أخي أبو يسف / رائع هذا االمشهد / وللشعر همسة في هذا المجال ؟؟
انا لا نصتني رميةٍ ما لها توقيـــت
اغض النظر عن ردها واتجاهلها
اعرف الردود وللمثل في القصيده بيت
لكن ارفع الرايات ماني بنزّلهــــــــــــا
لوني ليا منه هرج واويـــــــاَ رديت
هوت كلمتي في منزلٍ غير منزلها
ليا اخطا قليل العرف ما قلت ليش اخطيت
اسلوبي كذا والناس تلقى عمايلـــــــــــها
ومن قال قال فلان عن كلمته صديت
يمشي على غيري هروجٍ ينقّلـــــها
ولو ان كل انسان سوا كمـــا سويت
تموت المشاكل ما لقت من يوصلها
ومن يستغل المزح والضحك والتنكيت
يبي حاجةٍ في الكبد تبرد غلائلهــــــــا
أو انه يظن الناس بعقولهم تفويــــت
تجي عابره وتروح محدٍ يحللـــــــــها
ليا جات بين المزح والجد ما خليت
تعدّل مقام العوج غيرك يميلـــــــها
يسوي على الموال كوميديا واوبريت
وهو مقصده قيمتك وده ينزلهــــــــــا
وكان اشتبهت بمحمل الهرج بعد اوحيت
على باب حسن الظن وجه مثايلهــــــــا
اذا ما وثقت بعزة النفس ما اعتزيت
فلا تجل الدنيا تبذك مشاكلهـــــــــــــا
ولا ينفع الجاهل كلامٍ بلا تثبيت
ولحدٍ يدين النفس غير بفعايلها
ولا يجرح العاقل مثل ضحكة الشمّيت
وترا نظرة الزراي يصعب تحملهـــــا
الشاعر / على بن ربح السبيعي