بعد تصبيحت ابن رشيد على ساجر وانهزام ساجر وعنزه من امام ابن رشيد انشد الشاعر الحماسي رشيد ابن طوعان قائلاً :
مزنٍ نشا من سمر حايل مزابير
مزنٍ تحدر وانهشم صوب لينه
مزنٍ تقافى يم ساجر محادير
وادلى وصارت بالشوه السمينه
هلت سحابه فوق ساجر شخاتير
وركز على بيته وضيع يقينه
وراح بغثى سيله زبون المقاصير
وضبضب على بيته وفرق ظعينه
قدام بيته يلعبون الصفافير
ودمامهم في رفته لاعبينه
وقولك تقطع للسبايا مسامير
لا ابوك لابو الخيل مع راكبينه
فاجاك اخو نوره زبون المناعير
فوق السبايا ومر محتظينه
وجبنا السبايا والهجاف الخواوير
مع زمل بيتك حلت شالعينه
فاجاك اخو نوره ورحتوا مدابير
وكم افلج بقفيكم جادعينه
وتجاوبن بالصوت بيضٍِِِ غنادير
كلن تقد الجيب تنعي جنينه
فاجوك شمر هازعين الطوابير
كم خفرةٍ من ضربهم ميتمينه
غنيم وقع عند النياق المغاتير
وقضّت ضلوعه كل شلفا سنينه
الربضا مشعان ذيب المغاوير
على ظهور الخيل هم ساهجينه
وخلى حريمه مثل لون المداوير
وكل على خله تجض بونينه
وجضن وشابن ناقضات الدعاثير
وكل تقد الجيب تصفق يمينه
الهامش
ـــــــــــــــــــــــــــــــــ
*ايام العرب الآوخر , الدكتور سعد عبدالله الصويان ,صفحه 334