إهداء الى صاحب السمو الملكي الامير سلمان بن عبدالعزيز آل سعود - امير منطقة الرياض
بإسم رب الملا ابدأ قصيدي واضرب الامثال=قصايد ماتليق إلا على سلمان وحضوره
هاك الحيد السعودي من سلالة طيبين الفال= شبيه طويق حلاّل الامور بحكمه وشوره
هذاك اللي الى منه نهض تنهض معاه جبال=والى منه قعد يقعد طريف وراس تنوره
صميدع لانخيته مايردك شامخ ٍ مامال = يموت الظلم في كفه ويطفي ناره وزوره
أمير المكرمه راع العطايا ماطر ٍ همّال=رياض الجود بوجوده جعلها دوم ممطوره
عليك من الثناء ياسيدي كثر الثناء لو جال= بـ صدر الشاعر اللي لو طراك تهيّض شعوره
قسم بالله يامير الوفا مانيب ولد رجال = اذا ماصغت لك جزل القصيد وغصت فبحوره
لأنك سيف ٍ مجرب وفارس ماعليك جدال = لأجل هذا اليا ضاقت ينادونك بأخو نوره
وانا من ضمنهم جيتك وشفت بعيني الافعال = تقود الطيب من خشمه وعندك ينتهي دوره
أعرفك زين يامير الشهامة للعقد حلاّل =تجيك الكايده تمشي ومنك تروح مذعوره
شموخك ماتسلفته سلف بالمصلحه والمال=خذيته حقّ بالسيف الصقيل وتشهد عصوره
هل العوجا مداهيل الوفاء لطامة العيّال= على وضح النقاء تمشي ركايبكم ومخبوره
على التوحيد قايدها معزّي صارم ٍ خيّال=مؤسسها وحاميها وشرع الله دستوره
جعلها جنة الارض وشعبها مستريح البال=شمال المملكة غنّا جنوب الدار معموره
والى منا لفينا شرقها مع غربها يختال = يقول: العز بدروع الوطن والدار مستوره
سعوديين والهامة لها عند الجدي منزال= تعودنا نجي يم الشرف ونشيّد قصوره
نبيع الروح بتراب الوطن ونعادي المحتال= وإذا جانا غدر ناتي صدر ونموّت جذوره
مبادينا شربناها بوقت الظلم والاهوال=وطبعناها بوسط قلوبنا بالصوت والصوره
انا ياسيدي شاعر وعندي كلمة ٍ تنقال= ولزوم إنها تعانق هيبتك يامير مسروره
ترى الاسلم على الطاعه كبار رجالها واطفال=ومعزتكم يامير المكرمه بالصدر محفوره
ولاّ يمكن نبيع اللي شرانا بأية الاشكال= وترى الطاعة لغير سعودنا يامير محضوره
للشاعر: إبراهيم بن خليل بن حسَّان
جريدة الرياض 28-6-2007 م اليوم
قصيدة رائعة بسمو الامير سلمان بن عبدالعزيز ال سعود
العرض العادي
