يأهل الركايب سايجات المحاقيب = عوص النضا الطفقات شهب الغوارب
بنات شقران الفحل شمّخً نيب = فيهن لقطّاع الفيافي مآرب
بأخفافهن يوم استقلّن جناديب = يقدح حصا الصلبوخ قدح الكهارب
بنحورهن يطون فجوج العباعيب = على سراب القيض مثل القوارب
انتم لمثلي يالنشامى مناديب = قولو لحيًّ في هذيك المضارب
داعيك ساري ليل يلعب به الريب = والدرب تكثر به جحور العقارب
هموم بقعا حول قلبي محاضيب = والكيف من كثر الصواديف خارب
اصبر على الرمضا و حر اللواهيب = لعلّي اظفر بأستراحة محارب
ان جيت للمجلس ولا فيه ترحيب = اشوم عنه و وجه راعيه تارب
بانت خفايا الوقت والمخطي مصيب = يكفي عن الهرج الكثير التجارب
من كثّر الاعذار دون المواجيب = يلبس ثياب اللوم واللوم ذارب
والثعلب الماكر خذا مركز الذيب = والذيب عن بعض المشاريه هارب
من رافق الصاحي ترفّع عن العيب = و من رافق الاجرب بلا شك جارب
شكواك للي ما يسرّك ولا يثيب = دمعة يتيماً بين ظلاّم اقارب
يامدّعين الطيب ما حولكم طيب = ان كان ما توفون فتل الشوارب
أهل الركايب
العرض العادي
