يالله ياللي للمخاليق معبود=هو واحدٍ والناس بأسمه تنادي
كل الخلايق له مخاضيع وسجود=ابدي بذكر الله على كل بادي
ياشيخ ترخص لي عسى منت مقرود=كلام من صافي نضايض فؤادي
شديت نجدي الركايب من الذود=حرٍ وابوه محفظٍ بالهدادي
ماعادلو شيلهُ مع الكفل مقدود=ولاوقفو به بالثمن بالمزادي
نابٍ سنامه ينهض الكور وبدود=يقطع سراب مخضبات الحمادي
يشدى ظليمٍ جنب الدوح مطرود=نط الشراف بديرةٍ واجتلادي
والا غزالٍ جفله حس بارود=عقب المقيل مبدلٍ بالبرادي
يلفي لبيتٍ كنه العد مارود=بيتٍ عليه القول صچٍ وكادي
بيت الطويل الله يحلل هاك العود=مرحوم ياعلة عديم الضدادي
مهو خفي كأنك عن الشيخ ناشود=علمهُ تسولف به جميع البوادي
حلاّل قالاتٍ صعيبات بشهود=والمعتصي غصبٍ يجيبه يقادي
كلٍ يرادونه يردون بردود=تقول حاديهم من الخوف حادي
ياصار باب الرأي بالقفل مسدود=عجيل مفتاحه بعيد المعادي
مهو كذوبٍ يدفع الناس بوعود=متعمدٍ درب المراجل عمادي
وليا انتخى يفعل صحيحٍ وماكود=ماضيعه نوم الضحى ع الوسادي
حل الشداد وبيرق العز مشدود=مثل الذلول مكّربه بالاشدادي
محسن ركب كوره عسى عز وسعود=عسى الولي يهديه درب الرشادي
منه ثقيل الرأي والحمل مريود=فوق الهقاوي ظنتي واعتقادي
ياعل مازوله مغيب ومفقود=حرٍ يومي مخلبه بالهدادي
الصبر واجبهم على العسر والكود=حمولةٍ من دور سالم نوادي
قبل النصيحه يشترونه بمفرود=وابي انصحك كان النصيحه ترادي
تجمع بني عمك بعزمٍ ومجهود=العز بالجمعه ترى الحمل كادي
واعرف صديقك من عدوك وحاسود=واحرص على اللي باللوازم سنادي
حيث ان هدف بعض المخاليق مقصود =كلن يبي له شوفةٍ بانفرادي
هذا زمانٍ يابو حواس ملهود=سكينةٍ حزه على غير جادي
كم واحدٍ رده للسجن مقيود=باسباب جور مدورين الفسادي
ﺻﺮﻧﺎ ﻛماﻏﺰﻭٍ ﻣﺪﻭﺑﺢ ﻭﻣﺴﺮﻭﺩ =ﻣﻨﺎ ﺑﻼﻧﺎ ﻣﺎيجي ﻣﻦ ﺑﻌﺎﺩﻱ
الحق من دونه ثمانين لادود=مهي مريه عيشةٍ به نكادي
كل يوم من شمر بلا صوك مصيود=ياصاد ربعك لازم انك تصادي
كيف اتّحمل ضيمنا وانت ماجود=عقب الترف ترضى حياة الزهادي
نبيك تظهر مثل عجيل وتزود=حيدٍ يشيل من الحمول الضهادي
تصير مثل هديب يامنبع الجود=بذل الحلال وقوةٍ واجتهادي
انتم على كل القبايل بكم زود=حلالكم عند اللوازم يفادي
ذباحة النيب لياقحط العود=واللي يكذبني يقول انت غادي
والله ماصيدي مطاميع ونقود=ودي شرفكم ماينتقص يزادي
ورزقي على اللي عيش النمل والدود=اللي عليه توكلي واعتمادي
رزقٍ يمدهُ واللي الارزاق محدود=ولا زوده دون الكريم العمادي
حبل الكريم لباب الارزاق ممدود=كم واحدٍ ماكلفه واستفادي
تر لذته لياصار بالناس محمود=وعمر البشر زرعٍ وراه الحصادي
دنياك مادامت لكسرى وداوود=مثل روايا السينما بالبلادي
ناسٍ تقلبهم على السطح بصعود=وناسٍ تنزلهم حفايا مگادي
تمت وصلى الله عد مزن ورعود=وعد ماصلو نهار العيادي
او عد ماياتي على القاع مالود=على الرسول اللي على الرشد هادي
قصيدة عويد القرقشي على الشيخ محسن العجيل اطال الله عمره
العرض العادي
