بعد السلام وأجمل عبارات اللقاء والاحترام
صباحكم/ مساءكم رضا وطمأنينة
بعد طول غياب اتجدد معكم بهذه المشاركة الجديدة أرجوا أن ترتقي لأذواقكم
من ذاق مر الفقد واعزتي له
البارحة ما نمت لين القمر غاب=سهران ضايع ما لقيت الدليله
أقلّب كفوفي وأنا حيل مرتاب=ومن الحزن سوّيت لي شبْه حيله
عن واقعي قفّلت بابٍ ورى باب=و فتحْت للنفس الذكريات الجميله
والله يالمحبوب يا سيد الأحباب=ليلة معك تمضي عن ألفين ليله
لو عالم النسيان للبعض جذّاب=ما بيه في ذكراك مخْلي سبيله
يا صعبها أنسى يا بعد كل الأقراب=وشلون يُنْسى حبّ خل لخليله
زرعْت وسط أعماقي زروع الإعجاب=وخليتني للزرع حسبة كفيله
وأصبحت أنا السقّى وفلّاح الأعشاب=وأخلصت في بذل العطا والوسيله
و قرّب حصاد الزرع وإنتاج الأتعاب=وأمسيت والفرحة بصدري أشيله
واثق وعارف كيف حكّمت الأسباب=تعبت فالزرع و منابت حصيله
والصبح وانا ماني مْحسّب حساب=عقب التعب بألقى الحمول الثقيله
وأفقد لقاك و شوفك و ريح الأطياب=وغيبة وصل ظنّيتها مستحيله
ما جاء على البال امتلي قصّة غياب=وأرقى لحالي فوق راس الطويله
ويصطفق بالراس هوجاس الأغراب=من ذاق مرّ الفقْد واعزتي له
يا زين ياللي مسكنك وسط الأهداب=الدمْع من عيني تهامل مسيله
بُعدك يجبّ الروح بالفاس حطّاب=وصدري تصحّر بالطعون الغليله
في باطني وحْشَة مثل وحْشَة الغاب=و في ظاهري صمتٍ يحيّر قبيله
وش جاب فقدان المحبين وش جاب=غير الآسى جوف الضلوع النحيله
الشوق يرقل بي كما رقْل الأخشاب=كنّه يجر القلب فوق المليله
ذوّب عروقي لين جلد الحشى ذاب=والوجْد عشـّـاني على حنظليله
ويالله وكلتك على كل ما طاب=و لا ضاع منهو صار ربّه وكيله
يالله لِمّ قْلوب قد عضها ناب=ناب الفراق اللي جروحه عليله
وسلامتكم