لاتنخدع في بعض الاشخاص ياخي = ماكل من لبس البروجيه رجال
المسأله ماهي على الشكل والزي = المسأله ياخي في طيب الافعال
ماكل رجَّالٍ مثل حاتم الطي = وش عاد لو يملك تصانيف الاموال
بعض البشر ياخي ميِّت وهو حي = لاصار ماهو للنواميس مدهال
ماكل عدٍ يحتوي صافي المي = لاتحسبنه صافي الشرب وزلال
لاتنخدع ماكل بيرٍ بها ري = لاتنخدع ياخي في بعض الاشكال
ماكل شيٍ لامعٍ يشبه الضي = وماكل فيٍ تحسبه قدمك ظلال
وماكل من مشى على ظهرها حي = لانتخدع ياخي في بعض الازوال
لاتنخدع بعض اللحى ماهي بشي = لاتنخدع لوشفتها بعينك طوال
الدين ماهو بالتصانيع والغي = الدين بالاخلاق مع زين الاعمال
لاتنخدع ماكل بالناس مهدي = لاتغرك السيما على كل الاحوال
احدٍ على ماقالوا الناس مبلي = وهو يحسبنه للصواعيب حلال
لاتنخدع ياخي هذا الزمن سي = خلك على ماقيل للحمل شيال
المستوي ياخي مايشبه النَّي = لاتنخدع ياخي ياطيب الفال
ترى الصبر ياخي لوقالوا شوي = عواقبه تشرح لك الصدر والبال
نايف الشويب السليمي