لاتفقد اعصابك إذا كنت عاقل = ترى الزعل يجيب همٍ وغربال
واللي يثور بسرعة إنسان جاهل = يندم ولاينفعه جاهٍ ولامال
وإن شفت لك إنسان ساكن وخامل = لاتسأله في داخله شايل احمال
لوسايرك تراه يمكن يجامل = مايعلمه ياكود علام الآجال
الهم في داخله طالع ونازل = شكله وجسمه صايرٍ تقل تمثال
لاتسأله تحرجه كله مشاكل = ولاتجرحه كف الزمن داخله مال
كانه حكى اسمعه وأحذر تجامل = وإذا انتهى انصحه من زين الأقوال
وأحذر تهين إنسان لو كان عامل = ترى الزمن يدور لو الدهر طال
ومع البشر خلك حَسِين التعامل = لايكون لك في كل ساعات موال
وترى الشماته دْينِ لابد ياصل = وتشوفها ما بين حاسد وعذال
وإن شفت شيخٍ والعمر فوق واصل = نزٌله من بين المخاليق منزال
من ينصحك اسمعه واحذر تجادل = وإن شفت محتاجٍ فلا تبخل بمال
كلٍ يعيش ان كان جدي وهازل = ومن عقبها يصير تذكار واطلال
خلك مع الله دايماً في تواصل = في عيشتك تسعد ويرتاح لك بال
( احمد بن ناصر المحرج )
( شكله وجسمه صايرٍ تقل تمثال ) (52)
العرض العادي
