بسم الله الرحمن الرحيم
الملحمه الحسَّانيه ( أهل المشاعل )
وهي على أسرة آل حسَّان من شيوخ الاسلم من شمر ،،
للشاعرالاديب / رميّض بن نَصر الحريري الشمري
ياصقر جوّي يابن لزَّام غايم = متعومسٍ وامواج فكري ملاطيم
الحَق يابن لزام مابه هضايم = مار البلا ياصقر عكس المفاهيم
وجه الحقيقة صار دونه لثايم = واللسن خِرس وظل رف البراطيم
مثل السراب ان لاح بالقوع زايم = وليا تبعته يبعد ويرجع إيزيم
نمشي بهالدنيا سوات النجايم = وحنا نعرف رموز فك الطلاسيم
إكبودنا من ضيم بقعاء ورايم = وقلوبنا به مثل نقش المواشيم
مثلي ومثلك ياعشير القرايم = الدهر ياطاهم ولاعنهم إيهيم
ياصقر انا وياك صرنا غرايم = الدهر يطردنا وصرنا مهازيم
كن ( آدم ) اوصى يصير ورثه قسايم = لذريته من كل جنس الاواديم
من نسل (شيث) حقوقهم بالتمايم = الا.. اثنين بكل ورثه محاريم
( رميّض) وريث: لزلته والاثايم = و(صقر)وريث: لحسرته والتناديم
إختر تبي (قابيل ):رمز الجرايم = والا تبي(هابيل) رمز: المظاليم
حنا بزمانٍ به يعز الفدايم = وينذل به زحول الرجال الصماصيم
اهل المبادي والقيّم والذمايم = بهذا الزمن صاروا شذاذ ومذاميم
واهل الرذاله والسفاله تزايم = ومن هدرها تلقاه بيض اللغاميم
ناسٍ تدس السُّم وسط الدسايم = لسنه حسينه والسراير مساقيم
أمينهم:بالكذب يبني قسايم = وصدوقهم: قوله هقاوي وتنجيم
ورزينهم: يركض بنقل النمايم = يفرح ليا منه خطف طارف إعليم
للزور تنشر..مار للحق كتايم = ومكارم الاخلاق عنها مباليم
ان ما إهتدوا به قالوا : إفكٍ قدايم = ولي أهتدوا أفتوا : بشكٍ وتحريم
واهل الفصاحه والبلاغه عجايم = واهل الفكر والعلم صُمٍ مباكيم
اولاد(سحبان ٍ وغس ٍ ) غشايم = واحفاد ( باقل ) في زمنا المفاهيم
واهل البلاهه والفهاهه كلايم = واهل التخلف والتكلف هماهيم
حكيمهم:إن كان فيهم حكايم = اليا نطق جمله.. غدا له لعاثيم
وترى الدواهي ماتجي للطغايم = تبعد ولاترمي العفون الشراذيم
تدهى الحمايل والرجال الحشايم = وترمي (أخو شمّا) حصان النواهيم
والقلب به نارٍ عبوسٍ لهايم = تاكل خضر يابس ولا يِطفِه ديم
ونارك يابو لزام برد وسلايم = نار ( الخليل ابو الصحايف) إبراهيم
وناري: حِمِم بركان تشعم شعايم = منها ( هل الاخدود) راحوا مفاحيم
انا الوحيد اللي لي الدهر ضايم = وظالم وعَضّن بالنياب المخاذيم
أظلم من (الحَجّاج) بأهل العمايم = وأقطع من العدو اليهودي (مناحيم)
خَطبُه رماني وصابني بالسهايم = جذّل جناحيني وقصّ القواديم
وانا كما حرٍ للامجاد رايم = من (مصقرة شلوى) مقر الصواريم
كني(بوادي غير ذي زرع) هايم = هيم الفصول الاربعه والمواسيم
كالبلبل الصداح جر النغايم = يسجع من الاشجان فن ٍ بترخيم
ناديت أهل عصري وعني طرايم = ونفخت.. لكن نفختي نفخة شريم
لوصحت باصحاب الكهف والرقايم = يوم انهم نيمين.. ماتاجد النيم
واكبر دليل ان اهل عصري نعايم = دام ان مثلي ياصقر يحمل الضيم
دنياك مثل(أضغاث احلام) نايم = والا النعاس ان هز راسك بتهويم
خله على محيي العظام الرمايم = اللي كفيل برزق كفر ومساليم
ويامسندي احمل غزير الجمايم = من عليمٍ ماتحتويه العياليم
مثايلٍ لنا عليهن وسايم = من نظم ابن نصر الحريري على الميم
فرايدٍ من لـُب فكري ضمايم = يطرب لهن لـُب العقول الصياليم
ثم صغتهن صوغ الجمان النظايم = بنحور خدرات العيون السلاهيم
ولظمتهن لظم العقود اللظايم = وعقودهن سلك الذهب والبراسيم
لا ( بن جلق) قد صاغهن بالقدايم = ولا اللازوردي صاغ منهن تصاميم
نجاري بهن نزال ديم الخزايم = ابن لعبون اللي هجر نجد وتويم
(عذري الهوى) محمد وقطب الفهايم = بميميته اللي قاف عجزه:اباسيم
وجاراه به(محيي الهوى)والرسايم = عبدالله بن فرج ربيع النواديم
(راعي دخينه) يوم يندب مهايم = ( بما تنتبه ياسالي ٍ بالمناعيم )
وتبعهم(زناد الشعر) والكلايم = وهو: بدبّابٍ بمصمك ابراهيم
محمد العوني بعوجوا الشكايم = مقدار قيمة ساعةٍ ياهل الهيم
جاروا بهن ( كرسي الهوى) والغرايم = محسن ابن هزان حبر النواظيم
راعي الحريق ونجم وادي نعايم = بدن العقوب موردات المقاديم
واهديتهن للحيد ماضي العزايم = الشيخ اخو حسّنه ( محمد ابراهيم)
شيخ إنتصب له سلّم العز قايم = والمجد رامه وانتحى به على الغيم
شيخٍ مضاله بالقبايل علايم = شهم وبتوع ولوذعيٍ وصمصيم
جنب الثريا منزله والنعايم = وخلا الثرى للي يروم الدياميم
سيفٍ مجرب ماذكر به ثلايم = درعٍ حصين من الدروع المصانيم
حلاّل عقدٍ بالليال العظايم = وفتّال رايٍ بالثقال المباهيم
عند العظايم سيد كل الحلايم = غيث الهشيم وليث كل الشغاميم
من (كعب ابن مامه ) بجوده علايم = ومن(المغيره) بالدها به تراسيم
ظلٍ للاسلم عن لفيح السمايم = وكهف وذرى ان جو يديهم معاسيم
ريف الارامل والضعّف واليتايم = حبر وعديم وضاريٍ بالملازيم
ان طول الغيبات جاب الغنايم = ويفرج كروب اهل القلوب المهاميم
وليا نوى مايستمع لوم لايم = ولا شاور سماج الرجال الهذاريم
وليا رضا تجني برضاه الجسايم = وللشمري بالضيق يقضي اللوازيم
وليا طنا تلقى به المر زايم = وشره على من زامره يركي الضيم
مثل البحر لجات موجه لطايم = اليا اصطفق اغرق جميع اللهاميم
شبل الاسود الساطيات الكظايم = سُم الكبود المدميات المضاميم
اللابة اللي تبان عند اللزايم = وبيارقه لجموع الاسلم مقاديم
بنوا لهم مجدٍ قوي الدعايم = مجدٍ هذت فيه العرب والاعاجيم
تاريخهم مشهود مابه وهايم = بفعالهم(سبع القبايل) عواليم
تراهم ( الحسان ) اهل الزعايم = لهم بكل ديره يجونه مراسيم
صغيرهم يجمع شتات الحزايم = وكبيرهم حلاّل فتل المباريم
سمع بهم من كان بأذنه صمايم = بالترك وبلاد العرب والدياليم
اخوان حـسّـنـه للهوايل قحايم = الله خلقهم للمعادي لواطيم
جزاعةٍ مايقبلون الهضايم = الا بعزٍ لو بنارٍ ضواريم
من هازهم: مانال كود الندايم = ومن رازهم: خلوه وسط اللحد نيم
ان حاربوا لضدادهم:كالجحايم = وان صاحبوا لصحابهم: كالمراهيم
هداتهم تلقى بها الطير حايم = وعاداتهم يوم الملاقا صواديم
ربعٍ كرمهم كالبحور الخضايم = ولهم بميدان الفراسه مياسيم
ربعٍ اذا حارن الاريا.. عصايم = بفتلٍ وتدبيرٍ وفهقٍ وتقديم
ربعٍ تطول كفوفهم للعظايم = لا قصّرت عنها الكفوف المقاطيم
ربعٍ رقوا بالمكرمات السنايم = غصبٍ على خشوم الخصوم المداقيم
ربعٍ ليا من ثار عج وكتايم = يردون حيضان المنايا بتصميم
ربعٍ بساحتهم ندا الموت دايم = مايذبحون الا الاسُـود الضياغيم
ربعٍ اذا شحّ الدهر بالطعايم = تلقى(هل المشعل) كرامٍ مطاعيم
اهل الفعال الماضيات القدايم = مثل الجبال الراسيات الجواثيم
اهل السيوف اللي تقص العظايم = واهل الرماح اللي تشق الزراديم
واهل البنادق يوم ترزم رزايم = كم رمّلت بيض وتيتّم مفاطيم
واهل الضعاين والسلف والجهايم = والبيرق المنشور فوق الضراغيم
{واهل المشاعل} بالليال الظلايم = به يستدلون السراة المناجيم
واهل المضايف متعبين الخدايم = من كثر مايارد عليها المعازيم
واهل الدلال اللي بها البن عايم = واهل الصحون اللي بها البل مراديم
واهل الدخيل اليا زبنهم مهايم = يبشر بعزٍ قبل يزهم مزاهيم
واهل الخوي..للجار دايم رحايم = ويدلهونه بالمعزه وتحشيم
والضيف له يمشون قدر وحشايم = من قبل لاتاصل خطاه المقاديم
(اولاد غانم ) حايزين الوسايم = بالمجد والعز والمعالي مغانيم
غانم ابن حسان راعي الهمايم = شيخٍ وصل مجده لكل الاقاليم
نسّـى العرب (حاتم وأوس) الشهايم = و(عروه ومعن) عنهم الالسن مباكيم
مهدي العريبه من المهار الرهايم = ومعطي النجيبه من البكار المجاهيم
مايذبح من البل وجاع وهلايم = ذباح للخطار كوم ٍ علاكيم
من عنتر العبسي بفعله رسايم = ( يغشى الوغى ويعف عند المغانيم)
باشات بغدادٍ لوده تسايم = يبون كسب رضاه لاينقلب ضيم
ولا عطى راسه كبار العمايم = عدوان يعرب والطغاة الشراذيم
ودزوا فرامينٍ عليهن ختايم = يبون عشر المال يرسل دراهيم
وعيّا على الجزيه ودفع الغرايم = ولا طاعهم واتلف جميع المراسيم
وجمع رواسي الاسلم اهل العزايم = كل ابلج وصميدع من الجهاضيم
وقال:إحربوا تحيزموا بالحزايم = الترك للعاصين ماهم مراحيم)
وساقوا عساكر مثل رمل التهايم = ويدوي ورى الرايات رزح الدماميم
وتلاحموا مثل النمور اللحايم = من شق نوره لين غابت مكاظيم
(جموع البواشي) من الجنود الضخايم = كبار الهوامي والعراض الشياظيم
(وخلفة غرير) اهل الصفوف اللحايم = حدب السيوف اللي تحز الحلاقيم
وخلوا جنود الترك مثل النعايم = والا( الهبا المنثور) فوق الهشاشيم
واللي سلم وخذت جواده غنايم = زكّى بها عمره وردّوا مصاليم
ويوم(إبن جشعم) شاف غلب وهضايم = شكى لغانم من ( غِزيّه وبني إحكيم)
جرّد جموعٍ مثل(سيل العرايم ) = ولديارهم وردوا كما تارد الهيم
وصالوا عليهم كالسباع الهوايم = وسّووا عليهم مثل(يوم اليحاميم)
وغرس النخل عافوه وقت الصرايم = وأقفوا رعاب من السماوه محاميم
ودندن نثر بأرض العماره الدمايم = واشبع مجيعات النسور القشاعيم
شنّه عليهم غارةٍ له حطايم = وصبّحهم بدهم العقوب المخاديم
و أودع لـُـبـن(سور العماره هدايم = (خاوي كما إعجاز نخلٍ)مجاثيم
وخلا الجنايز بالعماره خدايم = عاثوا بها ومن عقبهم عاثوا إهتيم
وسوى عشاير(غربي الشط) رخايم = وشيوخهم تدي الاخاوه مراغيم
ومحمد له سابق تلاقي العدايم = وحوافره من كثر طرده ملاكيم
ومن هول ضربه صاب سيفه ثلايم = واروى سماهير الرماح اللهاذيم
وعلى(الرّماحيّه) نوى بالحسايم = ( لِبِن حسَيّه ) وسط صدره مضاميم
نزل عليه..وثم صارت صدايم = وخلا (الرفيع) وشيخها تتبع إحكيم
وحمد ثنى لكل الامور العظايم = (راعي المشاعل) بالدجى والمعاتيم
علمه سطع يوم المحل والهشايم = نزح من (المشهد) وديرة بني تَيم
وطب (الحويجه)ونار حربه ضرايم = وصبّه على روس (العبيد)الشغاميم
بالاسلم اللي كالجيوش النظايم = مسقين خطو الضد كوس العلاقيم
(حماية الساقه) نهار الزحايم = (وهل اللحيسه) معيّشين المياتيم
وتداولو والحرب قاعد وقايم = يومٍ بها نصرٍ ويومٍ مهازيم
وبالعيث حلّوا في( يمين العظايم) = وبنّوا بها سود الرباع الدلاهيم
وفليح مفراصٍ يقض اللحايم = كم درع خيّالٍ حلقها مفاصيم
أسهر نواطير الدبش بالخزايم = وخضّب حدود المرهفات الكواديم
ومانع بيومٍ فيه شاب اللمايم = وهبّت به النّكبا (بريحٍ معاقيم)
حمي الوطيس وشاف جمعه قسايم = وطاح الطريح وصاح ينخى هل الخِـيم
وصارت على ربعه كسيره وهزايم = ثم دبّلوا وارخوا عنان النواهيم
عفت إعنان اخيالته ورد شايم = حمى الطريح وفك تالي المكاصيم
وجدعان يومه بين بايع وسايم = ارخص عزيز الروح دون المحاريم
(راعي المليحا) لاهوى بالغلايم = عادة فعل يمناه جدع الجماجيم
خلا طويلين القوايم قزايم = و اودع طوابير المعادي هواديم
اللي (طوى العزبات) طي العمايم = وفعايله عند ( العمارات ودليم )
وذياب ابو وطفى بعيد العلايم = مثل القمر لاشيف مابه مثاليم
عليه يقطعن الركاب الخرايم = وان شافهن يومي لهن بالاكاميم
صينيته تندي كريم الكرايم = حاشا الكريم الله .. قصدي الاواديم
بذراعه اليسرى حروق ووسايم = من مسفط الرغفان لاعاز تيديم
يوم (القحيمي) قاصره والقصايم = ثم قال به من عرض بعض المناظيم
البل لبيت ذياب هجن همايم = يبن معازيبٍ كرامٍ بهم شيِم
لكبش الغنم قصاب يودع ولايم = ويصبّب اغلى السمن صب المرازيم
(من باب بدرا لشرقي الزاب) رايم = من غالطه بصيت الكرم عِيِب ثم لـِيـم
شاف العرب لذياب تردم ردايم = ركبٍ مشى وركبٍ لفى وركبٍ امقيم
وسطام ستر مرودعات الوشايم = (شوق الدلوع) ام الثمان المناظيم
كم خفرةٍ على حليله تهايم = خلاه تنعي ودمع عينه سواجيم
ومطلق ليا من قال قوله حتايم = ما أرعبوه وزعزعوه المخاصيم
تشهد ( إمعمرة الغلاوين) دايم = على فعوله حيث ماهن مكاتيم
وعبطان كالسرحان نهم النهايم = اليا قنب تقنب ذيابٍ سواحيم
برى الركايب مثل بري القلايم = من كثر ماتطوي بعيد الزيازيم
وطلب حجا المضيوم زبن القطايم = منصى وملفى الهجن زرق المناسيم
وبرفته شافوا للايدي علايم = بمحش الشقاق اللي شحمهن مداسيم
ماسار في طرق الخنا والوصايم = نجيب يعزا للجدود الخضاريم
وابراهيم ابو محمد وعشرة نعايم = الكل يقوله حين يطري ابراهيم
كم قالةٍ منها العواقب وخايم = ركبه وحلّه ولاثنوه الفداديم
وطن للاسلم عقب فرقى الولايم = ومن حشمته بديار نجدٍ محاشيم
وخلا الجمال الهادره والرزايم = ترغي عقب هدره بمرحه جلاهيم
عساه مثواه الجنان النعايم = ويشرب مع الابرار من ( عين تسنيم )
وحماد ابو فيصل قوي الشكايم = قيدوم قومٍ من سلايل مقاديم
اللي لربعه مثل هب النسايم = والا الربيع اليا كسى روضة خريم
اليا وعد يافي ويرعى الذمايم = وان قال قولٍ يتبع القول تتميم
تقي لسان ولايسوس النمايم = نقي بطان ولايدوس المواثيم
ان عبّسوا غبر الوجيه الجهايم = وجهه بشوشٍ والثنايا مباسيم
قلته وقولي(غيض من فيض) زايم = (والخافي أعظم) عند ناسٍ مفاهيم
ويامحمد الحسان يا باالغنايم = سلامٍ احلى من الشهد بالبلاعيم
وازكى من العنبر عذي الشمايم = لاعط عطّر من شذاه المشاميم
ياشيخ ياللي فيك مدحي ملايم = (نورٍ على نورٍ) تكامل بتتميم
ياذخر الاسلم في نهار الوزايم = لا عضّهم ناب الزمن والدواهيم
طوقتن بحسناك طوق الحمايم = وقيدتن بثنواك قيد المعاصيم
وسمتن بطيبك ونفعك وسايم = وفضلٍ فلا انساه يا طيّب الخيِم
يابو فهد ياشوق بدر التمايم = خذ ماتراه وقيّم الهرج تقييم
اسمع مقال اللي لعلياك رايم = ويكن لك بالصدر قدرٍ وتكريم
صديقك(رميّض) حميم الحمايم = يعطيك شوره واترك دليم ودحيم
والشور وصى به حكيم الحكايم = في (سورة الشورى) بآيات حاَ.. ميم
حذرا البيات يباغتك وانت نايم = بغارات خيلٍ مسرجاتٍ مواليم
إجعل ركابك سارياتٍ همايم = مازال مشي ركاب خصمك مجاهيم
واسرج حصان العزم وارم اللجايم = واطلق عنانه وقله(اشتد يازيم)
ماتشوفهم يشدون حصنٍ عزايم = وصهيلهم يابو فهد يقعد النيم
(الاشعري) لايخذلك وانت صايم = يستدرجه(عمرٍ) اذا صار تحكيم
ثم {يبلغ السيل الزبى} والعدايم = ولا ينفع المخذول عـضّ الاباهيم
واعرف ترى قطع الخشوم الشمايم = افضل ولاقطع الرسوم المعاليم
والدلو لاجذيت منها الوذايم = ماينفعه طول الحبال المباريم
والناس بالتجبار ترجي الكصايم = ولاترتجي بكسر الزجاج التلاحيم
ولاتستهين ان شفت خصمك ملايم = ترى السهل مايامن بجوفه النيم
لوهو مثل ماقال قطب الفهايم = ( أصغر من النقطه حدر دارة الجيم )
ترى الجمل يوذيه عض الحلايم = ويجزع ولو انه صبورٍ على الضيم
وان شفت ناسٍ في شدوقه جذايم = جِذه وتشفي علةٍ بالحيازيم
دم العلابي لافسد به سقايم = وطبه يابن حسان فصدٍ وتحجيم
والناس له ثنتين: لين وحزايم = مثل الشجر يحتاج سقيٍ وتقليم
والفتل والكتمان والعزم دايم = كاللين والقسوه برقط الاراقيم
وتبقى القديم وفي يديك الزمايم = ويسير خلف ركابك اسليم وسحيم
وشيخ الشداد وراعي الكور دايم = وغيرك رديف إتحوله بالملازيم
ولو نازعوك اهل الختوم الخصايم = مازعزعوك وفي يديك الخزازيم
في غيبة الما بالتيمم لزايم = وليا حضر ابطل جميع التياميم
ولا حصل العليا ردي العزايم = والا انت حصلته وغيرك مهاضيم
وكان الكرام بجودهم كالغمايم = جودك يابن حسان هتان مع ديم
وليا افتخر اهل العطايا الهلايم = تبقى انت ( عين السيح) كنز المعاديم
وتبقى مثل(سنجار) شامخ وشايم = رجلك على البيدا وطموحك ورى الغيم
سن السفينه جار و اودع ثلايم = وسمّوه ( سن كلوب) لليوم ومديم
ولاهزهزن ركنه رياح وعسايم = ولا قلقله دك الطواب المراجيم
واسلم عسى ايام عمرك تمايم = عدد بيوت ( الملحمه ) اللي على الميم
وعسى عدوك دايمٍ بالهضايم = (متعومسٍ وامواج فكره ملاطيم
]للشاعر/ رميّض بن نصر الحريري الشمري
ارجوا التثبيت لوسمحتوا يا اخوان من اجل الاطلاع عليها من كل الاعضاء..