بديت باللي ينقري قرأنه =مدير الفلك رب الملا سبحانه
سبحانه عد ماسبحو له خلقه=وعد الحصى ورمل الثرى وديانه
سبحانه عظيم الشان ربن واحد=ماغرد القمري بجميل ألحانه
سبحانه من خلقت ليومي هذا=سبحانه وسبحانه وسبحانه
من بعد تسبيح الولي وذكره=أبحرت في بحر الشعر واوزانه
الجاش هيض ماكتمت بصدري=شعرن جزيل وناقين قيفانه
لاياخوي الطيب مشعل ماجد=الي على راس الوفا نيرانه
حرن ولد حرن عريب المجنى=على الطويله رفرفن جنحانه
ربعك هل الناموس عدن وافي=عليان بيت الطيب هم بنيانه
قم سو فنجالن مذاقه طيب=وأحرص وبهر هيله وعيدانه
فنجال يبري كل همن عالق=في قلب من كثرة عليه أحزانه
نويت أبين ماكتمت بصدري=عقب الخفا معاد هي بخفيانه
أبنشدك وأنت الخبير الفاهم=والهرج عندي محكم ٍ ميزانه
وين الرجال اللي رست كالجبل=ماحركت كثر الهبوب اركانه
وين الذي لامن نخيته جاوب=يبري جروح الوقت نطق لسانه
وين الرفيق الي يسر ارفاقه=على النقا والطيب مع رفقانه
وين الكريم الي ينومس ذكره=بالمال ولا الجاه جاب العانه
وأهل الشجاعه وين مانذكرهم=لاطق ناقوس الخطر دندانه
الي فعايلهم شهد له شاهد=ويشهد لها سرج الفرس وعنانه
وين السلوم الي عليها جدودنا=عينت من يمشي بخُطىَ جدانه
واهل النوايا الصادقات وينهم=أقفوا كما مزنن نثر ودانه
فكرت في دنيا الغرور الزائل=والله يكافينا شرور أزمانه
شامت عن اهل الطيب والعز والصخا=وخلت كديش القوم مثل حصانه
والحر أصبح كالجراد الدابي=والعوشقه صارت لنا ريحانه
والذيب يقنب بالقوايل صوته =وابا الحصين الوقت كبر شانه
دارت دواليب الزمان الماضي=وخلت عزيز القوم مع سيسانه
والعفن يسكن بالقصور الشمخ=وأبن الحمايل قاصره بيبانه
وقليل بر الوالدين بوقتنا =والجار مارجله خطت جيرانه
والي يتطيب قيل عقله ناقص=حتى الأخو ينسى جميل اخوانه
صب المهيل ياطويل اليمنى=نويت أغير وجهتي وألوانه
عطني علومك ماخذيت علومك=ياصاحبن ماشفت مثل أقرانه
القاف عندي مايتوقف أبدا ً=عندي قريحه بالشعر مليانه
الله على الي بالوكاله حول=مجيوب توه من صِنِع ّيابانه
سعره وصل ميتين معها ميه=مع مية(ن) أخرى دبل أثمانه
كنه جبل ثلجي قوي الملمس=مايصعده رجلن عزومه هانه
لكزس موديل الصنع توه نازل=ثلاث عشر الفين من اوطانه
ال أكس ومطور حسب تصميمه=يقطع فيافي مع سهل شعبانه
منوة عليلن ذاق هم وحسره=يصبح ويمسي في كثير أحزانه
يدي بيدك نمشي عليه بسرعه=النفس ضاقت وأصبحت تعبانه
نبي ديارن ينشرح به خاطر=حبه لجى وسط المحاني عانه
حايل عروس زينوها شمر=بنت الجبل واخت القصيد أوطانه
ديرت يانابيع الكرم هداجه =أحفاد حاتم والكرم عنوانه
شمر هل الردات تاج العزه=شمر مواريث الطنا طنيانه
سلمى وأجا حليلها بالموطن=والسمراء اوجلديه ورمانه
وقصر ٍ مناراته شموخ الهيبه=قصرن بنوه شيوخنا برزانه
هم الدُهَاةَ الي بنوا بالعليا= قصر ٍ طويلن ثابته عمدانه
هم الشجر مثمر ثمرها طيب = منهل صفا يروي عطش ضميانه
هم الرشيد اهل الفعل والحنكه =حكام دوله وأرهبوا عدوانه
سلام ياديرت مضارب لابتي =سلام طيبن فاح به دخانه
سلام ياديرت هل الطيب والعز= لجبالها وسهولها وريضانه
سلام ياطلحه واثله ونبته =سلام شفقانٍ لقى شفقانه
سلام يانسمة هواه الزاكي=سلام يانور الفضى وضيانه
سلام يادارٍ تسمى دارنا = سلام ياحايل عدد هتانه
فيك الاصاله طيبها ومعدنها =وتاريخ يحكي قصةٍلك صانه
هذي منارة من تصدر طيبه= العجم والاكراد مع عربانه
الموقده تبقى دليل الذكرى=وهذي معالم قصره وجدرانه
بـ توران وكل العرب تعناله=لجل تشوف الطيب في برهانه
قلت الشعر وابياتي المعنيه=وافرغت جعبة شاعرن طربانه
جاك القريح وصل عد بيوته =على نبين من نسل عدنانه