ديــــــــوان الاميــــــر عبــدالله العلــي الرشيـــد

بسم الله الرحمن الرحيم

أخواني الاعضاء ،، ودنا لو نجمع تاريخنا ومجدنا من التفرق ،، ومثل ماكتبنا ديوان للأمير عبيد الرشيد ودنا نكتب ديوان وقصائد الامير عبدالله ،، وان نتعاون على جمعها ،،

ونرجوا من جميع الاخوان اللي عنده قصيده يذكر قصته ولو مختصره حتى تكون واضحه ،،

ودمتم سالمين ولاتحرمونا من مساعداتكم ،، واسمحولي بالبدايه ،،


__________________________________________________ ___________________________

هذي القصيدة قاله الامير عبدالله يوم رد الحكم لفيصل بن تركي بن عبدالله ،، يوم دخل القصر هو و40 رجال معه وذبح مشاري ،، وحتى انه بقى ينذبح لولا رحمة الله سبحانه ثم شجاعته عندما تناطح هو وعبد مشاري وكان العبد هامه ويالله ذبحه ،،
وحصله بعض الجروح والاصابات ,, ولكن(( للشدايد رجال)) ،، فقال القصيده هذي يوم طلع من القصر ورد الحكم لأهله ،، وفيها عتاب موجه لاهل عنيزه ،،

وهذي القصيده تسمى الشيخه ،، يقول به ويرسله للامير فيصل بن تركي الذي كان من أعز أخوانه وأصدقائه،، ويشرح له ما حدث له وعن أخباره .. فيقول ..

الحمد لله فازع لمن شكاله = والحمد له ثاني على كل الاحوال
والحمد له ثالث بقدرة فعاله = حي(ن) قدير(ن) عد ما قايل(ن) قال
أو عد ماترمي لواعج خياله = بسح(ن) وتسكاب(ن) وديم(ن) وهمال
رب السما رزق الورى من نواله = محي الهشيم الميت الدارس البال
كل الثنا والشكرله والجلاله = سيدي ومسنادي الا ضكني الحال
كم ضيقتن من منّته جت وزاله = وزادن بعز(ن) ماهقيناه بالبال
فاللي بنا لولا الولي ما نناله = مير الولي يسعى وما نام فعال
ياما طلبنا كل من به شكا له = نبغي الركود من أهل نجد(ن) ولا ضال
ومن عقب ماعجزوا عني بالغياله = شبوا لنار الحرب بالقيظ صوال
ومن شب نار(ن) تحرقه باشتعاله = وصارت عقوبه تابعة ذل واذلال
وأنا أحمد الله ماكرهنا لقاله = الا تكون عقوبته عز وأقبال
والبغي كم من ناس حلّوا رجاله = وياما هلك بالبغي من ماضي اجيال
عاد خلاف الزود شف وش جرى له = ياعونة الله مامن الحي عقّال
( فاللي علينا الجار نرفي خماله = ونفزع لمن جانا من الضيم دخال )
( وللضيف نقرى حين تبرك رحاله = ومن أمنّا والمحتري ما نهج حال )
( وان جاء صديقي من عدوه صياله = عميلنا نرخص له الحال والمال )
ولا نزود ولو تزود السلاله = من دم هامات العدا عل وانهال
ومن جا يريد الزين يعطى سؤاله = وعن عاني الله ما قطعنا له أوصال
فإن كان هو ركب الرشا للمحاله = واستثقلت ماني من الحرب ملاّل
( نصبر كما تصبر رواسي جباله = ما ننهزع من وطي حافي ولا نعال )
وخلاف ذا يامن يودي رساله = في صفح مصقولن عليه القلم سال
سلم على منهو غدا الشوق واله = ومشاهد اللي للثقيلات حمال
غشّ الحريب اللي براسه صعاله = وعز الضعيف وزيف ضيعات الأعجال
بالجود ينقض من يعدد خصاله = كل المراجل حاشهن دق وجلال
ان قال خبرن صاحبي كيف حاله ؟ = عطه الجواب اللي كتبنا والامثال
يقول : قله ياخلف من غداله = من الحي والميت مع العم والخال
ركبوا على عوص النجايب عياله = يبروا لهم يابو سمي كل خيال
جاؤا ضحايا شيخ ماهي نطاله* = وصاروا لما رادوا على كل مشوال
زادوا وبادوا من هبايب شماله = وكلن له الله يوم يحسبن الاعمال
( ويمناي ماترضى زوايد شماله = وتعطي الحقوق أهل المعالي والارذال )
( ومن عقب شيمتنا نبدّل فساله = حتى نشوف اللي على الحرب صمّال )
ونشوف حرب اللي يباهي بماله = ياشيخ ياتالي كريمين الاسبال
( والسيف للتايه ستاد(ن) حناله = وندل به من هو عن الجاد قد مال )
واللي كبا لونه فحنا صقاله = ولاهو من السطوات والضرب كلاّّّّّّّّّّّّّّّّّّّّّّّّّّّّّّّّّّّّّّّّّّّّّّل
( هذي علوم ديارنا من بغى له = مشروب ماه الا بقبّاض الآجال )
لياما صفت بالسيف ماهي جماله = ونثني الرتاع بجامد القيد وعقال

* نطاله = الخديعه
تقبلوا التحيه ولاتحرمونا من مشاركاتكم حتى يكتمل هذا الصرح

 

 

 

 

 

 

 

 

 

 

الاخ العاصف

الف شكر لك على ايراد هذه القصص والاشعار لعبدالله الرشيد

وانت دائمأ سباق لجلب العلوم الطيبه وهذ ليس غريب على من مثلك ينتمي الى معدن من انقاء المعادن( اهل الحيسه)


هذه القصيدة قالها عبدالله بعد ان اغاروا اهل القصيم على اطراف شمر واخذوا حلال منهم

وطلب منهم عبدالله ارجاعه ولكنهم رفضوا كما طلب من الامام فيصل ان يتوسط في الموضوع

وبالفعل قام الامام وارسل شخصان واحد اسمه فرحان والثاني يقال له بن سبيت

ولكن اهل القصيم قاموا يماطلون مع مراسيل الامام مما اغضب عبدالله وقام وارسل اخوه عبيد على راس سرية

الى اهل القصيم وقتلهم واخذ حلالهم
والدليل قوله في الابيات من ضمن القصيدة التي اوردها حضرتك ولكن لم تذكرها ضمن القصيدة

قد تكون غير موجودة عندك او سقطة سهوأ كما يقولون

والذي يقول فيها

هذا جزاء من هو خطك عصاله000 فرحان وبن سبيت مالقاهم البال

وجاهم عبيدأ لاعدمنا خياله000 حطه لهم ربي نجمأ وزلزال

كما ان هناك بيت وهو اشهر بيت في هذه القصيدة لم يرد ذكره قد يكون سقط سهوأايضأ

وهو الذي يقول

شهودي بجلدي والعدو به بداله000 والناس تدري بالجدايد والاسمال


الف تحيه لك والف شكر

 

 

 

 

 

 

 

 

 

 

ألف شكر لك اخي العاصف على ما تقوم به من طرح مواضيع رائعة ذات قيمه وذات فائده

تعود على الجميع بالنفع ..

سيتم تثبيت الموضوع ونشره لكافه الأعضاء ...


ولي عوده

 

 

 

 

 

 

 

 

 

 

(( المَتـحَـف )) أو ( العـاصِــف ))

كِلاهُما ( واحِد ) !


دائماً لا نقرأُ لك .. إلاّ ما هُوَ (( مُفـيدٌ )) و (( هـادِف ))

وكِلاهُما ( رائـع ) !

سبَق وأن أتحفتَنا بديوان الأمير الشاعِر ( عبيد بن رشيد ) ؛ وها أنتَ ذا تُتحفنا بقصائد :

الأمير الشاعر : ( عبد الله بن رشـيد ) .. رحمة الله عليهُم ..


أنا لن أُشارِك بقصيده .. بل لوثيقه .. على أن أعودَ ثانيَةً لأُشارِك بقصائد الأمير .

وثيقة بتوقيع الأمير / عبدالله بن رشيد :
---------------------------------------------------------
في كِتاب (( عُلَمـاء لبـده )) للأستاذ " أحمد العريفي " هُناكَ العَديد مِنَ الوثائِق ..
وهذه إحداهُن .. وهيَ بخط الشيخ " عبدالله بن خزام " وتوقيع الأمير :
عبدالله بن رشيد في عام 1257هـ - أي قبل 169عاماً -






أسـتاذنا وموسـوعتنا الشعبيّة الشامِله :

[ ا ل ع ا ص ف ]

صحّ الله لسانك يا مُبـدِع

بإنتــظار مُشارَكات الأعضاء بهذا الموضـوع المُهِم والرائع

 

 

 

 

 

 

 

 

 

 

السلام عليكم ورحمه الله وبركاته
باديء ذي بدء احب ارحب بالعاصف والذي جائنا كالعاصفه وابدع وتميز وخلانا بهالغبره شكرا اخي ابوحمدان علي موضوع المتميزي واشكر الاخوان علي اضافاتهم الجميله والمفيده
واسمحلي يابوعوض ترا ماعندنا مراقبين يضيفون وابي امسح اضافتك وتوقيعك بعد :biggrin::biggrin::biggrin:

تراها مزحه شكرا للجميع

 

 

 

 

 

 

 

 

 

 

هذه تكمله للقصيده التي اضفتها أخي العاصف

الحمد للباري فزاع من شكا له = والحمد ثاني على كل الاحوال
والحمد ثالث بقدرت فعاله = حمد كثير عد ما قايل ً قال
وعد ما فوق الوطى من رماله = وساح الظلال من العوالي ومازال
وعد ما ترمي لواقح خياله = بسح و سكاب وديم همال
رب السماء رزق الوطا من نواله = يحيي الهشيم الميت الدارس البال
كل الثناء والشكر له ولـ جلاله = سبحان من هو كل ماراد فعال
مولاي عازل شمسها عن ظلاله = مسندي ومسنادي ليا ضكنا الجال
كم ضيقتً جتنا وعنا ازاله = زادت بعز ما هقيناه بالبال
الحمد لله ما كرهنا لقا له = لا تصير عقوبته عز وأقبال
ويا ما طلبنا كل من به شكا له = نبي الركود من اهل نجد ولا ضال
من عقب ما عجز وغني بالغياله =شبو لنا حرب وبالقيض صوال
ومن شب نار حرقه باشتعاله =وصارت عواقب تابعه ذل واذلال
وهذاك فعل الشر بلي سعاله = برمية الميدان من غير حبال
والبغي كم ناس خلص من رجاله = ويما هلك بالبغى من ماض الاجيال
عاداه خلف الزود شف وش جراله = في روفت الله مامن الحي عقال
ومن قال ذا فعلي فذا من هباله = الله معاوني على من علي عال
فالي نبي لولا الوالي ما نناله = مير الوالي يسعا ولاهوب غفال
والكل يكتب بالقلم ما جراله = شره وخيره من الخالق المال
يبسط ويرفع بالقدر من فعاله = تدبير خلقة ما لنا فيه مدخال
والي يريد الزين يعطى سواله = وانا اعانن الله ما قطعنابالوصال
وان كان هو ركب الرشا بالمحاله = واستثقلت ماني في الحرب ملال
اصبر كما تصبر رواسي جباله = ما تنهزع من مشي حافي ونعال
ومن عاق ضاع فالما ودر زلاله = نسقيه وبل لين يروا ويكتال
ومن زاد زدنا له بقول وعتاله = في حبل من لافي نواصيه تحتال
وخلاف ذا يا مودي للرساله = في صفح مصقول عليه القلم سال
سلام هو للي على الشوف واله = مشاهد الي للثقيلات حمال
غشى الحريب الي براسه صعاله = وعز الضعيف وريف ضيف بالامحال
بالطيب يتعب من يعدد خصاله = كل المراجل حاشهن دق و جلال
سلم عليه ولا تقل له مقاله = الا ان كان انه نشد عني او سال
وقال اخبرن عن صاحي كيف حاله = فعطه العلوم الي كتبنا والامثال
وقل له يقول لك يا خلف من غداله = من الحي والميت من العم و الخال
ركبوا على عوص النحايب عياله = يبرا لهم يابو سمي كم خيال
جوه الضحا يا شيخ ماهي نطاله = وصادر وطاردوا على كل مشوال
هذاك حق الي خطوطك عصاله = من عقب دزيت له كم مرسال
ولا طاع حكي الي بنصح حكا له = فرحان وابن سبيت ملقاهم البال
يبي يرد الي مضا من هباله = والي مضا عوج سراميد وطوال
وزاد ووتاد ومن هبايب شماله = وكل له الله يوم يجمعن الاعمال
والله لولا يوم كربت حباله = خوف نغيضك ما نزيده بالاشغال
من عقب شماته بدا بالسفاله = حنا نشوف الى علي الحرب صمال
ونشوف حرب الي يباهي جماله = يا شيخ يا تالي كريمين الاسبال
سيلات دقة قبل يلحق جلاله = هذاك قولي له ولاني بذلال
هذي علوم ديار من له صفاله = ولا شرب ماه الا بتقصيف الاجال
لو كان ماشافو وعافو تواله = صارت عواقبهم كتوب وجهال
الصدق يشهد له وغيره رذاله = وقول بلا فعل لو قيل بطال
شهودي بجلدي والعدو به بداله = والناس تدري بالجدايد والاسمال
لما صفت بالسيف ماهي خماله = وجودت لنا دفاع بالقيد وعقال
ومن قال قول من مايتمم مقاله = لا عاش من يقصر عنه وزنه مثقال
ومن خالف امرك لو صديق فناله = من الولي طاعون كبد وسلال
سيوف اليا شاله ستاد حناله = ندمر به من هو عن الحادث مال
واليا كبالونه محينا صقاله = ولولا هو من التصطات والضرب كلال
وعبيد الي لا عد منا خياله = حطه لهم مولاي نجم وزلزال
فن كان تبغا اليوم نقصر طواله = اعزم ولا تنظر لراضي وزعال
اهرج قليل ولا تكثر جداله = عقلك وقلبك لا تفكر للأقوال
ودنياك تظهر من خفيه لياله = ولا تكن من عقب مافات غفال
والضيف يقرا حين تبرك رحاله = من غير من لا نحتري مانهج فال
وان جت صديق من عدو حياله = عميلنا نرخص له العمر و الما ل
ويا من بنا سرحه وضايع مواله = ولا بات في قلبه من البوق ولوال
وله انزود لو نورد سلاله = من دم هامات العدا عل وانهال
والستر ندفع تاليه في سهاله = ولا نبي بتو ميره من الناس قبال
وصلات ربي عد دابي نماله = علي نبي خصه الله بالأرسال

 

 

 

 

 

 

 

 

 

 

بارك اله فيك اخى العاصـف

 

 

 

 

 

 

 

 

 

 

عاد الامير عبدالله الرشيد لحائل لأخذ زوحته نورة بنت ابن عيسى ودخل القصر وكان يعرف مسالك قصر " المقطع " الساكنه به زوجته وقد استطاع ان يتفاهم معها ويخرجها من القصر ودبرت الحيلة ولحقت به ومشت حلفه وبعد برهه من الزمن قابلا رجلا من اعوانه يدعى
حسين الشلاقي ومشى معهما وكان أبن رخيص قد أعد لهما عند النيصيه ( قريه شمال حائل بنحو 15 كيلو ) فالتفت الامير عبدالله الرشيد الى زوجته وراى اثر دم على اقدامها لعدم احتمالها المشي فقال لرفيقه حسين احملها فأمتنع فكرر عليه الطلب وقال هذه القصيده :-

ارم النعول لمعزل العين يا حسيـن=أو اقطع لها من ردن ثوبـك ليانـه
جنب حفاة القاع واتبع بهـا الليـن=واقصر إخطا رجليك وامش امشيانه
يا خوك والله ما لها سبت رجليـن=يا حسين شيب بالضمير إهكعانـه
وإن شلتها يا حسين ترما بها شيـن=حيث الخوي يا حسين مثل الأمانـه
ما يستشك يا حسين غير الردييـن=وإلا ترى الطيب وسيعـن بطانـه

وبعد ما انشد الامير هذه القصيده حملها حسين ..

 

 

 

 

 

 

 

 

 

 

هلا ومرحبا بخوي الصريح
لنا الشرف بتواجدك بالموضوع ،، الله لا يهينك ،، وماعليك زود طال عمرك انت الشرف وانتم البركه

وصح الله لسانك على التعديل

وانا اعتذر ،، لان والله البيتين حافظهن زي اسمي ومدري شلون ماكتبتهن ،، لكن منكم السموحه والعذر ،،

واما السالفه فنعم هو مرسله للأمير فيصل وبه عتاب لاهل القصيم وايضا ذكربه ويذكره وش حصله يوم دخل القصر وردوله الحكم ،،

ومثل ماذكرت ،،

اشكرك مره اخرى واعتذر عن التقصير لان القصيده موجوده عندي بكتاب ثاني،، وانا كتبته لكم من كتاب الازهار الناديه ،، والا انا ماني حافظه كله ،، فيوم شفت ردودكم بحثت عنه ووجد ان كلامكم هو الصحيح ،، ووجدت به الاضفات اللي ضافها اخونا فيصل ،،

لكم التحيه والعذر وحنا بعضنا يكمل بعض

الله لا يهينكم

================================================== =========================

اهلا هلا بخونا القاصف

شاكرلك على مشاركتك الطيبه ،، واشكرك على هذا المدح ولو انك اعطيتني فوق حقي ،، لكن هذا ان دل فهو يدل على طيب اصلك ومعدنك الطيب واخلاقك الحميده

ادامك الله ذخر وبنتظار مشاركاتك

================================================== =============

هلا بالخريصي عواد يالله حيه

الله يسلمك يالغالي والف شكر على التواجد ،، دمت ولاهنت على مامدحتنا به ،، وحنا ماسوينا شي يستاهل المدح ،،
فانتم تستاهلون كل خير

الله يعزك ولا يحرمنا منك
وبنتظار روائعك

لك التحيه

================================================== ================
هلا ببو عبدالله هلا بالصقر

الف شكر على أضافتك وتعديلك الله لا يهينك ،، وان حصل مننا نقص فانتم الكماله والبركه

دمت ولاهنت

================================================== ===============
هلا مليون بخونا السيد عليان
زدتنا شرف بتواجدك الكريم
الله لا يهينك ولا تحرمنا من مشاركاتك

تقبل التحيه

 

 

 

 

 

 

 

 

 

 

الاخ العاصف تحيه وشكرا لمجهودك