ياراكب اللي صوت سلفه يشـادي ...عطسة هنوفً من حيـاه كتمتهـا
افخـم طـرازً واردً فـي بـلادي ...بي إم تزهى قاعـه اللـي وطتهـا
حتى بعد تشغيله الصـوت هـادي ...كنه على الصامت جميـع اجهزتهـا
به فزة اللـي سامـعً لـه منـادي ...يقول اباعركم هل الخيـل جتهـا
حـرً براسـه للسطـر والعنـادي ...مساحـةً كـل العـروق دهلتهـا
الا وبه روغـة خطـاة الربـادي ...ان قامت الهيجـا تعـج دخنتهـا
فيها من الاول ثبـات وركـادي ...ومـن الاخيـر بخفتـه وروغتهـا
ان قلت ابحرز وصفها صرت غادي ...يصعب علـى وصّافهـا تغطيتهـا
لو تقنص الشعار ظبـي الحمـادي ...الرمي يامـن فوقهـا ! يـا تحتهـا
ياراكبه هـاك العلـوم الوكـادي ...من شاعرً نفسـه يـداري بختهـا
في مدح شيـخً بالمهمـات بـادي ...كان العرب صكت بها مشكلتهـا
لفهيد ابو سطام مشيـك قصـادي ...معـك علـومً والفعـول اثبتتهـا
ان كبرت القالات ماهـو حيـادي ...يخضهـا يامـا تزيـن آخرتـهـا
ان كاتهـا تبغـى المفـادا يفـادي ...وان كانها بالعرف جـاب ثمرتهـا
واليا بغت جاهة شيوخ الشـدادي ...امس الخريصيـة رفـع زغردتهـا
وان كانها بالمال ؟ فالوضع عـادي ...اسهل عليه من الحكـي معضلتهـا
هو ! دون هاذي للخزاين نفـادي ...لن النشامـا بالفعـول ارصدتهـا
ماهو مثل شيخان كـرخ البـرادي ...تشيخـت ببشوتهـا والسنتـهـا
والشيخ ؟ وشو !! كان مابه سدادي ...لـو الامـارة سلمتـه خشبتهـا
الشيخ ؟ راس القوم ياجاه حـادي ...والطيبيـن عضودهـا واجنحتهـا
ان طاع ربعه بالليـال الشـدادي ...طاعـوه فـي شداتهـا ورخوتهـا
شرواك يالمـس الفتيـل الزنـادي ...شيـخً عزيـز وشيختـه مابهتهـا
شيخة شداد وفعل ماهـي دوادي ...فعايلـك كـل العـرب خابرتهـا
وابوك من روس الرجال النـوادي ...في حاضـرة نجـدً علـى باديتهـا
عواد ريف الضيف سقـم المعـادي ...فعايلـه حتـى الليالـي روتـهـا
ابن لغيصم يـوم للحصـن مـادي ...يمنـاه جـزلات المكـارم خذتهـا
مقدم هل العصـلا بعـاد المعـادي ...يوم العرب روسـه تعقـد ألويتهـا
يزحـم بربعـي طيبيـن المبـادي ...منـازلً بيـض الهنـادي حمتهـا
ربعي هل النخوة كـرام الايـادي ...كم قالـةً ماهـي لنـا صلحتهـا
شيالة الحـارن صقـور الهـدادي ...يبطي عدوه ماطمـع فـي جهتهـا
افخر بربعـي دون حـد التمـادي ...والناس دون حلوقهـا باذرعتهـا
قصيدة الشاعر نجم الاسلمي في الشيخ / فهيد بن عواد اللغيصم
قصيدة الشاعر نجم الاسلمي في الشيخ / فهيد بن عواد اللغيصم
العرض العادي
