[.... الرجـــال الحلاحيــل ....]
_______________________
(_______________________)
الذيب مايسري عبث تالي الليل
واهل الشجاعه لا سروا يشبهونه
اهل الشهامه فعلهم عدل المــيل
درب المراجل كلهـم يسلكونـــه
عند اللوازم و الشدايد حلاحيل
تاريخهم بالمجد هم يصنعونه
في قربهم تنزاح كل البهاذيل
خويهم محشـوم ما يجرحونه
والخـوه اللي ما وراها محاصيل
غير النكد وهــمومها والمهونه
اترك قرايبها وكب الغرابيل
وعاشر صديقً ماتزحزح متونه
اللي بطيبه فاق عن باقي الجيل
وبحكمته كل النشاما يجونه
في مجلسه تلقى الرجال المداهيل
واهل السخى والطيب مايتركونه
يامحلا المجلس وصف المعاميل
وسوالفً لأهل الفـخر يسمعونه
يا صـاحبي ليت الليال المقابيل
تجمع قلوبً ماستراحت ظنونـه
الشوق فيها زائداً كنّـه السيل
تبي لقاء الغالين واللي يبونه
تبي تقضّـي وقتها بالتعاليل
وتنسى همومً لوتسلت يجونه
طول المسافه ضيّعت للمواصيل
والهم يسكنها ويملى ركونه
يارب وفقنا دروب التسـاهيل
وأرحمً خفوقً عادته ماتخونه
_________________________
وســــــلامـــتــكـــم ،،،،