قال الاديب اللي سكن وسط حايل
وكنه سكن بقصور لندن وباريس
ماصاغ قافه بالقلوب الهبايل
اللي عن الشدات دايم نواسيس
صاغه بمن شال الحمول الثقايل
شيخ الجموع محضبين المتاريس
(فهد) سليل (عبيد) راع الجمايل
شيخن بوقت الضيق حاز النواميس
من طيب (بايق) له دروس ورسايل
كرس دروس اهل الطويلات تكريس
وله في (ثنيان) المعزه شمايل
(ودهيثم)اللي درس الطيب تدريس
ومن طيب (مقبل) له ظعون وظلايل
ريف الدخيل اللي يخاف الحواسيس
وعقبه (ودي) مجير حوض الثمايل
ولاهاب في جاره هروج النواديس
وبه من (سهيل) بوقت قدح الفتايل
ودوجة طواريف المعادي عواسيس
وبعروق (عبدالله) عزيز النزايل
راحة خفوقن تبتليه الهواجيس
ويركز بصلب (زميل) زين الفعايل
و(بمحمد الحارث)كريم المغاريس
من بطن (سنجاره) عنود المسايل
بنت (الفضول)مطوعين الملابيس
اخت(ن)(لسلقاء) والدة نسل وايل
اللي يخلون العوادي مخاليس
نسل (المهلهل) والسيوف النحايل
(لنبهان) من مرذين حمر العراميس
وفي (قيس بن شمر) نبوع ونهايل
فعايله بالطيب ماهي دواريس
وله من (سلامان) المعزه مكايل
مايختلف عنهم بكل المقاييس
نقوة (عمرو) راع الطبوع السهايل
ريف الهجاف المتعبات المعاميس
هامة (ثعل) فوق المهار الاصايل
وفي (طي) نوره مثل نور الفوانيس
وياصل ضنى (كهلان) زمل المشايل
ويلفي (سبأ) قطاع روس الجواسيس
وله في بني (يشجب) فعول ودلايل
وله في بني (يعرب) قواعد وتاسيس
صفوة ظهر (قحطان) ساس وسلايل
ماجاه بعروقه شراكه وتجنيس
اصل تسلسل بالوقوت الاوايل
مافيه لاهل العرف كذبن وتدليس
صافي مثل هملول مزن المخايل
واوضح من المعرس بحفل المعاريس
شيخن ولد شيخن لقوم وقبايل
لاولاد الازمل بالسيوف المواريس
اللي فعوله بالمعادي جلايل
ياطون حيضان المنايا كراديس
ياشيخ ياكساب كل النفايل
يالشهم يافكاك قيد المحابيس
سبعة ملايين(ن)على المتن شايل
لا هابها نسل العفون المهاليس
يالذخر لا جتنا العلوم الصمايل
وهذي عوايد محرقين المحاميس
ستر العذارى ناقضات الجدايل
ومركى الرجال اللي بلتها الوساويس
كم واحدن بالقيد ذاق النكايل
وامه قضت ليله دموع وكوابيس
دمعه غدى من قبة الراس سايل
كنه تقلب فوق روس الدبابيس
وجاها العقاب اللي يهوم الطوايل
مزبان شمر بالوقوت المناحيس
وقال ابشري يابنت خير العوايل
لو يطلبون عداد رمل الطعاميس
والله فلا تصلاك شمس القوايل
وراسي يميل بذاريات النسانيس
شيخة عرب مثل النجوم الشعايل
ماهي ختومن حبرها بالقراطيس
افعال عز ومجد ماهي همايل
ولاهي هروج مطاردين الجواميس
وغاص البحور وشاف فيها الهوايل
ولاهاب في دربه عقود ولواليس
وحامى على فكه بكل الوسايل
ضد المثاري والمعادين وابليس
لين استوى دربن من العام مايل
وكتم هروج اهل الوجيه المفاليس
وسارت ركابن قبل شوفه هزايل
وجاب السعاده للعيون النواعيس
مواقفن تبري كبودن غلايل
وتودع حواسيد المراجل مضاريس
وقاموا معه ربعي كرام السبايل
اللي لنيران المعزه مقابيس
اهل الكفوف الوافيات الجزايل
اللي على فزعاتها تنثر الكيس
يامدرك الطولات واف الخصايل
من ماكرن يجمع حرار وقرانيس
ياعلنا بك مانشوف البدايل
يافارض الهيبه بقلب المدابيس
بالطيب لينك مثل لين الخمايل
وجلدك على الشده حديد الملاميس
خيلك بحاجات الجماعه صهايل
ماهي نجاوي هرج والا مهاميس
كم قالة(ن)جيته بممشاك صايل
غير التعب والفعل خلف الكواليس
حلياك ماله في وقوتك مثايل
بين الشيوخ اللي عددهم مكاديس
الا بني وايل جزال النوايل
ومشايخ الهيلا حماة الكراديس
يفداك من حاز الردى والفشايل
اللي عن الشده زبن بالدواعيس
الطيب يبقى وآخر العمر زايل
وتبقى فعولك مثل قيس(ن)وابن قيس
تاريخ شيخن من رفاع الحمايل
شوامخ(ن)مثل الضياغم وبالقيس
قصيده مهداه من ابن غسلان لشيخ الزميل فهد ابن ثنيان الله يطول بعمره
العرض العادي
