وحنـا نجـود الجـود وحنـا الطنـايـا=والذيـب يشبـع لاعـوى تالـي الليـل
بأفعالنـا بالحـرب ترعـب ،، تروعـي=وحنـا الفخـر لاخضـبـن الجمـوعـي
مـن شفنـا بالحلـم لزومـن يفوعـي=شمـر مقابيـس المنايـا هـل الخـيـل
التـا ، تعاهدنـا بـحـزم(ن) وتوكـيـد=إنـا نشيـد صرحنـا خـيـر تشيـيـد
ياعزنـا مـا دامــت الإيــد بـالإيـد=بالخطـوه الأولـى بـدت رحلـة الميـل
تاريخنـا مـن عهـد الأجـداد حـافـل=فخـر(ن) لنـا يزهـي بكـل المحافـل
تشهـد لنـا الصحـرا ودرب القـوافـل=والجـار يشهـد والحـدب والمعامـيـل
ترا التواصي بيـن الأصحـاب مطلـوب=والكبر من طبع البشـر شـر مركـوب
راعي الشرف ماعذربـه رقعـة الثـوب=مادام عرضـه مـا حكـي بـه بترذيـل
تــم الـجـواب وربـنـا نستعيـنـه=فـي ساعـة الشـده وعينـي بعيـنـه
وحـذراك مـن شـر النفـوس اللعينـه=اللـي تــورّد صاحـبـه للتهـاويـل
(الثـا) ثمـان سنيـن صبْـر المهـادي=مـا مثـل فعلـه بالحضـر والـبـوادي
واليسر عقـب العسـر حكمـن وكـادي=ياتيـك مـن عقـب المعاسـر تساهيـل
ثوب الصخا غطى علـى كـل عـذروب=وولد الردي يقْصـر ليـا حـل ماجـوب
ومن شق جيب الناس شقو لـه جيـوب=كمـا تديـن تـدان بالـوزن والكـيـل
ثقـل العقـول تـوردك خيـر مــورود=وخـف العقـول تـوردك كـل منـقـود
ما ينعثـر شخـص(ن) تمشيـه بركـود=انجـز لزومـك بيـن ركضـن وتمهيـل
ثـم احتـمـل زلــة رفيـقـك إذا زل=خلـك وسيـع البـال لاتهجـر الـخـل
عقايـد الأحبـال تلـقـى لـهـا حــل=والهجر زرعه ما يجـي منـه تحصيـل
(الجيم ) جارك واكرم الجـار وان جـار=الجار قبـل الـدار ، لـه حـق ووقـار
واسـدل يمينـك لا تنـصـوك خـطـار=جـزل العطايـا مـن جـزال الرجاجيـل
جمّـل كلامـك واختبـر عـذب الألفـاظ=واحفـظ لسانـك لا تحـدث بالأعـراض
العرض ثم العرض مـا عنـه معتـاض=خلـك حريـص واعـي الفكـر حلحيـل
جسر المـوده بيـن الاخـوان موصـول=العيـب وارد لـكـن الـعـذر مقـبـول
نسيانـك الزلـة مـن شيمـة الفحـول=خويـك الصاحـب بالـعـدل والمـيـل
جـوّد كلامـك لا توسـطـت بـرجـال=كلـن عطـه قـدره يـا طيـب الـفـال
و العبـد عبـد وراعـي الخيـل خيـال=واصبر على الشدات واصبر على الشيـل
الـحـاء حـبـك لـلإلـه الوحـيـدي=خلـك مطيـعٍ لـه ثـوابـك يـزيـدي
وحب الرسـول اللـي كلامـه سديـدي=وكـل الصحابـة زيدهـم بالغـلا حيـل
حـل المعاسـر لا تحلـيـت بالصـبـر=اصبـر ولازم بعـد عسـر يجـي يسـر
يالله ياللـي ترسـل المـزن والقـطـر=صبـر عبـادك عنـد ظلـم الرجاجيـل
حكِّـم دمـاغـك بالغـضـب لاتعـجـل=والحـق قولـه كلمتـه مــا تخـجـل
واعمـل وكسبـك أجـر يكتـب مسجـل=الشغـل عـزه للفـحـول الحلاحـيـل
حسّن كلامـك واتركـوا سـيء اللفـظ=وخلك كتـوم السـر ثـم احفظـه حفـظ
وخلـك رحيـم القلـب لا تشبـه الفـظ=واعمـل بفعلـك لـو تقـول الاقـاويـل
حاول تفـرج عـن اخـو الديـن كربـه=ثـم استـر الـزلات فـي كـل دربــه
واثقـل وخلـك دايـم الـدوم سكـبـه=والزم عبـادات الضحـى وتالـي الليـل
(الخـا )خويـك ون ظهـر منـه زلـه=سامـح وطبـع الخـل يسمـح لخـلـه
ودرب تجـي منـه العـذاريـب خـلـه=لاتصحبـون أهـل العقـول المهابـيـل
خطو الولـد مثـل المـزون المراديـف=دايـم نفوعـه للـربـوع الموالـيـف
وللصاحـب الغالـي وللجـار والضيـف=لامن حصـل لـك ماتبـي عنـه تبديـل
خمس الفرايض والسعـد يـوم صليـت=وصوم رمضـان وكثـرو حجـة البيـت
وابشـر بربحـك كـان للمـال زكيـت=والديـن ديـن الله ولا عنـه تحـويـل
خلـك بمجـلاسـك قلـيـل الكـلامـا=إن كنـت بوجـود الكـبـار الحشـامـا
تـزداد بقـلـوب الجمـاعـه مقـامـا=ون جا مجالـك هـات علمـك بتدليـل
(الــدال ) درب المرجـلـه لاتخلـيـه=واللـي هقـا بـك لاتخيّـب هقـاويـه
وحرص على اللـي عامراتـن قهاويـه=عليـه طلقيـن الـشـوارب مداهـيـل
دوّر علـوم أهـل الكـرم والـفـوارس=كسابـت الطـولات أهــل النـوامـس
انشـد وتلقـى ،، والمجالـس مـدارس=فيهـا العـلـوم الوافـيـه والتعالـيـل
دَلالـك عيـالـك يــورّدك الأهــلاك=خل الولـد فـي زيـن الأطبـاع يتـلاك
ولـو زعلـت أمـه لاتخليـه يــالاك=شوف ( بركات ) اللي وصاتـه تماثيـل
در البحر يصعـب علـى كـل كسـلان=والمال عـزك لـو بـدا جفـو الاخـوان
والناس ما ترويـك لاصـرت عطشـان=والحـر مايـاكـل فـتـات التفاضـيـل
الــذال ذنـبـك عاجـلـه بستتـابـه=كـم واحـدن أخـطـى وزل بشبـابـه
يغفـر لنـا رب(ن)عـزيـزن جنـابـه=واعمالنـا تحصـى عليـنـا بتسجـيـل
ذل ، وتذلـل بـيـن اديــن الكـرامـا=أمـك وبــوك الوالـديـن الحشـامـا
لهـم مـن الطاعـه عليـنـا لـزامـا=واللي عصـى الآبـاء موعـود بالويـل
ذمـك وهرجـك بالقفـا يافتـى عيـب=طبـع الحريـم اللـي تجيـب العذاريـب
استر من الـزلات واذكـر مـن الطيـب=ترا الخوي عنـد الـوزا يحمـل الشيـل
ذيب الخـلا صـاد الفرايـد مـن الشـاه=اللـي تباعـد عـن خـواتـه تعـشـاه
واللي مـع الرعيـان بالقـرب ماجـاه=لو هي مـن عـداد الشيـاه المهازيـل
(الراء) رتب كلامك لايجي فيـه منقـود=متخيـرن زيـن المعانـي عـن الـزود
ترى كثيـر الهـرج مـا يجلـب الفـود=أفعـل وتشهـد للنشـامـا الرجاجـيـل
راع النظـر والفكـر وأعـرف تناسـب=لاشفت مـن نـاسٍ أمـور(ن) تناسـب
وأظفـر بنـت الديـن تلقـي المكاسـب=ولا الـردي بنتـه تجـيـب البهـاذيـل
رب الولد بالطيـب يجنـي لـك الطيـب=وعلمـه أمـور المرجلـه والمواجيـب
وخله عزيـز النفـس ذيـبٍ ولـد ذيـب=لـك الثمـر يجنـى بطيـب المحاصيـل
رافـق رفيـق(ن) وافيـات(ن) حسانـه=ترى الخوي يـا حسيـن مثـل الأمانـه
وماهـو خـوي اللـي يعجْبـك لسانـه=مير الخوي اللـي يعدْلـك عـن الميـل
الـزاي زيّــن بالمجـالـس لسـانـك=بالصـدق والتثبيـت يــزداد شـانـك
تـرى لسانـك قالـوا انـه حصـانـك=حكمـة تفيـد النـاس جيـل ورا جيـل
زيـف الكـلام احـذر تقـرّب حوالـيـه=خسران مـن باعـه وخسـران شاريـه
فـي دنيتـك يجلـب عليـك المشاريـه=وتعيش ما تحسـب حسـاب المشاكيـل
زلّــة صديـقـك لا تـهـد العـلاقـة=اعـرف حقـوق وواجبـات الصـداقـة
خلـك وسيـع البـال عـنـدك ليـاقـه=تفوز فـي صحبـة هـل البـن والهيـل
زور الجماعـة والقرابـة والأصـحـاب=إسأل عن الزعلان واللـي معـه غـاب
خلّـك مواصـل دوم لا تسكّـر الـبـاب=حتـى ولوهـم يقطعـون المراسـيـل .
(السين)سامح من ظهـر منـه تقصيـر=ترا السموحـه مـن طبـوع المناعيـر
واذكـر خويـك عقـب فرقـاه بالخيـر=مـا كـل صاحـب كاملـن بالتكامـيـل
سـر الخـوي حـذراك لايظهـر السـر=يا ما تسبـب كشـف الأسـرار بالشـر
كم كلمـة جابـت علـى صاحبـه ضـر=يكتـب علـى المخلـوق كـل الأقاويـل
سهم الهوى صـاب المتيـم بالاعطـاب=لاطـق بـاب القلـب لاتفتـح الـبـاب
واستذكرو ( هـذا بـلا بـوك ياعقـاب)=نهاركـم ياهـل الهـوى يشبـه الليـل
سيّر علـى اللـي قنّـن الهيـل والبـن=مجالسـن يطـرب لهـا البـال ويحـن
واعرف (ترا سن اللبـن يشلعـه سـن)=مـن حكمـة الأجـداد خـوذ التماثـيـل
(الشين) شبولنا نار(ن) وزيدوا الحطبيـا=نحمـس عليهـا البـن مصفـف منقيـا
ودقه بنجر(ن) مـن سمـع كـود يجيـا=وللنـار شبـوا وبهرولـي المعامـيـل
شبـه لربعـن مـرويـة جـمـع دلاق=وأحمس لهم من صافـي البـن مـالاق
في مجلسـن مافيـه شينيـن الأخـلاق=فيـه الكـلام الزيـن وحلـو التماثيـل
شيـل الكـذب عنّـك وغيـر طبـوعـه=خلك صدوق ،، ودونـه الكـذب زوعـه
كم كذبتن جابت علـى الشخـص لوعـه=والكـذب حِـرم وصاحبـه لـه تنكيـل
شل الـذي صامـت عـن الحـق كتـم=لاصـار عنـده وافـي العـلـم مـاتـم
والحـق يظهـر وباقـي الجـرح يلتـم=والشمس تظهر وتنجلـي ظلمـت الليـل
((الصاد)) صادق صاحبك زين الأخـلاق=عذب الكلام اللي له الصـدر مـا ضـاق
واعرف ترى الأنجـاس للشـر تشتـاق=وخـوذ اللبيـب وخـل عنـك المهابيـل
صعـب تخـاوي مـن كـذب واللعينـا=وحتى الـردي مـا جـاب فـاده علينـا
وسيِّـر ومـن خفـف زيـاره فطيـنـا=وصـادق صديقـك دون زيـفٍ وتمثيـل
صلـوا فرايضكـم وصومـوا رمضانـي=واعمـل ولا تنطـر يجـي شغـل ثانـي
اعمـل تـرى ماتفيـد كثـر الأمـانـي=وخلك صـدوقٍ واتـرك القـال والقيـل
صيد المعـادن داخـل قلـوب هالنـاس=واعرف إذا هو كـان فضـة او نحـاس
((وطير الحبارى يذهل العيـن قرنـاس))=ولا تنخدع وابعـد عـن العيـب والميـل
( الضاد ) ضيفـك لـه معـزة وتقديـر=احـذر يبيّـن منـك للضيـف تقصـيـر
النـاس تذكـر نـاس بالشـر والخيـر=تجـارب الدنـيـا ســوات التحالـيـل
ضـبّـط حيـاتـك تستـريـح وتهـنّـا=ملـزوم تعـرف ويـش مطلـوب منّـا
لا تعيـش ضايـع فـي حياتـك تعـنّـا=الطيـش والفوضـى تجيـب الغرابـيـل
ضاعف من المجهود في خدمـة الديـن=عليـك بالدعـوة تـرى النـاس لاهيـن
احرص على نهج السلف وانتبـه زيـن=يـا كثـر شفنـا بالمذاهـب مداخـيـل
ضمـن الوصايـا لازم أوصيـك بالعلـم=اطلبـه ، لا تظلـم تـرى تركتـه ظلـم
حقيقـة وواقـع مهـو طيـف أو حلـم=اللـي يحـوزه حـاز حدبـن مصاقيـل
(الطا ) طنايا وانشـدو كـل الأجيـال=تاريـخ ربعـي كاسبينـه بالافـعـال
ياعيال نبغـي مجـد الأجـداد ياعيـال=نطرب ليـا ذكـرت بوقـت التعاليـل
طبع(ن) لهم ريف المسايير والضيـف=زايـد كرمهـم كالمـزون المراديـف
أهـل القلـوب الصافيـات المواليـف=أعجز ليـا جبـت المواقـف بتفصيـل
طـرا علـى قلبـي فعولـن قـدامـا=مثل ( الشلاقـي ) مـع هشيـم العظامـا
والذيب حصّل مـن عشيـره طعامـا=عقب العوا جاه العشـا طيـب الحيـل
طيـر السعـد غنـا بوقـت الحرايـب=بسيوفهـم كـم روضـو كـل خايـب
فكاكـت الأزمـات وقـت النشـايـب=ابشـر بعـزك لاتثاقـل بـك الشيـل
الظـاء) ظـام الوقـت فينـي وأظلـم=وانـا معـه راضـي بحكمـه مسلـم
راضـي بحكـم الله وداري وأعـلـم=مافـاز بالدنـيـا مــدور تعالـيـل
ظلمـا وكـل النـاس فيهـا ينولـون=مـدور الخيـرات ومـدور الـعـون
واللي سعى لجل البشر عنـه يـدرون=كلـن ينـول بدنيـتـه دون تعلـيـل
ظلمـات قبـر الظالـم يزيـد ظلمـه=لامن غدى وسطـه وعلّمـه جرمـه
ماعـاد وقتـه ينفعـه غيـر سلمـه=واللـي عمـل للاخـره بآخـر الليـل
ظميان يامـن يسقـي الظـام رشفـا=ويسد جوعه ومن شقا الوقـت يشفـا
ويغنيه عن وجه المـلا وقـول تكفـا=ظميان من حسن العمل والظمـا حيـل
(العين) عظايم التاريخ سِجّل لنـا دور=بالجود والمعروف سدنـا لنـا دهـور
من حاتم الطائي لنـا صيـت كالنـور=متوارثيـن الطيـب جيـلٍ بعـد جيـل
عبدالكريم اللي به الطيـب موصـوف=ليا قال ( خوذو) أبشـر بعـز مضيـوف
هو الكرم ،، أصل الكرم ،، فيه معروف=يجود للحايف ويضاعـف لـه الكيـل
عـز(ن) تدفـق فـي أفعالـك تغنـا=بسمـك تعـلا يا(الجنازة ) علمـنـا
بارض الصريـف جبـال دكـه وفنـا=أربع طعش بيرق نسفهن كما السيـل
عاداتنـا للضيـف مـالـه مثـالـي=من دمنـا نرويـه بوقـت المحالـي
تضرب بنـا الامثـال ،، ولله الكمالـي=حنا هـل اللحيسـه رجالـن حلاحيـل
عفنـا الطـعـام ولقبـونـا طنـايـا=امـا النصـر والا هــلا بالمنـايـا
وأفعالنـا بالحـرب ماهـي خفـايـا=انشد ترى يجاوبـك عصـر الاهاويـل
الغين غابت كثير من المواقف والافعال=وحنـا رسـوخٍ كننـا ذيـك الاجبـال
فينا السيوف المايلـه وميلـة عقـال=الله خلقـنـا للمـواقـف مشاكـيـل
غايـة منانـا رايـة الطيـب فيـنـا=وليـا دعانـا المـوت يمـه مشينـا
حنـا الطنـايـا باللـقـا لا طنيـنـا=شمّر نورّد من بقـا مـن نهـر ويـل
غلبـا ضياغـم لابـة الطيـب شمـر=فينـا اصالـة ساسنـا مـا تتـدمّـر
تاريخنـا منـا علـى العـز عـمّـر=ولاكل من هو يبغي الفوق لـه طيـل
الفاء فعايلنا ..مـن اول اليـا اليـوم=ماتنهـزع ماتنهـزع.. دايـم الـدوم
من فعلنا ..ياما انهزم.. قوم مع قـوم=واليا اختلط.. عج الاصايل.. حلاحيـل
" فعل الطنايا فوق " حافـل. بالامجـاد=من غير قاصر .. بالقبايـل والاجـواد
حنا الصخى، حنا الكرم، حنـا الاسيـاد=غصبن ..على الزعلان ..واللي مغاليل
(فعل الشريف) اللي غزانـا قصفنـاه=من غير "راس اغلا عيالـه" قطعنـاه
وتسعة مرابـط عنـد شمـر كسبنـاه=ولايجحده.. ياكود نـاس(ن) مهابيـل
فعايـل الابـطـال يبـقـى سجـلـه=وشهودنا .. قصيدتة يـوم يـوم حلـه
مـن فعلنـا قفـاء هزيـل(ن) بغلـه=اغـلاء رجالـه فاقـده يالمشاكـيـل
فينا شموخ و عالـي المجـد نرقـاه=نرقـاء علـى "متـن الفخر"وانتعـلاه
درب المهونـه والـرداء مامشيـنـاه=المجـد فينـا يفتـخـر والمعامـيـل
فينا" ابو خوذه . والجنازة . ومفتـاح"=صوارم(ن) .. هزو ..جموع بلا سلاح
افعالهم تزهـا .. لهـا كـل الامـداح=ماقلتهـا كـذب(ن) وزور وتهـاويـل
فينـا ومنـا "كـل صنـديـد" مـنـا=شبرم وهايس ..فزعـة اللـي تمنـا
(وصعب صعب) زبن الضعيف المجنـا=مزبان من .. ذاق القهر واتعبه حيـل
فالشعر . لـو اجلـس .لعـد الطنايـا=اتعب قبـل ..مانهـي جميـع الزوايـا
من كثـر مافينـا رجـال(ن) دهايـا=اقولهـا "سـر وجهـر" دون تضليـل
فعل الطنايـا .. للقصايـد .. دفعنـي=واحظرت قاف(ن) يطرب اللي سمعنـي
تحاضبن عنـدي .. وجـن واجمعنـي=وقمت اتخير .. مـن جزيـل التماثيـل
فديتكم واعطيت.. للغيـر انـا القـول=(وشعار شمر) فيهم الطيـب وفحـول
الكـل منهـم يفهـم العلـم ويطـول=((وانا من اصغرهم)) ولانـي بحلحيـل
(القـاف ) قيفـان القصيـده تغـنـت=بفعالنـا يـوم المصاقـيـل رنــت
كـم مـن خيولـن بالمياديـن كنّـت=يومن لقت ربعـي رماحـه مراسيـل
قبـر العـدا بسيوفـهـم حافريـنـه=درب الشجاعـه لابـتـي عارفيـنـه
يازيـن ردات القضـا قبـل حيـنـه=ويازيـن لامـن طوحـن الهلاهـيـل
قالـو عليهـم ،، واطلقـو للاعـنـه=يامـا حـلا تخضيبـهـم للأسـنـه
كـل الضـوامـي وردن وارتـونـه=خلـو نحـور القـوم دمـه شخاليـل
قاسيـن بالهيجـا ، بوقـت البـلايـا=وبالسلـم للعانـي كـبـار العطـايـا
تفنـى الليالـي ... والطنايـا طنايـا=شوف النجوم ولابتـي كنهـا سهيـل
((الكـاف)) كـلٍ بالطنـايـا تغـنـا=اسـمٍ بذكـره كـل شــيءٍ تحـنـا
بالمجـد والتـاريـخ تـبـدع بفـنـا=اهل الكرم مـن دون زيـفٍ وتمثيـل
كل الفخر والمجد مـن ورث الأجـداد=صغنا بتاريخ العـرب كسـب الأمجـاد
من فعلنـا تفخـر بنـا أمـة الضـاد=بالجـود والفرسـه وكسـب التنافيـل
كـرو عليهـم والمنـايـا تحـوفـي=بسيوفهم كـم فرقـو مـن صفوفـي
صفت لهـم ليـن اشربـو بالكفوفـي=بالحرب كن جموعهـم طيـر أبابيـل
كلمة ( طنا ) للجود والطيـب نبـراس=لاحـل ذكـر أفعالـه ترفـع الـراس
للضيف ريف ،، وبالمعاسيـر فـراس=كم نكلو من ضـرب الأيمـان تنكيـل
(الـلام ) لـو إن الليالـي يـعـودن=يامـا حكمنـا كاسبينـه بـلا مــن
كم من صويب دمـوع غاليـه هلـن=مـن ضربنـا بمصقلاتـن مشاويـل
لجدادنا فـي صفحـة الوقـت تاريـخ=ياما تعشو يوم الأكـوان مـن شيـخ
وكم نوخو عصمان الأشنـاب تنويـخ=ليـن اكتمـل لجدادنـا العـز تكميـل
للمـوت بعنـا كـل نفسـن عزيـزه=ريح المعـزّه ،، فـي دمانـا غريـزه
كسـب المراجـل للسناعيـس ميـزه=بالفعل ،، ماهـو بالحكـي والأقاويـل
الميم / من يجهل .. بفعل السناعيـس؟=أنا اشهد انه .. ياهل المعرفـه هيـس
"ربعي " وربي متعبيـن المحاميـس=اهل/ الكرم /والطيب /والبـن /والهيـل
منهـو زبنـاء .. فـي منامـه تهنـا=انا اشهـد انـه .. يالربـع يرجهنـا
والا عدانـا / مـن لقـانـا .تعـنـا=ولا ينكـره /غيـر العقـول المهابيـل
مكارم(ن) فيها افتخر.. بين هالنـاس=ولاعاش رجال(ن) بلا /امجاد واحساس
وانا لي ربوع(ن) خذو / كل نومـاس=فيهم /شموخي يعتلي .. فوق بالحيـل
النون نـاري قايـده بيـن الاضـلاع=والهاجـس الملتـاع لازال ملـتـاع
بين أشرف الفرسـان لابـد (طمـاع)=يطغى ويطغـى فـوق منـه رجاجيـل
نـاح الحمـام فـدار مابـه مقـابـر=حكمه حكيم الكـون ..والكـل خابـر
يـوم الوغـى والفـاس حنـا نكابـر=ما بالمعـارك مثلنـا لاغـدى الويـل
نعطي ولا يحصى عطانـا مـن الـدار=والضيف له من لقمـة البيـت مقـدار
شمـر طنايـا بالكـرم صيتهـم نـار=نـار ٍ تعلّـت بالجبـل دون تذلـيـل
نقش الحروف الصامتـه لـه معانـي=(الشين) شامخ فوق أعلـى المبانـي
(والميم )ما هـزه بشـر لـو ثوانـي=( والراء) راح بحكمهم جيل مع جيـل
الهاء هـل المـدح ينفـع للامـوات=أبي امدحه حتى اقنع الـروح والـذات
وجدي على نطـاح وجـه المغيـرات=وانـا اتئمـل بالليـالـي المقابـيـل
هداتكـم بالطـيـب يـامـا ويـامـا=ويامـا خذيتـوا عنانهـن والوسامـا
الشعر صايـم بالحشـا لـه اعوامـا=واصرخ كما تصرخ حبـال المحاحيـل
هاكـم كـلام عبيـد.. هـذا بـلاكـم=مير افكروا تالي الزمن ويـش جاكـم
عاشت سلاطين العـرب فـي ذراكـم=وانتـم تـرى شمـر طيـور الابابيـل
الــواو ودي يالطنـايـا اقـولــه=للابـة للـي فـي سنـام الرجـولـه
اللي لهـم بالمجـد صولـه وجولـه=زوبـع مقابيـس المنايـا حلاحـيـل
وافين.. مـن دور الشريـف الطنايـا=بالفزعـه اللـي علمـهـا ماتنـايـا
لفـوك زوبـع فـوق دقـل السبايـا=فزعه وجزعـه واستجابـه وتجليـل
واقفى بيمنى بيـص ولـد العجـرش=يوم ٍ بغى الوضحا الطحـوح وتحـرش
جاه العقاب الصيرمـي ولـه تفـرش=تسلم يمين الشمـري ضـاري الليـل
والا سليمـان الولـيـده وضــاري=ابن امحمـود الياطـرى لـه طـاري
اقفـى بلكمـن بيـن حمـر العتـاري=يومـه طلـب ام العيـون المظاليـل
والفـرخ ادلابـه وجالـه اقطـامـي=مثـل اشقـرٍ افنـى بـرف الحمامـي
عفيه بنـي عمـي خـوال وعمامـي=(زوبع) وماورث مـن غفيـل وزميـل
واجب ترا مدحه وهـو فـي مقامـه=وشيوخ تفـرض ذكرهـا واحترامـه
ماقـل دل وزبدتـه فــي مـرامـه=والهيـل قلـه فـي بهـار المعاميـل
والبيـت قبلـي قايلـه ابـن حثليـن=زيـزوم يـام اللـي نعـده سلاطيـن
قلته بأثـر راكـان حبـس المقفيـن=اللـي علومـه ينقلونـه مشاكـيـل
ودي وود ودي أودي وأمــــــدّه=في يـد منهـو نفتخـر بأسـم جـده
أبيـات شعـري عنـد حـارث أعـده=حاضـر بحاضـر مانكـز المراسيـل
ولا هو ردى باللـي بقـى ياجماعـه=مار القصايـد فـي مقـام البضاعـه
أن زادت الوزنـه غدابـه رعـاعـه=وكـل علـى قـده يجيـب التماثيـل
والمعـذره وكلـن مقـدم معانـيـه=وهذا الخريصي منكـم العـذر يرجيـه
كلن علـى ماقيـل مـن دون عانيـه=والاّ الطنايـا كاملـه مابهـا مـيـل
( اليـاء ) يامحـلا ختـام القصـايـد=مثـل اللوالـي بالعـقـود الفـرايـد
طبـع(ن) لشعـار الطنايـا عـوايـد=مابه ميـول ولا صـدر منهـم عيـل
يسلم لنا ( السكبه )على بدع الأفكـار=وتسلم عقولن رتبـت نظـم الأشعـار
واللـي تعـذر نعـذره قبـل الأعـذار=واللي حضر جـاب المطالـب بتكميـل
يعيش ( فيصـل ) مـن بدينـا معانـا=خطـوه بخطـوه ون طلبنـا عطـانـا
لين وصلـت وارسـت ببـر الأمانـا=واليـوم ننثـر مـن زهرهـا أكاليـل
( ياابن الطنايا ) نرسلـه لـك هديـه=أبيـات تبقـى طـول الأزمـان حيـه
تروي ظمـا الظميـان ياحلـو ريـه=ترتلـت مـن نبـع الإبـداع ترتـيـل
يرويك ( عاصفنا ) كما المزن هطـال=ثم اعتلى من صهوة الخيل ( خيّـال )
( وشراعنا ) غنّـا المعانـي بمـوال=ومن حروة ( الجهرا ) تجره مواويـل
ياللعجب (ذيب اسلمـي )معـه ذيبيـن=(ياذيب إجا ) يشبهك ( ذيب العلاوين )
ومن المنامه درة البحـر ( بحريـن )=شوف ( الخريصي ) وصل العلم توصيل
( يالمحترم ) ( فواز ) نظمك بميـزان=من عقبه ( القاصف ) بترتيب وتقـان
ثم اشرقت شمس القوافـي (بنزهـان)=سمين صيـده مـا يصيـد المهازيـل
يارب ياللـي فـي عيوبـي تبصّـرت=استغفـرك كانـي ظلمـت وتهـورت
والعـذر كانـي يالأجاويـد قـصّـرت=وتوكلـو .. علـى الكريـم التواكيـل
ياربعنـا زيـدو صــلاة وسـلامـا=علـى شفيـع الخلـق خيـر الأنامـا
إعـداد مـا هلـت مـزون الغمامـا=على نبـي(ن) كمّـل الديـن تكميـل