طلَّابنا / بقلمي
طلَّابنا يالشاطرين الحبايب=الدرس جاكم اتركوا عنكم اللعب
بعد الاجازه حاضرٍ كل غايب=اللي حضر واللي بعد جاي بالدرب
ثلاث اشهورٍ بين كل القرايب=ارض الوطن تسواك ياديرة الغرب
ومن راح دار الغرب شاف العجايب=شاف الذي يقود بالسلسله كلب
واحدٍ على ماقيل شاف الغرايب=حريمهم وارجالهم جنب في جنب
رجَّالهم يشبه جميل الذوايب=تشوفهم سوى على الأكل والشرب
لادين يردعهم ولامن رقايب=احوالهم واشكالهم تجلب الرعب
احدٍ عقب ماشافهم جاك تايب=وقام يتهجَّّد تالي الليل للرَّب
واحدٍ يعوم المومسات الرَّعايب=وبعد الوناسه يشتم النفس ويسب
النفس والشيطان هم السبايب=والثالث اللي رفقته كلها نكب
دلَّك على الشينات وفعل الخرايب=ان طعتني يااخوك دربه تجنَّب
هذي حالة بعض البشر ياعجايب=وقت الاجازه بعض الاحوال تصعب
وارض الوطن يازينها ياحبايب=الخير فيها ينعمه كامل الشعب
ويازين شوف المقلمه والحقايب=ويازين شوف الفصل والدرس والكتب
ومعلِّمٍ لاقام سد النوايب=زودٍ على تعليمنا صدره الرَّحب
الشاعر / نايف الشويب السليمي