شمر جسد واعضاه في كل ديره
الشاعر ماجد بن شريعه الفداغي الشمري
نجد(ن) جفتنا وانتحينا لغيره = مابه طعام وقل للطرش مرعاه
سرنا على خوع الرقاب الظهيره= ضعاين(ن) تتلى زبون الونياه
مع درب ليث (ن) مايطيع المشيره= بين الرفيعي وبين عناز ممشاه
بين السباع اللي تخيف بزويره =برماحنا ومصقل الهند ننحاه
نتلى ضعن زيزوم غلبا واميره =عقب الحميدي تكع الاسلاف تتلاه
المنتفق وابن سويط وظفيره = وعناز معها والرويلي حربناه
قطعاننا بين الظواري نشيره= ترعى بنا زملوق قفر المخافاه
ترعى بناغدره ويرعى صديره =برمح اخو جوزا وابو عبطا رعيناه
وترعى بحدب (ن) للطنايا شقيره= كم فارس (ن) بمصافق الخيل شحناه
وشمر عقب زقام صارت بحيره =وقاد الجهامه صيرم (ن) كنه اياه
عبر بهم شط(ن) مياهه غزيره =ونوخ لهم بادنى الجزيره مطاياه
من علم فارس صاب الابطال ذيره= مابين شطينه من اقصاه لادناه
وقامت تشاور وين حروة منيره=والا تسوق لفرز الابطال خاواه
ويغتنا خطوا الردي بالجزيره = دار(ن) بحد السيف رحنا وخذيناه
يحسب الطنا لغوش الطنايا معيره=يعًيرولاهو عارف(ن) ويش معناه
ماتنفرق بعض البشر من حميره= الابنطقه والمزايا مزاياه
مايدري انه بالسيوف الشطيره= يحسبه شحاذه يوم رحنا وشحذناه
ولايدري انه والسبايا مغيره =سبع القبايل عن جنابه طردناه
دار(ن) خذيناه بحرب(ن) مريره= وذرعان عطبين الضرايب لوينىآه
واقفت على دجله وشرق عبيره=عيا العبيدي خوة الغصب مااعطاه
واللي قعدبه ساق دون خيره= غصب(ن) عليه بسطوة السيف ناداه
صرنا لعصمان الشوارب نحيره=برماح زينين المحازم كسبناه
وصارت (لشمر) يالحلايا ذخيره= الشمري ياحده الضيم ينصاه
يجدع بها عفشه ويطلق بعيره = ويمشي على كيفه مدلل لياجاه
نسمع نوابيح (ن)علينا كثيره =غاية بغيض(ن) شاف به نقص والشاه
استنفرت واستدخل العفن طيره= بخل(ن) بأجا وديارنا يوم جيناه
نجد(ن) لنا ياتايه الراي ديره =خمسين جد بجوف قاعه دفناه
نجد(ن) مثل خطو الهنوف الستيره=نزعل على شانه ونرضى من رضاه
نجد(ن) كما العذرابشبابه صغيره= نشمية(ن) للمعتدي ماعطيناه
حنا لها وحنا بعيد(ن) ذخيره = العين عليه للعدى ماتركناه
زهد علشانه معزز قصيره= يوم الوحيشه بنقرة ايوب تنخاه
وهايس حلف من عظم راسه بجيره = اللي ذبح هذلول ياكود يجزاه
من اقصى الجزيره بالطنايا مسيره= وصاد العواجي طير شلوى بمدلاه
حنا الحرار اللي ذكرنا نذيره = بمركاضنا لعيون هيفا ذبحناه
وجانا الشريف وشب للحرب نيره= بايمان زهيد الطنايا كسرناه
ورده علينا بيص وارخا جريره= ويديه من حد المذارع قطعناه
لعيون عمهوج تروك الذريره = ولد العجرش شاح بالسيف يمناه
ورده كما حيد(ن) يزوم بهديره= وايضا قطع يمصقل الهنديسراه
وانشد وتلقى بالجبان السريره= راس الدريعي ياابن الاوباش جبناه
وبغداد هج من الاعاجمم وزيره =جانا يفزع وانتخينا ونصرناه
الموت وردوا غوش غلبا غديره= والفرس من دار العروبه هزمناه
واقفت تسابق من غضبنا فريره= كم همشري بحوافر الخيل ناطاه
يتلون خيال الجزيره وزيره = حرم على شاه العجم يقرب حماه
صفوق حكام العرب تستشيره = سبع الدول من هيبة الليث تدراه
وصفوق له الجولة المستديره = طوع به العدوان وادب قراياه
والترك جا من ابو فرحان ذيره = وخافت منه شرق اسيا والخواجات
وعقبه بطل قاد الجموع الضريره =عبد الكريم وكنه ابوه حلياه
من اقصى الرها لاقصى جنوب البصيره =قضى على الاتراك ويسر بقاياه
ابهر بها كل العواصم بهيره= واللي ضل معهم رجع له وجازاه
بسيوف غلبا كما البروق المطيره=حل الغضب ومجادع الروس بعداه
وعقبه ذبحنا جيش جرج بخميره= ومندوبهم بالسيف راسه جدعناه
عند الهنوف اللي يبيها عشيره= من كف ضاري عند ستر العفيفاه
ولندن عطت عبر الاذاعه نفيره= على جنراله يليهان بكاه
وعقبه طلع ليثن يقود المسيره=خذابها عقيل صوله وجولاه
اسد هيش ولايوصف بغيره= سبعن تخاضع له مشايخ وباشاه
ساد الجزيره مع شماله يديره= الحضر والبدوان بالعدل ساواه
شمر نصت شيخن تسلطن بديره=من نجد جت له يوم ضيم القراباه
توافدت يوم الظروف العسيره= وقالوا غدا عنا العنى من زبناه
غيداَ غشاتا ظلها وحلو ميره= متدليه قنيانها ونقطف احلاه
وزودن على مدات جوده وخيره= ولاذت بخو جوزا شيوخن مسماه
معطى دخيلن لاذبه يستجيره = عصا الطويل انجلترا والولاياه
من ينكره عسى حباله قصيره= ملاذ شمر يوم وقت المعاناه
فعله تعدى المشيخه بالعشيره=ولندن تصانع له على كسبة ارضاه
وحوادث(ن) صارت ليعرب كثيره= يذكر قبل سبعين عام(ن) تنباه
ومكر اليهود اهل الوجيه الشريره= استرسله قبل حدوثه وشفناه
والشام عيا دهام يقبل ضميره= بكل العروض اللي للاجناب ما اعطاه
وشلون يرضى وشام يعرب يسيره= ويجلس على كرسيها طامع(ن)جاه
وضمر لصفران الوجيه الغبيره= بنمر(ن) تعزل بالطنايا سراياه
وتصافقوا مع جيش روش بسفيره= بمركاض اخو شلوى جيوشه طحناه
دهمان صله صلة(ن) بتحديره = ورد(ن) تعايل من ضماها على ماه
ومدافع القوات مثل السعيره= ودهام ينخا كل الابداد باسماه
كم ازغر بالقاع تسمع طحيره= من ضرب كل مشبب خص مرماه
وزعيمهم جبناه مثل الجحيره= على الركايب مع اركانه كتفناه
بنا طنا وبروسنا زود غيره = كم حاكم(ن) عند الكرامه عصيناه
وهذا قليل(ن) نذكره من كثيره=تلخيص من تاريخ غلبا ذكرناه
لوحه درسنا فنها من خبيره= بامجاد زينين المحازم رسمناه
وقعاتنا يوم الملاقا كبيره =والاش يرسل للطنايا زراياه
وشمر جسد واعضاه في كل ديره= من بطته شوكه تداعى له اعضاه
الا الحثاله من جميع العشيره= تحسب علينا من عددنا حساباه
ولاتذرب الزهيد ناس(ن) حقيره= ختوش(ن) تروج بالمجالس دعاياه
صابه دور مع العمى بالبصيره= ومتنازله عن شيمته مع حمياه
الاجنبي يسبنا ويستعيره = ويستشهد الانذال بخسة نواياه
الفين خسوه للهداني بريره= له ولابوه اللي على العيب رباه
اربض ومد يديك عند الحضيره= كل الحقوق اللي علينا قضيناه
واليوم نجد(ن) مكيفين بخيره = بحكم السعود اهل الوفا لاعدمناه
بنورهم كل الوطن مستنيره = ونبقى على عهد(ن) لابوهم قطعناه
ياباق خطاة العشير بعشيره= دين(ن) علينا عهدنا مانكثناه
بيعة عمر لاهل الوجيه السفيره=على الشرف ماهي تردد شعاراه
هم الاهل وهم الذرى والذخيره= للمسلمين وللعرب حرز وحماه
ماطول ابو متعب بحكمه يديره =حنا بخير ونرفع الشكر لله