البارحه ما أمرحت والدمع سفّاك
واعزتي لك يالعيون السهارا
لين أذن المذن مع أذان الأدياك
والفجر حل وحل فيه إنتشارا
والحال نشت كنها مطرق الراك
أللى طواه اليبس عقب الخضارا
عليك ياخيال دمثات الأوراك
لاحققن الجفل مثل العفارا
مرحوم ياللي تطعن الخيل يمناك
لاحل فصلِ في نهار المثارا
راعي الهليب اللي جذت به تمناك
اللى نسى كل المراجل وحارا
ما ركب فوق الخيل يامير شرواك
عند العرب والترك هم والنصارا
قيست من رايك وحدرت الأتراك
أهل الكروب مخربين الديارا
الله يعوضك بالعفو عقب دنياك
وأرجي عسى لك عند ربك وقارا
لو البكا من مات رده بكيناك
بالحزن نبتل ليلنا والنهارا
مرحوم ياشيخَ كبارَ عطاياك
يامال طيب ياعشير السكارا
يازينة الدنيا وياعز من جاك
مرحوم يامغني الضعوف الفقارا
يانجد عقب مبيّد الهجن عفناك
اللي يجر محجلات المهارا
بعناك بيعة مرخص ثم ننساك
الا ان ظهر متعب سواة النهارا
جيناك وأغليناك لو غلي مشراك
والا الديار يبدلن بالديارا
مانيب بو عيله ولانيب ملاك
ولانيب مربوط برجلي هجارا
أنا خفيف الحمل وأسعى بالأفلاك
والذل يبرك فوق ولد الحبارا
يانجد خيرك مايكفي خطاياك
خيرك يجي مره وشرك مرارا
وان سلم راس امهدي الصعب صفاك
متعب يبي حكمه وله طلب ثارا
ياشيخ يلي تو عمرك ومنشاك
ناشي على منشا الشيوخ الكبارا
أرجي عسى حظك يوافق لممشاك
بالعدل وسيوفك تنثر شرارا
آمين ياللي كل عبد برجواك
أنت الخيار ولا غيرك خيارا
تعطيه من عزك ونصرك وحسناك
ياالله يامعطي العطايا الكبارا
يامتعب أتعب ثم تعب سباياك
والعز فوق مطيرات الكرارا
قالوا هل البلدان كثرت جناياك
مات الأمير وبقي غوش صغارا
والحمد للي في معاديك قداك
ضربت ضربات تقص الفقارا
سيف لنا ولكل جملة دناياك
ذات الفقارا اللي عليه الممارا
ياسعد شمر يوم ظهرك مولاك
مثل الحيا ترجع عليه الديارا
يابن الملوك وسايس الحكم بارياك
جدك خيار ولك عمام خيارا
نعد عدك لين حنا وصلناك
عدو لله الشكر ما يجارا
مرثيـــة عبد الله السكـــيني بالجــــــنــازهــ فقيــــد شمـــــــر
العرض العادي
