رائعه من روائع الشاعرالكبير/ عمار القليبي.أعجبتني و أحببت ان انقلها لكم
خلوني ادلي بدلوي قبل يدلابه
وأشرب من الكوثر الي كله عذوبه
بيوت شعرٍ كتبته أبتغنابه
اطرب غوى بين منكوسه ومسحوبه
اشبعه بالمعاني واتوصابه
واصونها بالفكر عن كل مايشوبه
الشعر يرقابي السلم وانا ارقابه
نبدابه من أوله طوبه ورى طوبة
لياحداني زماني حادي ركابه
أبني بيوتٍ ماقد قبلي تغنوبه
أمثال من قولنا ومن قبل يحكابه
تبين لعقول وعن عقول محجوبة
ولكل حادث حديثٍ يانفتح بابه
ولكل شارب مقصٍ قد ماجوبه
بعض البشر لو حكت مانحسّبْ حسابه
ونحسّبْ لكلمةٍ من ناس محسوبة
وبعض البشر لو تجينا مادرينابه
ورجال من حشمته ناقف لمندوبه
ولأ كل رجلٍ يعوّض برجل بغيابه
بعض العرب تكمله وأعداد منسوبه
الحر يعجب له رجالٍ تعزوابه
والتبع من خلقته ماقيل صادوبه
كم واحدٍ بالرخى يفتل لك أشنابه
وعند اللوازم يضيع الّي تهقووبه
وكم واحدٍ يرتكي يادار دولابه
يبين بين العرب لياحتمى شوبه
لاتنشد عن الرجل أنشد عن أصحابه
ينبيك عن طيب فعله طيب مصحوبه
السيف فعله يبين بكف قضابه
كله له نصاب وله حدٍ ومحدوبه
والبيت مايثبت الا بقوة أطنابه
ويشتد ياصارت الأطناب مكروبة
ولاتحسبه يبتسم كل من بلج نابه
سم الحيايا مع الأنياب مصبوبة
والي قبل فلقته ولم له عصابه
احذر منه قبل تأتي كل معصوبه
ولأضاع حقٍ وقف وراه طلابه
وبعض البشر ياطلبت تصير مطلوبه
هذي حقوقٍ تبي حلوق تقدابه
ومن لا فرض نفسه تر الناس هموبه
نعيش في كوكبٍ أشباح وذيابه
ومن لم يكن ذيب يطلع خارج النوبه
ياخلصت للناس تقل انك تمهزابه
يدّٓك تمده وفا وتجيك مقلوبة
ولكل شيٍ زوال بزولة أسبابه
أقدار وأجال بالألواح مكتوبه
.