من هباء لو كان ساسه من قبيله= وحده المليوم مالمنا عمامه
مكثر اللي يشبهه نفس الفصيله= المظاهر حر والخافي خمامه
بكل موطن ينوجد فاشل مثيله= لايعز ولا يفز من الرخامه
طيب جدّه مانفع به عزتيله= لقطة المذكور ماتفيد الندامه
طير بن برمان ماب اليد حيله= مايبي منه العشاء يبي السلامه
فكّة من حضرته مكسب عميله= ذاك شكله غير جايزٍ أحترامه
لو ركبله بنز في آخر مديله= مع جديد البشت مايرفع مقامه
يختلف هداج عن ذيك الثميله= وماشهر بالموقده غير الشهامه
فرق شوف العين مايخفاء دليله= الحجاز حجاز وتهامه تهامه
والقعود اليارغى من زود شيله= الجمل عليان ماهزّه وظامه
وابرهه مصيود قبل يصاد فيله= والخبيث مسيلمه قصّو عظامه
الوكاد يبين والمدّه طويله= والمدلّخ مايعالج بالحجامه
والفضيله لرجال أهل الفضيله= والزعل والغيض ضد الأبتسامه
الجمر والثلج يخلط مستحيله= ولايسد بلازمه مرخي حزامه
ومن تعوّد يركب شداد الأصيله= الزمان يعلّمه ركب المسامه
المصايب به على الحيين ميله= والصبر محمود مطلوب أغتنامه
حاظنة اليتيم لو يمسك شليله= حب غيره في ظميره حط شامه
والصديق لمصلحه عجلٍ رحيله= مايحصل صاحبه غير الملامه
والصياد اليا قضب مرمى الجميله= أختيار الطيّبه غاية مرامه
وراع الثار اليا شفى بخصمه غليله= ذاق من بعد السهر لذّة منامه
والماء للعطشان هل يوجد بديله= والهديه كيف تشبه للغرامه
ولايطول الطيب من يده بخيله= أن حضر وان غاب ماسد التزامه
الفزع مقطوع منّه وش بقيله= مرتجي منه الوفاء يقرض بهامه
هو بقى ماشيف خافي نحتريله= الجواب أرجيه من صاحب فهامه
شمرياٍ ساس جده من غفيله= أهل عقده والفخر كل أهتمامه
ربعنا ياصار للأضداد عيله= ماتعلا عالي الهامات هامه
يرفعون الراس بفعالاً جليله= الصخى يامسندي طالوا سنامه
له سلامي والتحيات الجزيله= تم قولي يالوفي هذا ختامه
وخير ماب الكون لله تهليله= يا الله الغفران في يوم القيامه