الهجس والهوجاس بالصدر دوّى= دوي الرعود اللي تقافا سحابه
سوّابه الهوجاس والضيق سوّى= وخلى صناديق الضماير خرابه
سكن بصدره وبالضماير تطوّى= طي المكار وزايد الضغط جابه
يرجف رجيف مهرجفٍ عند بوّى = في دكّت الأضعان ياهاض مابه
وجسمه كما نبت شروكه تلوّى= جف الثرى والقيض يبّس ترابه
يبست جذوعه وكامل النبت ذوّى= في واهج الكنّه شونّه هضابه
أبعد ثرا الفيضه قبل مايتروّى= يبست جذوعه وزايد الحر ذابه
يالذئب من جور الزمن لاتغوّى= ولا تشتكي ضيم الدهر وانقلابه
إلاّعلى اللي منشيٍ كل نوّى = عالم بقالاتٍ دقيق حسابه
عوّا وأنا أدري ليه هوكيف عوّى = من جور وقته وصاطي الجوع صابه
من الجوع عوّى وفي حشاها تزوّى = ضيم الليالي والمعيشة نهابه
يالذئب لا يخوّفك ذيخ تهوّى= الذئب مثلك ماتردّه كـلابـه
يجاهر ويفرس في شراسه وقوّى= ولو جار وقته ما شكا من عذابه
ينهب عشاه ولا خبر قيل خوّى= وشهب الديار الجوق ماقيل هابه
ماهو من اللي بالأضلّة تحوّى = يارد مواريد الخطر ما يهابه
ماتخوفه ناس ينامون جوّى = الذّئب ذئب كل ما الشمس غابه
حيث الرجل بالطيب ياقيل سوّى = يمثّل بفعله في ردي الذيابه
لابد للجمع الضعيف أتقوّى = ويضعف قوي السيف ويدثر ذبابه
ويفلت من الخمس السلاح المقوّى = وأصابع الكفين تطلق نصابه