طيف هجدني في رقادي وأنا نيم = ويقض مشاعر غافلٍ راقد نام
سرا بنا مع السواري ورى الغيم = مع الكواكب لين عدى بنا الشّام
نحفظ تعاميم ونرسل تعاميم = تنشر وتقرا وتكتبه روس الأقلام
يصيح راع الوضح يبي المجاهيم = ملحٍ يجن على أول الصوت درهام
وراع الولع يركض ورى الصيد والريم= ياما رماه الوقت والوقت حسًام
دار الزمن وغدى بغنام وغنيم= ربعن على تال الظعن زامهم زام
حتّى النبات اللي غشا الأرض والديم = اللي زهر عشبه غطا روس الأحزام
وراحت على من يسند الظيم بالظيم= أن قالوا الهندي بهاء سيد الأحكام
بأيدي شغاميم تحل التحاريم = أن جار سيف المالكي بسيف صدام
تظهر بهاء ناسٍ وتقدم تقاديم = ويفهق بهاء ناسٍ ويلجم به الجام
وصحيت من نومي ولقيته هذاريم = وخذاني الطايف بالأحلام وأوهام
خذت بنا دورات الأحلام توهيم = يا ما غرير القلب من مرقده قام
لو فر مجنون من العقل ماليم = ماينصح جاهل ولا عاقلٍ لام
تنسخ تعاليمٍ وتحفظ تعاليم = ولاكل ملكٍ دام ولا حاكـمٍ دام
لو سال واد أحويم ماخالط أثليم = ما يرجع قبل أمس كنّه من العام
تجري سنينه والليالي به أتقيم = والعمر تطويه الليالي والأيام
وأحلام طيف الليل ماتنفع النّيم = ولا يفسره من فسر الطيف وحلام
وقاعات حرف الجيم مايقاله ميم = ولاكل من سمّي بسطام سطام
الطيف
العرض العادي
