أبي أمشي بدرب طويل بلا حدود =وأبي أتيه بعالمي دون تحديد
وأودع المعلوم وأيامه السود = وانسى اعراف الباديه والتقاليد
وأعيش لا والد ولاني بمولود = لاعدو لاخلان لاعمر لازيد
ربابتي بيدي وعلى كتفي العود = وترسل لي رمال الصحاري زغاريد
واخذ زهابي خبزتي وتمرتي وجود = وكرهي ليالن فارقت بسمة العيد
واترك اماني هاجس المال والزود = واسخط برغبات الملذات والغيد
وابي اشتري جذع النخل بالف بارود =وابي ارفع المسيود وابي اكرم السيد
وابي اخلي حبل الارحام ممدود =مايقطعنه حاميات البواليد
وابي ارفه من عنا كل مقرود = بشرقة شعاع الشمس وغصن وتغريد
وابي ازيل الحسد عن كل حاسود = بمنظر وحوشن عارت صغارة الديد
واهني الزهرة على رفقة العود = وأسف لمنظر طير مايرحم الصيد
وابي اتساءل عن سمو راعي الذود =وأسرار عفة راعي الذود بالبيد
واقف مع الاطلال بحساس مشدود = ابي اساله عن حال اهلها المقاريد
يادار ليه جدارك اليوم مهدود = تذكري كم ابدعت فيه من ايد
وابي اعتبرها خير شاهد لمشهود = وعبرة تردد داخل النفس ترديد
واقضي حياتي كلها سهود ومهود= مالي بغناها وفقرها غاية وقيد
لاسايد العالم ولاني بمسيود =لاهام بي كيدي ولا همت بالكيد
وعساي اعود بنصرة الحق موعود =من داير افلاك الزمن والمواعيد
وعساي احصل من عنى رحلتي فود = ونلقاك يادنيا البراءه مواليد
لي قصد وضحته وما قلت مقصود = وصلت راس الميد ولا جيت انا الميد
كل شي موجود وكل شي مفقود = واحلم انا بكل شي وكل شي ماريد